Chieliko 106 - Angami Naga CL (Re-edited) Bible (BSI)

Jihova Ketseikevi

¹ Jihova tsheliecie! Jihova thezieliecie, puoe vicü la; puo kekhrie-e kechachie bayakezha la.

² Supuonie Jihova mhatho kezhako pu phalie ta? Morei puo ketshe pesi hulie ta?

³ Kethocau se tuoyakezhamia, tsiu kemiatho tho chü sei tuoyakezhamia thejakepfütho.

⁴ He-i Jihova, no n themiako nei chükeshü ki a va rükracie; no uko kelakelie ki a rei khruocie,

⁵ sitse noe kedakelieko mhanyikelie ae nguketuo la, a bu n seyieko kenei nunu a noumvülieketuo la, a bu n kayieu ze zayie chülieketuo la.

⁶ Hie mu hie puonuoko rei phoumawate, hie kejokemou chüwate, hie rüzhü phiwate.

⁷ Hie puonuoko Ijipt nu ketuo ki n mhatho u ngocüko ca silie mo, uko n kekhrie kezhako rükrashü mo; uko Kemerie Dzükezha kinu Kerükrietho-u petsouta.

⁸ Sirei puoe puo za la uko kelashü, puo kekuo kezha pesishüketuo la.

⁹ Puo Kemerie Dzükezhau ruoshü, ru süu sota; sidi puoe kesouko nu rei rayha nu tuoi uko cha tha volie.

¹⁰ Sidi puoe ngumvümia dzie nunu uko kelashü, mu ngumvümia dzie kekuou nunu uko rhashü.

¹¹ Dzüko uko ngumvüko vupfülie, uko miapuorei lhieshü mo.

¹² Sitse uko puo dieko pelelie, mu uko puo ketshe tsali chüta.

¹³ Derei uko puo mhathoko rükra mo mhaita, mu puo thatha pfhelie mota.

¹⁴ Uko rayha nunu mha mehoumenguthorta, di kijükesia nunu Kepenuopfü medophita.

¹⁵ Siro puoe uko kecha chüshü uko tsü, derei kepeka kechükhu ketsepie uko gei shü.

¹⁶ Uko razhü nu Mosa mu Jihova themia kemesau Aron ngu uro sieketa ki,

¹⁷ Kijüu rükoshü di Dathan mezulie, mu Abiram kro-u whelieta.

¹⁸ Uko kro nu mi tu parta, miüu kerüzhüko thewa.

¹⁹ Uko Horeb nu mithunuo puo chülie, sidi lhopie chükelie miarhiu rüsuota.

²⁰ Sidi ukoe puo zayieu kedipie nha cüyakezha thudo miarhi puo ze keliwa.

²¹ Ukoe uko kelakelie Kepenuopfü, Ijipt nu mha kezha phiko chükeshüu,

²² Ham kijü nu ungomhathoko, tsiu Kemerie Dzükezha nu mha kemeriekecüko chükeshüu rükra mota.

²³ Süla puoe uko pekawatuo ücü pu, Puoe uko pekawa rei silie kelho la puo noupfhü kereiwatuo üdi puoe kedakelieu Mosae sie puo mhodzü thedo nu thalie mo üme?

²⁴ Uko thenou kemvü kijüu rütse, uko puo die pelelie mota.

²⁵ Derei uko pfhekiko nunu panyapara bata di Jihova pfhe sanyü mota.

²⁶ Süla puoe puo dzie yhasie di rüse uko ki shü; uko bu rayha nunu tetsutatuo üdi,

²⁷ seyieko donu uko tsiako penyüwatuoü, mu uko bu kijüko nu cüre tuotatuoü.

²⁸ Uko Peor Baal rei ze kesalie di kesiamia ruo chükewako cü.

²⁹ Sidi uko mhathoko pie puo nou chü kemeyiewa, tsiu thepe uko gei vorta.

³⁰ Sitse Finehas siethalie di thedo nu mhachüvü di thepeu khalie.

³¹ Süu la puoü miatho üta, vorketuo thephou peteko ki, kechachie ketso.

³² Uko Meriba dzüko kinu Jihova nei kemo chüwa, sidi uko la Mosa bu kemezhielie;

³³ kekreilamonyü uko puo ruopfü perhiepetsouta, tsiu Mosa tie nu die kere parta.

³⁴ Uko themiako pekawa mo, Jihova uko ki pukeshü tuoi,

³⁵ derei uko thuo seyie kekreiko ze kereiphata, di süko mhathoko silieta;

³⁶ ukoe süko rhuo mirhiko rüsuota, sükoe uko la kebie puo chüta.

³⁷ Ukoe uko nuonuo thepfuko mu thenuko rei pie terhuo kesuoko ki ruosuo chü.

³⁸ Uko nuonuo thenuko mu thepfuko pie Kanan nu terhuorhiko ki ruosuo chü, sidi jo kemo zie pekru, tsiu thezie bu kijüu perhuwa.

³⁹ Hai di uko mhathoko pie uko perhuwa, tsiu uko mhathoko nu pieüpiera chüta.

⁴⁰ Süla Jihova noupfhüu puo themiako gei tu sieta, sidi puoe puo kayieu rütseta.

⁴¹ Tsiu puoe uko khapie seyieko dzie nu shüwa; sidi ukoe mecüyakezhako bu uko mho dita.

⁴² Uko ngumvüko rei uko peseta, tsiu uko ze vo süko dzie kekuo khroshüwa.

⁴³ Puoe va kekra uko kelashü; derei ukoe uko keleu se di puo petsouta, sidi uko kejokemou la uko bie kerünuowa.

⁴⁴ Sizorei puoe uko kekra pfhe kesi ki uko mezhie leshü.

⁴⁵ Puoe uko la puo dietseidiekho-u rükrashü, tsiu puo kekhrie kenyi ki ze puo nou rükreta.

⁴⁶ Puoe uko teze kedie chüketako pete bu rei uko ngumezhielieketuo chüshü.

⁴⁷ Hie kelashücie, he-i Jihova hie Kepenuopfü, n za kemesau thezielieketuo mu n ketshe nunu kuolieketuo la seyie kekreiko kinu hie kengulietacie.

⁴⁸ Jihova, Israel Kepenuopfü bu kechachie nunu kechachie ketso thejakepfüu chücie. Tsiu themia pete bu “Amen” puliecie. Jihova tsheliecie!