Chieliko 103 - Angami Naga CL (Re-edited) Bible (BSI)

Ukepenuopfü Kekhrie

¹ Jihova tshelie, harie a ruopfü; mu a nou keba peteko, puo za kemesau tshelie.

² Jihova tshelie, harie a ruopfü; puo mia chü kemevikeshü kheko rükra mota hie.

³ Nie kejokemou pete vapie nie tsüyakezhau, nie kechükenyü pete chü keshürhoshüyakezhau,

⁴ kepeka nunu nie kerheiro rhashüyakezhau, kekhrie mu ngukemezhie üse nie keditsüre chüshüyakezhau,

⁵ mha keviko pie nie menguko chü tseishü di tsüü tuoi nie khriesarüü chü kesa lakeshüu.

⁶ Jihovae kemezhü mhathoko chüya, tsiu mia u pesekezhako gei kedietho cau seya.

⁷ Puo puo chako Mosa bu silie, tsiu puo mhathomhachüko Israel nuonuoko bu silie.

⁸ Jihovae noushünouzhie nyi mu mia ngumezhie phiya, puo nou meyie tho mu kekhrie nyi phi.

⁹ Puo mia kerhie sei balie lho, puo nouyie rei kechachie se ba zolie lho.

¹⁰ Puo u kephoumako kemhiei u gei chü lashüya mo, morei u kemouko kemhie zhakhra chü u tsü mo.

¹¹ Teiko kijüu ki kerükrie tuoi, puo preiyakezhamia gei puo kekhrie zhathorya.

¹² Niathue niakra ze kepecie keba tuoi, we thezho vaciekewako puo u kinu chü kelhiwate.

¹³ Miapuonuoe puo nuo ngumezhieyakezha tuoi, Jihovae puo preiyakezhako ngumezhieya.

¹⁴ Puoe u chükeshü rhiu sicü la, we nyophe zocü puo rükra baya.

¹⁵ Themia sü puo teisozhako phiechü nha puo mhie zowe, lie nu nyiepou puo tuoi puo lhou pevi sierya.

¹⁶ Teikhrie puo mho kevo ki puo jütayakezha la, tsiu puo kebachüu si sa motaya.

¹⁷ Derei Jihova kekhrie we puo preiyakezhamia gei kechachie nunu kechachie ketso baya, mu puo kemiatho rei uko nuonuo nuonuo gei baya.

¹⁸ Puo dietseidiekho-u zeyakezhamia gei, tsiu puo diekhakeshüko rükra tuoyakezhamia gei.

¹⁹ Jihovae teiko geinu puo kediba pesieliete, tsiu puo kedi-e peteko mho di ba.

²⁰ Jihova tsheliecie, nie puo dieliemiako, nie puo die chü tseiütsolieyakezha kekuoko, puo pfhe puo die rünyü di.

²¹ Jihova tsheliecie, nieko puo krodi peteko, nieko puo liethoko, puo nei chüyakezhako.

²² Jihova tsheliecie, puo kedirüvie chü peteko nu keba puo mhatho pete bu. Jihova tsheliecie, Harie a ruopfü.