Chieliko 114 - Angami Naga CL (Re-edited) Bible (BSI)

U Ngo Zokecü nunu Tuoprakelie

¹ Israel-e Ijipt nunu, tsiu Jakob kikrue die kekrei puyakezha themia kro puo kinu tuo kepra ki,

² Juda bu Ukepenuopfü rüsuoki, tsiu Israel bu puo kedirüvie chülie.

³ Dzükezhae süu ngu di tata, Jordan rürei pesiete.

⁴ Kijüthoukoe tekuochü tuoi, tsiu kijükhruko tekuonuo tuoi prou rülhou tuota.

⁵ Harie dzükezha, no taketa; he-i Jordan, no rürei pesieketa, kiüdi ga?

⁶ He-i kiüdi kijüthouko nie tekuochü tuoi, tsiu kijükhruko tekuonuo tuoi prouta ga?

⁷ He-i kijü, Jihova mhodzünu peliecie, Jakob rei Ukepenuopfü mhodzünu silie,

⁸ tsiekrie pie rüzie chükewau, tsiekhrü pie dzüluo chükewau mhodzünu.