Chieliko 109 - Angami Naga CL (Re-edited) Bible (BSI)

Khepu la Kecha

¹ Harie, a puo tsheyakezha Kepenuopfü, kemekrieta hiecie!

² Kelhiecüko mu kecürüko tie a ngumvü di mekuo bate, uko ketijü meü se di a kepetsou die pu.

³ Uko a ngukemecü dieko se di a houpfülie, mu puocapuola kejü nu a perhiepetsoute.

⁴ Ae uko khriekeshü la uko a pejote, a uko la cha keba ki zorei.

⁵ A mha kevi chükeshü sou mha kesuo pie a tsü, mu a uko khriekeshü la ngukemecü pie a zhakhra chü.

⁶ “Kelhiecümia puo kedapie puo petsoushücie, mu kepejomia bu puo zatsa thaliecie.”

⁷ Puo nyie kecücü ki puo bu jotalie, mu puo kecha pie kephouma chüwacie.

⁸ Puo teisozhako bu tsatalie, kekreimia puo bu puo mhatho-u setalie.

⁹ Puo nuoko bu merünuomia chütacie, mu puo kimia bu samitacie.

¹⁰ Puo nuonuoko bu rühou kho mu ke di khruocü tuocie; uko kelhou chü ruoketako nunu uko whuowacie.

¹¹ Mha pie puo thepukeshümia bu puo vie pete praliecie, mu si kemomia bu puo mhathoko pekaperuowacie.

¹² Mia puo bu rei puo gei tseiüvishü hie, morei miapuorei bu puo nuo u puo jüketako ngumezhie hie.

¹³ Puose puoyie bu jütalie, mu hasie thephouu nu uko za vawalie.

¹⁴ Puo puonuo kejokemou Jihova bu rükra tuolie; tsiu puo zuo kephouma vawa hie.

¹⁵ Süko bu Jihova mhodzüki tuo sei zolie, kijü zie geinu uko rükra motaketuo la.

¹⁶ Puoe tseiüvishüketuo rükra mo zo, derei kejü mu ketsopfhüu pese, tsiu u melou proketamia dukhrituoü whuozhüyacü la.

¹⁷ Puoe mia rüsecü puo nei eru, süu bu puo ki vorcie; siro puoe ja mia tsücü puo nei mo eru, süu bu puo kinu pecietacie.

¹⁸ Puoe rüse pie puo pfhenei tuoi puo wheliete; süu bu dzü tuoi puo mo gei, mu tier tuoi puo ruko nu rei vocie.

¹⁹ Süu bu se puo whepfüyakezha pfhenei tuoitalie, mu se puo chie phapfü seiyakezha puo chiepha chütalie.

²⁰ Hauha bu Jihova zhakhrau chü a kepejomia mu a pu pesuoyakezhako gei vocie.

²¹ Derei no n za la a sou nu mhachücie, he-i Niepuu, Jihova, n kekhrie rüdirüliya kemoe vicü la, no a shüphraliecie.

²² A we mhajü mu tsopfhü, tsiu a melou nu rüzapfü tuote.

²³ Ae thevatie u khrü jütayakezha tuoi vote; ku tuoi a teshü kelhouwate.

²⁴ Mevo di a khoudzanie thachüte, tsiu a mo rükhate.

²⁵ Ae a pejokezhako krenyü puo chüte; uko a ngucü ki uko tsügetaya.

²⁶ A khruoshüyi, he-i Jihova a Kepenuopfü; N kekhrieu nunu a kelashücie.

²⁷ Harie Jihova, hauha n mhatho, N dzie thuo chüshü zo ücü uko bu sicie.

²⁸ Uko bu mia rüsecie, derei no we jashüya. A re kevorko bu thenga chücie, derei n kituou bu we puo neicie.

²⁹ A pejokezhako bu thenga pie u pfhenei chücie, mu uko bu uko thuo uko nga üse pfhe puo tuoi uko whepfülietacie.

³⁰ A a tie üse Jihova thezietuo, themia krodi nunu puo tsheshütuo,

³¹ Puoe ketsopfhüu zatsa thakecü la, puo pejokezhako kinu uko kelashütuo üdi.