Capiko 9 - Angami Naga CL (Re-edited) Bible (BSI)

Abimelek Dze

¹ Jerubal nuou Abimelek-e Shekem nu keba ki puo zuo prünuoko mu puo zuo thinuomiako pete ki hakemhiei pushü.

² “Vo di Shekemmiako pete ketsocie, ‘Nieko la kiu vituo ütuo shi? Jerubal nuo thepfu hiethenieko pete bu nie mhodikecüu tuo mo, mia puo bu nieko mho dikecüu tuo shi?’ Siro a sünie chü nie zie geinu sierkecü rei rükracie.”

³ Sidi puo zuo kinumiakoe puo dieko pie Shekem themiako pete ki pushü tse, ukoe Abimelek siedzi kechüu uko neita, uko sie “Puo sü u siezedzüriemia zomu.”

⁴ Sidi ukoe Baal-berit rüsuokiu nunu, raka hiethenie chüpie puo tsüshü, ru Abimelek-e süko pie mha kesuo chücü u khra kemo kro puo zhakhrü pie puo siedzi chülie.

⁵ Sidi puoe Ofra nu puo puou ki kho, di puo siezedzürie Jerubal nuo thepfu hiethenieko ze vo ketsie puo geinu dukhri phrewa, derei Jerubal nuo nhicutho-u Jotham lhielie, puoe rüshüketa la.

⁶ Sitse Shekemmiako mu Bet-milomiako pete vor kengulie, di ukoe vo phrie bodiu kiki nu Abimelek pie kedi chülie.

⁷ Jotham-e süu sishü tse, puo Gerizim Kijüthou zü gei kho thalie di, uko ki hakemhie pu shiekhoui di sie, “A die rünyüliecie, nie Shekem nu themiako, Jihova bu nieko pfhe rünyülieketuo la.

⁸ “Thiedzü va puo seibokoe tier pie kedi puo kenhepie uko mho dituo üdi tuopra. Sidi uko olivbo ki, ‘Hie mho kedi chücie,’ ishü.

⁹ Derei olivbo-ue sie, ‘A bu a tierko, terhuomia rei mu themia rei bie ketherhu shüyakecüko khawa di vo seiboko mho rülorülie zhatuo me?’

¹⁰ Süsieu va seibokoe vor di chiedebo-u ki, ‘No vor di hie mho kedi chücie,’ sishü.

¹¹ Derei chiedebo-u sie uko ki, ‘A bu a si kevi kemouko vüshü mo di vo seiboko mho rülorülie zhatuo me?’

¹² Sitse ukoe vo khubebo-u ki, ‘No vor di hie mho kedi chücie,’ si.

¹³ Derei khubebo-u sie uko ki, ‘A bu terhuomia mu themia rei nei chülieyakezha a khubedzü keviu khawa, di vo seiboko mho rülorülie zhatuo me?’

¹⁴ Sitse seibo petekoe vor mvüteibo-u ki, ‘No vor di hie mho kedi chücie,’ isi.

¹⁵ Sitse mvüteibo-ue seiboko ki, ‘Nieko nou ketho di a bu nieko mho dituo ükecü la tier pie a kenhe nyüya ro, vor di a khrükhro rüzhüliecie, derei si moro, mi bu mvütei geinu par Lebanon nu sedarboko the pejüwacie.’

¹⁶ “Siro tsie, niekoe Abimelek pie kedi chükeshü ki nie nou ketho mu mezhü di ro? Mu nie Jerubal tsiu puo kikru gei mha kevi chüshü, mu puo mhathoko ngulie kesü tuoi puo gei vishü üro?

