Chieliko 108 - Angami Naga CL (Re-edited) Bible (BSI)

Ngumvümia kinu U Khruoshünu di Kecha

¹ Harie, Kepenuopfü, a nou chüsechü bate, a kenei se di keli mu ketshe tsali chütuo.

² Coliecie, lyre mu harp! a sie zilietuo.

³ He-i Jihova, themiako donunu a n tshetuo, mu seyieko donunu a ketshe tsali chüpie n kishütuo.

⁴ N kekhrie rüdirüli kemoe teiko ki rei rükriekuocü la, mu n ketho-u kho kimhou tso.

⁵ Teiko mho kerükrieu chücie, harie Kepenuopfü, mu n zayieu bu kijü pete mhocie.

⁶ N zatsa nu kuokelie khashücie, di a pfhekhoshüyi, n kekhriemiako kelalieketuo la.

⁷ Ukepenuopfüe kemesachü nunu pushü; a noumvü di Shekem kezashütuo, Sukot razhau mejüshütuo.

⁸ Gilid sü a vie; mu Manasseh a vie; Efraim sü a tsüreu zo; Juda sü a kedithe.

⁹ Moab sü a dzieteikhou; a phikou kelhoupie Edom gei shütuo; Filistia mho kuokelie shieshütuo.

¹⁰ Supuonie a ze vo kuda keba nadiu nu shü ta? supuonie a ze vo Edom nu shü ta?

¹¹ He-i Kepenuopfü, no hie khawa mo üme? tsiu no hie rüpfhünuoko ze prashü mote, harie Kepenuopfü.

¹² Ngumvümia petsouketuo la kekhruo pie hie tsücie; themia kekhruohi sü kemethuo ze ru.

¹³ Ukepenuopfü geinu hie we thepfu se di chütuo, puoe hie ngumvüko kedeshütuo.