Chieliko 115 - Angami Naga CL (Re-edited) Bible (BSI)

Kepenuopfü mu Terhuorhiko

¹ Hie gei mowe, Harie Jihova, hie gei mowe, derei n za bu kemeyieu chücie, n kekhrie mu kemiatho la.

² Kiüdi seyieko bu, “Uko Kepenuopfü kirapuo ba ga?” ituomu.

³ Úko Kepenuopfüe teigei ba, puoe puo neiücü khe chüya.

⁴ Sirei uko rhuo we mharhi zo, rakachü mu suna, themia dzie mhatho zo.

⁵ Uko tie nyi, derei die pulieya mo; uko mhi nyi; derei mha nguya mo.

⁶ Uko nyie nyi; derei mhapfhe siya mo, uko nyhü nyi; derei mhare siya mo.

⁷ Uko dzie nyi, derei mha thezelieya mo; uko phi nyi, derei chatuolieya mo, morei uko mezha nu mhapfhe parlieya mo.

⁸ Süko chükeshükoe süko mhie zo, süko peleyakezha kehoupuorei sümhie zo.

⁹ Harie Israel, Jihova peleliecie; puoe uko kekhruou mu uko zhüu zo.

¹⁰ Harie Aron kinuko, nieko Jihova peleliecie; puoe uko kekhruou mu uko zhüu zo.

¹¹ Nie Jihova preiürhuyakezhako, Jihova peleliecie; Puoe uko kekhruou mu uko zhüu zo.

¹² Jihovae u rüli rükra vor, puoe japie u tsütuo; puoe japie Israel kikru tsütuo; puoe japie Aron kikru tsütuo.

¹³ Puoe japie Jihova preiürhuyakezhako tsütuo, kecüu rei kezhau rei.

¹⁴ Jihova bu n chü pekrashü thienyü, no mu n nuonuo rei.

¹⁵ Tei mu kijü chükeshüu Jihova bu japie nie tsücie.

¹⁶ Teiko Jihova tei zo; derei puoe kijüu pie themianuo tsüwate.

¹⁷ Kesiamia Jihova tsheya mo, zei-icü nu voketamia rei.

¹⁸ Derei hie we Jihova tshetuo, tsie yawinu telhekechachie ketso. Jihova tsheliecie!