Chieliko 10 - Angami Naga CL (Re-edited) Bible (BSI)

Kedietho Capi la Kecha

¹ Jihova, kiüdi no ratsa tha zo ga? Kemezhiekecü teiki kiüdi n thuo n kevieta ga?

² Kerüzhükoe kerüzha di kejüko pese tuote; uko rhükelie doko bu uko teliecie.

³ Kerüzhükoe u melou menguko se kemelhaya, u ya vi nyü di u meda kesuoko Jihova rüse mu melieya.

⁴ Kerüzhükoe kemiakokecü zieu nunu sie, “Jihovae pfhü se par lho;” uko kele pete rei, “Ukepenuopfü tuo mo;” iya.

⁵ Uko chako vi kehielie seiya; n capiko rükrie, uko kengu nu tuo mo, ukoe u ngumvü pete üse mhathomoü kre nyüsie tuote.

⁶ Uko thuo u nou nu pu di, “We rüsierünielie kenjü: nuosenuoyie thephou pete nu we kemezhietalie lho,” siya.

⁷ Uko tie sü mia kerüse mu mia kese, tsiu mia kepese thuo tshu; uko meü khro sü mhatho kesuo mu kemethuokemeruo sie sa mo.

⁸ Uko rünako nu rüshü di mia rü baya; ukoe kepekhrera nu u kejo kejüko dukhriya. Uko mhi-e kejümia petsou baya.

⁹ Loshae rüshükezhü tuoi uko kepekhrera nu mia pfhezhüya; ukoe kejüko telietuoü rüshü baya: uko kejümia tepie jal nu shülieya.

¹⁰ Uko nukelieya, gulieya, sidi kekhruohi kejüko uko kekuo nu tetsutaya.

¹¹ Uko melou nunu: “Kepenuopfüe rükra mote; puoe puo zie kevieliete, puo mhakipuorei ngu lho,” ibaya.

¹² Sieliecie, Jihova, he-i Kepenuopfü, n dzie yhashücie; mia bu u pesekezhako rükra mota hieyi.

¹³ Kiüdi kerüzhümia Ukepenuopfü melie di! Uko nou nu sie, “Puo hau la hie kiepie ketso zo lho,” siya ga?

¹⁴ Derei noe nguya; ketho, noe süko pie n dzie nu shülieya. Ketsopfhüko we u thuo u khapie n tsüshü; no sü u krünuo kejümia yakepieu zo.

¹⁵ Kerüzhümia mu kesuomia bou bietshewalie; mu u kerüzhüko pfhü pejüwa kemochie pfhüwaliecie.

¹⁶ Jihova we telhekecha Kediu zo: seyieko we puo kijü nu kaüjütaya.

¹⁷ Jihova, noe rünuokelieko mengu siya, noe uko melou chü pekuoshütuo, n nyie kedeipie uko pfhe situo.

¹⁸ U krü kejüko mu mia u pesekezhako capiu chütuo, kijünumiako bu u kede sa molieketuo la.