Chieliko 107 - Angami Naga CL (Re-edited) Bible (BSI)

Jihovae Kemezhiekecü nunu Kelashüya

¹ Harie, Jihova thezieliecie, puoe vicü la; puo kekhrie sü kechachie baya zocü la.

² Jihovae rhakelieko bu haicü pucie, ngumvümia dzie nunu rhakelieko bu,

³ Kijükouü nunu kengukelieko bu, niathutsa nu tsiu niakratsa nu, pesotsa nu mu pekhrotsanu.

⁴ Uko rayha nu rühoumia tuoya kemo cha nu vota, uko lhoulieketuo nadi puorei ngulie mo.

⁵ Uko terhümerü mu uko nou phisiata.

⁶ Sitse uko kemezhiekelie ze Jihova ki melieshü, mu puo uko mezhieko nunu uko shüphrashü.

⁷ Puo uko ta ze cha kemezhüu nu voshü, uko bu nadi nu vo di lhoulieketuo la.

⁸ Hou, themianuo bu Jihova ketseikevi la, mu themia nuonuo gei chükeshü puo mhatho u ngo zocüko la puo tsheliecie.

⁹ Puoe keterhümia kelhuo chüshüya, mu mha kevi pie kemerümia ketshu chüshüyacü la.

¹⁰ Kemezhiekecü tsiu thegiroko pie u phapfü di kezei mu kesia khrü nu kebako.

¹¹ Uko Ukepenuopfü dieko perhiepetsouta mu Kerükrietho-u die rütseketa la.

¹² Süla puoe kemezhiekecü nunu uko nou chü perewa; uko tetsuta mu miapuorei uko kekhruo jü.

¹³ Sitse uko kemezhiekelie nu Jihova ki melieshü, mu Puoe uko kemezhiekecüko nunu uko kelashü.

¹⁴ Puoe kezei tsiu kesia khrü nunu uko ze parshü, mu uko phako bietshebietshawa.

¹⁵ Hou, themianuo bu Jihova ketseikevi la, mu themianuo gei chükeshü puo mhatho u ngo zocüko la puo tsheliecie.

¹⁶ Puoe mese kharuko bietshewa, mu thegiroko dathewaketa la.

¹⁷ Huomia u kephoumako la kechükenyü ngulie, tsiu u kemouko la kemezhielie.

¹⁸ Kecüca pete uko füta, mu uko kesia kharuko penuo vo.

¹⁹ Uko mezhieu nunu meliepie Jihova ki shü, tsiu puoe uko mezhieko nunu uko kelashü.

²⁰ Puoe puo die ketseshü di uko chü keshürhoshü, mu puoe uko kepekako nunu uko shüphralie.

²¹ Rüdirüliya kemo puo kekhrieu la, uko bu Jihova thezielie, mu themia nuonuo gei ungomhathoko la puo tsheliecie.

²² Uko bu kethezie khakeshü ruosuoko chülie, mu u nei di puo mhathoko pesishücie.

²³ Rou nunu dzükezha nu tsuyakezhako, dzükezhako nunu thelhi chüyakezhako.

²⁴ Sükoe Jihova mhathoko, mu kesou nunu puo mhatho u ngocüko nguya.

²⁵ Puoe diekhashü di khriedi pesieshü, süko dzü rüpfhü pesieshüya.

²⁶ Süko teiko gei sie di kesouko nu leta; kepeka kevor ki uko kethepfu ze jüta.

²⁷ Uko rüge lutsahatsa va, mu kemezemia tuoi pevüvüta, mu uko ziekejü chüta.

²⁸ Uko u mezhie nunu Jihova ki melieshü, mu Puoe uko mezhieko nunu uko se parshü.

²⁹ Puoe khriedi chü pebiewa, süla dzü rüpfhüko zeita.

³⁰ Sitse mha süko kemekrieketa la uko neilie; sidi puoe uko ze vo mengu ketuo rüleichü nu shü.

³¹ Uko bu Jihova ketseikevi la, mu themianuo gei chükeshü puo mhatho u ngo zocüko la puo tsheliecie.

³² Uko bu mechükehou nunu rei puo chü pezhaliecie, tsiu phichüko kehou nunu puo tsheliecie.

³³ Puoe kerüko chüpie rayha chüwa, mu dzüluoko chüpie kijü keso chüshü.

³⁴ Sünu kelhouko kerüzhü la krokezhü kijüu chüpie vakewa metsie kijü chüwa.

³⁵ Puoe rayha chüpie rüzie chüshü, tsiu kijü keso pie dzüluo kenyiko chüshü.

³⁶ Merü ketuoko bu sünu lhoulie, uko bu rüna chülie kevi nadi puo ngulie.

³⁷ Liecielie, khube pelhoulie, puo lieyie bu vi selie.

³⁸ Puo jakeshü geinu, uko kruo philie; siro puoe uko kiri bu tsata molie.

³⁹ Mia uko kepese la, uko bu kemezhie, mu u nousuo di tsa mu rünuo tsuketa la;

⁴⁰ puoe kekuo kesemiako rütse phita, uko cha kejü rayha nu rühou tuota.

⁴¹ Siürei puoe kemezhiekecü nunu ketsopfhüu chü kerükrieshü, mu süunuo kikruko chüpie tekuokro tuoishü.

⁴² Kemezhüko süu ngu di u neilie, mu kerüzhüko pete tie dawa.

⁴³ Kehoupuorei mhakesimia mha hako meho di Jihova u khrielekhriethorcü lecie.