Chieliko 111 - Angami Naga CL (Re-edited) Bible (BSI)

Jihova Puo Themiako Rükhieya

¹ Jihova tshelie, kemezhüko kro nunu tsiu krodi nunu a nou pete se Jihova tshetuo.

² Jihova mhathoko zha, u noumvüyakezha pete-e süko phrüya.

³ Puo mhathoko therhu mu zayie; tsiu puo kemiatho kechachie baya.

⁴ Puo ungomhatho geinu meyielie; Jihova we puo noushünouzhie nyi mu mia ngumezhieya.

⁵ Puo preiyakezhako va khashüya, puoe puo dietseidiekho-u le terü tuoya.

⁶ Puoe puo mhatho kekuo pie puo themiako pesishüte; kijü phruopie seyieko tsüshü.

⁷ Puo dziethoko pete pelelie kesü mu thetou; puo thathadieko pete pelelie sü phre.

⁸ Süko telhekechachie vie, ketho mu kemezhü tou nunu setuo.

⁹ Puoe rhakelie ketsepie puo themiako ki shü; puoe kechachie la puo dietseidiekho-u se balienu diekhashü; Puo zae mesa mu u ngo zo.

¹⁰ Jihova kepreie mhasi bode zo; süu chüüzekeliemia mha kevi site. Puo ketshe-e kechachie baya.