Chieliko 102 - Angami Naga CL (Re-edited) Bible (BSI)

Kemezhiekelie ki U Mezhiekemelo

¹ A kecha rünyüshüyi, He-i Jihova, a pfhe bu n ki voliecie.

² A kemezhiekelie ki a kinu n zie kevielieta hiecie, n nyie kedeipie a tsüshüyi. A n kiecü ki; a pfhekho mhaishü zocie.

³ A teisozhako mikhu tuoi jütaya ze, mu seithe tuoi a ruko thewa.

⁴ Mha bu a melou vawa di nha tuoi rüwite; süla a a niekhrüda cü rükra mota.

⁵ A melo petokecü la, a ruko a zhü kupfülieta.

⁶ Ae rayha nu puchüü tuoi, raketa chüko nu puchüüpfü tuoi.

⁷ A co zhüta, ae pera puo puo rübei ki tsüle gei keba tuoita.

⁸ A ngumvümiako zhate a kenga; a kerhiekengakezhako a zaü rüse puo nu se.

⁹ A we mige pie niekhrüda tuoi di cüliete, mu mhidzü üse a kekrie sa kereilie.

¹⁰ N noukemeyie mu n noupfhü la; no a chü pielie di a kelhou kegewate.

¹¹ A teisozhako thevatie mha khrü jütakezhü mhie zo; tsiu a nha tuoi rüwite.

¹² Derei Jihova, no we kechachie di ba zotuo; mu n zae thephou pete nu rükra tuo tsotuo.

¹³ No sielie di Zion ngumezhieshü zotuo, puo ngumezhiekeshü teiketa la, uwe, puotei touu vorte.

¹⁴ N kituokoe puo tsieko ngu u neiyakezha la, mu puo nyopheko ngu u noumezhieya.

¹⁵ Seyieko Jihova zau preituo, mu kijü nu kediko pete n rhutuo.

¹⁶ Jihovae Zion chü lakeshü ki, puo puo zayie nunu mia pengushütuo.

¹⁷ Puoe ketsopfhümia kecha leshütuo, mu uko kecha rütseta lho.

¹⁸ Vorkezhü phouu la hau thupie tuocie, sitse penuolie moluocüko rei Jihova tshetuo.

¹⁹ Jihovae puo kemesa chü kerükrieu geinu mehoshü ükecü, Jihovae teigei nu kijüu mehoshü ükecü;

²⁰ kediemia meheimelokezhüko pfhe sishütuoü; pesiawatuoü pejowaketako phreishütuo üdi.

²¹ Sitse Zion nu Jihova zau pu pesishülietuo, mu Jerusalem nu puo ketshe shierei.

²² Themiako tsiu kedirüvieko Jihova rüsuotuoü kehoukengukelie ki.

²³ Puoe chala nu a kekuo bie kethachüwa; puo a zhako chü pedzüwa.

²⁴ A bu sie, “He-i a Kepenuopfü, a teisozhako ketou nu tuoluocü nu a chüseta hieyi, n teicieko sü thephou peteko gei votuo.”

²⁵ Noe thiedzütho kijüu mvüdzeko seshüwate, mu teiko rei n dzie mhatho phre zo.

²⁶ Süko we kaüjütatuo, derei no we ba zotuo; uwe, süko pete pfhe tuoi wetatuo. Pfhemenei tuoi no süko thudiwatuo, mu uko rüditatuo.

²⁷ Derei no we kemhie ba zo, mu n teicieko puo thela ba lho.

²⁸ N liethomia nuonuoko khrukhre tuo zotuo, mu uko tsia pesiepie n mhodzüki shülietuo.