¹⁷ A puo we nie la terhü chü, mu puo phou rei khashü khrie mo di Midian dzie nunu nie kelashü,

¹⁸ derei thie nie-e a puo kikruko perhie sieta, sidi puo mu thepfu hiethenieko ketsie puo geinu dukhriwa, di puo diepfü nuou Abimelek üse nie siezedzüriemia üdi pie Shekem themiako mho kedi chüwate;

¹⁹ siro hai di nie-e thie Jerubal tsiu puo kikruko gei chükeshü nie nou ketho mu puotou zo üro, Abimelek nie neiliecie, mu puo bu nie gei rei puo neiliecie;

²⁰ derei si mo üro, Abimelek geinu mi bu tu par Shekem tsiu Bet-milo niepuko the pejüwacie; siro mi bu Shekem mu Bet-milomiako geinu par di Abimelek the pejüwacie!”

²¹ Süsie Jotham-e puo dzürieu Abimelek keprei la ta vo Beer nu bata.

²² Siro Abimelek-e Israel mho cie se di,

²³ sitse Ukepenuopfüe Abimelek mu Shekem niepuko donu kesuo ruopfü puo ketseshü, ru Shekem niepukoe Abimelek gei dosuo pieta.

²⁴ Hau chükeshü, Jerubal nuo hiethenieko dukhrikewa zie khepuu pie uko siezeu Abimelek mu puo khruohipie puo bu puo siezedzürieko dukhrikewa Shekem niepuko gei shüketuo la.

²⁵ Siro Shekem niepukoe puo petsou di themia keviepie kijüthouko gei ba di cha süu nu kevoko kechükede tsiu u vie selielieta; mu süu si vo Abimelek tsota.

²⁶ Siro Ebed nuou Gaal-e puo siezedzürieko ze di Shekem nu vorlie mu Shekem niepuko bu puo pelelie kesü chülie.

²⁷ Siro ukoe lie nu tsu di khubesi rielie, di puodzü thelie, di thehe chü. Sitse ukoe uko rhuou rüsuoki nu vo di cü mu krie ba di sie Abimelek rüseta.

²⁸ Süki Ebed nuou Gaal-e sie, “Abimelek sü supuomu, Shekem rei supuo di we puo lie chükecü mese mu? Jerubal nuou, mu puo khronu Zebul unie Shekem krüu Hamormiako theke moü me? Siro we kiüdi puo lie chütuo ga?

²⁹ Themia hako bu a dzie nu ba ücü we! A Abimelek kediwatuo muru, sidi a puo ki, ‘N rüpfhünuo pete ze par di kebiecie’ izotuo muru!” ita.

³⁰ Rünau nu kezhau Zebul-e Ebed nuou Gaal dieko sishü tse, puo nou meyiethorta.

³¹ Sidi puoe dieliemia ketsepie Aruma nu Abimelek ki shü di sie “Harie; Ebed nuou Gaal-e puo siezedzürieko ze Shekem nu vor di ngumvümia die pu di nadiu pfükerhü bate.

³² Süla tsie n rüpfhünuoko zelie di pezei ze vo lie nu rüshü bacie.

³³ Sidi khise niaki thusier mumetha, nadiu nu kenourhei ta lelie; sidi Gaal mu puo themiako n ze kebietuoü par ro, uko gei chülie keviu chüwaliecie.”

³⁴ Sitse Abimelek mu puo rüpfhünuoko pete pezei nu sielie di la dia chü vo Shekem la bata.

³⁵ Siro Ebed nuou Gaal-e par di nadiu care ki thacü Abimelek mu puo rüpfhünuokoe süu ngushü tse uko rüshü chü nunu sierlie,

³⁶ Gaal-e süko ngushü mumetha puoe Zebul ki, “Legei kijüthou mezüko gei themia tsurzhie!” Sitse Zebul-e sie, “Luko themia mo, kijüthou khrüko zo.”

³⁷ Derei Gaal-e pu la di, “Mehoshüyi, themiako Tabur-erez nunu tsurzhü ho, mu la puo we Elon-meonenim tsa nu vorzhie.”

