Chieliko 11 - Angami Naga CL (Re-edited) Bible (BSI)

¹ A Jihova gei rüzhülieya; nie kiüdi a ki, “Pera tuoi pruose kijüthou gei votalie,” ilie vi ga?

² Harie, kerüzhüko u theü galie, uko u theütsie pie theürhü gei shüliete, kepekhre nunu unou kemezhüko melou vashüketuo la.

³ Puo mvüdzeko bie pesuokewa sie, kemiathomia kedipuo chü lalie ta?

⁴ Jihovae puo kemesa rüsuoki nu ba; Jihova kedibau teigei ba; puo mhi-e themia nuonuoko meho di uko rüli rie baya.

⁵ Jihovae kemiathomia dojüya: sirei puo noue kerüzhü mu zhosuomia u neiyakezhako ngumecüya.

⁶ Puoe kerüzhümia gei ciephrie, mi mu mitsie perüshütuo; khriedi le kemeriekecü pie tehie nu uko yachüshütuo.

⁷ Jihovae miathokecü la; süla kemiatho thoko puo nei; puo zie-e kemiathomia meho baya.