³⁸ Sitse Zebul-e puo ki, “Tsie we no kemelhakecüu kirapuo tuota ga? Noe, ‘Abimelek supuo di, we puo lie chükecü mese ga?’ ikebau, rüpfhünuo hako no uko zhase kebako mo üme? Tsie we pra di uko ze kebiecie.”

³⁹ Sitse Gaal-e keriechü di Shekem rüpfhünuoko zepra Abimelek ze kegei.

⁴⁰ Gaal-e tata, mu Abimelek-e puo whuo zo vo, siro themiako kekra rüzalie di tetsuta, si vo nadiu care tso.

⁴¹ Sidi Abimelek-e Aruma nu lhou bata, siro Zebul-e Shekem nunu Gaal mu puo siezedzürieko whuowa. Süla uko Shekem nu lhou salie kenjüta.

⁴² Siro süsienhie themiakoe lieko nu tsu tuota. Abimelek-e süu silie tse,

⁴³ puoe puo themiako kezapie la se chülie di tsu lieko nu la ba. Sidi themiako nadiu nu parkezhü ngushü tse, puo sielie di uko geiwa.

⁴⁴ Siro Abimelek mu puo ze ketuo kro-u ta vo nadiu care tieki thalie, mu la kekreinie lie nu ketuoko whuo vo di uko geiwa.

⁴⁵ Sidi sünhie zhate Abimelek-e nadiu perhie di süu lielie mu themiako dukhri phrewa. Süsie puo nadiu bie pesuowa di metsie pie sünu prushüwa.

⁴⁶ Shekem Dahou nu keba niepukoe süu sishü tse, ukoe El-berit rüsuoki kemeteiu nu leta.

⁴⁷ Shekem Dahou nu keba niepukoe sünu vo kengupfü bata ücü Abimelek-e silieta.

⁴⁸ Sitse Abimelek-e puo ze ketuo rüpfhünuoko ze di Zalmon Kijüthou gei kholie; sidi puoe seidurü puo pielie di seico khro puo repie puo bouka gei shülie. Puo ze ketuo rüpfhünuoko ki, “A chükeshü tuoi nieko rei chü mhailiecie,” sishü.

⁴⁹ Süla rüpfhünuoko pete seikhro re pielie di Abimelek siemedzi kho di pie kudau vakhrieshülie. Sidi ukoe mi pie dahou theshü; sidi Shekem Dahou nu keba themia pete, thepfumia mu thenumia kesa mia nyie puo mese thekhriwa.

⁵⁰ Süsie Abimelek-e Thebez nu vo di süu re, di lielie.

⁵¹ Derei nadiu nu dahou kemetei se puo ba, mu nadiu thepfumia rei thenumia rei, niepuko pete ta sünu vota; ukoe dahou khalie di dahou mezü gei khota.

⁵² Siro Abimelek-e dahou re di mi pie dahou nu theshütuoü kharu penuo phi.

⁵³ Derei thenumiapfü puoe thoukege tsie mhoseu kelhoupie Abimelek tsü va di puo tsüru vaphrowa.

⁵⁴ Sitse puo rükri puo rünyie kepie khriesau kie di puo ki, “N zhiechau zulie di a geiwalie, mia bu a pu di, ‘Thenumiapfü puo bu puo geiwa shie,’ imolieketuo la.” Ru khriesau puo zhiechau pie puo zekhroshü sitse puo siata.

⁵⁵ Mu Israelmiakoe Abimelek siaketa ngu tse, tuo u ki nu la vo phreta.

⁵⁶ Sidi Ukepenuopfüe Abimelek kejo-u, puoe puo siezedzüriemia hiethenieko dukhriwa di puo puo gei kejo chükewau khepu chüshü.

⁵⁷ Sizomonyü Ukepenuopfüe Shekemmiako kerüzhü pete pie uko gei kha lashü mu Jerubal nuou Jotham rüseu uko gei chü tsei vorta.