Capiko 8 - Angami Naga CL (Re-edited) Bible (BSI)

Midianko Penyü Thelathoko

¹ Süla Efraim themiakoe Gideon ki, “No kiüdi hieko gei haita ga? Nieko Midianko whuoketuo ki kiüdi hieko kie mo ga?” Sidi ukoe Gideon kerhie phita.

² Derei puoe uko ki, “A nieko ki kedipuo chü rükrülie dimu? Efraim khubesi meteko zorei Abiezer khubesi lieyieu ki vikuo mo üme?

³ Ukepenuopfüe Midian krüta Oreb mu Zib unie khapie nieko dzie nu shüshüe. A we kedipuo chüpie süko ze kemejülie vituo dimu?” Puoe hau pushü tse, puo gei uko nei kemo-u rükreta.

Gideon-e Midian Kediko Tekelie

⁴ Gideon mu puo ze ketuo mia krie seko phisiatazhü zorei ukoe whuozhü zo, sidi Jordan nu vor tsolie di süu cie prata.

⁵ Siro puoe Sukot themiako ki, “Niekhrüda huo khapie a ze ketuo themiako tsüshücie, ukoe phisia tuote, mu a tsie rei Midian kedi Zeba mu Zalmuna unie whuozhü zo,” si.

⁶ Derei Sukot nu kezhakoe sie, “Zeba mu Zalmuna unie tsie n dzie nu bate me? Moro hie kiüdi niekhrüda pie n rüpfhünuoko tsülie vituo ga?”

⁷ Sitse Gideon sie, “O siro, Jihovae Zeba tsiu Zalmuna kha a dzie nu shüwata ro, a rayha nu zohu mu kikhahu pie nieko vüshütuo ho.”

⁸ Sünunu puoe Penuel nu kho, di uko ki sükemhie pushü, derei Penuelmiako rei Sukotmiako pukeshü tuoi puta.

⁹ Süla puoe Penuelmiako ki, “A kuolie di la vor ro, a dahou hau bierhuo tseiwatuo,” sishü.

¹⁰ Tsiu Zeba mu Zalmuna unie rüpfhünuo mia nyie kerepengou mese ze di Karkor nu ba, süko niathutsa themia rüpfhünuo donu sia keshako; mu zhiecha kepie mia lakh puo di nyie mepfü we kata.

¹¹ Süsie Gideon-e Noba mu Jogbeha niathutsa rüve chau ze kho di vokhrüpfü keba rüpfhünuoko whuo.

¹² Sitse Midian kedi Zeba mu Zalmuna unie tata, derei puo unie whuo zo vo di unie telie, sidi rüpfhünuo pete phruo kemidewa.

¹³ Siro Gideon Joash nuoue Heres chakhrau ze di terhü nunu la vorcü ki,

¹⁴ puoe Sukotmia khriesamia puo telie di puo ketsoshü, sitse khriesaue Sukot nu kezhako mu phichüko mia hietheniethenie za thupie puo tsü.

¹⁵ Sitse Gideon-e Sukotko ki vor di sie, “Harie nieko a ki, ‘Zeba mu Zalmuna unie tsie n dzie nu bate me? Moro hie kiüdi niekhrüda pie phisia tuoketa n rüpfhünuoko tsülie vituo ga?’ ikebanie haki zo vorte,” sishü.

¹⁶ Sidi puoe rayha nu kikhahuko se vor di pie Sukot nu phichüko pechü di uko pethashü.

¹⁷ Tsiu puoe Penuel dahou bierhuowa, di nadi nu themiako gei phrewa.

¹⁸ Siro puo Zeba mu Zalmuna unie ki, “Niekoe Tabor nu geikewako themia kikecü kro puo ga?” Unie sie, “Uko pete rei n tuoi zo, uko rei kedimia nuonuo mhie zo.”

¹⁹ Sitse Gideon-e la sie, “Cüko a siezedzüriemia phre ho, a zuo kethopfü nuoko zo. Jihovae rhei ketuo tuoi, nieko rei uko perheikeshü siewe, a rei nieko dukhrilie lhociü.”

²⁰ Sidi puoe rürei par puo nuo nuorieu Jether ki, “Sielie di unie dukhriwalie,” sishü. Derei Jether-e puo zhiecha zou mo zo, puoe medzü baluocü la michie rei sata.

²¹ Sitse Zeba mu Zalmuna unie sie, “N thuo sielie di hienie biewaliecie, phichümia puo thuo puo meseu chükecü mese zo.” Süla Gideon sielie di phi unie dukhriwa; di unie ut vo gei khepieketuo rütso vieko pielie.

Gideon Terhuorhi Chükeshü

²² Siro Israelko sie Gideon ki, “No hie mho ditacie, n nuou mu n tsunuo pete rei sa di; noe Midianko dzie nunu hie kelashücü la.”

²³ Derei Gideon uko ki, “A nieko mho dilie lho, morei a nuonuo bu rei dilie lho. Jihova thuo nie mho dituo.”

²⁴ Sidi puoe uko ki, “A nieko ki mhapuo chaya, süu nie kehoupuorei terhü mhava nu ngukelie suna nyieko khashücie.” (Uko Ishmaelmiacü la suna nyie seya).

²⁵ Themiakoe puo ki, “Hieko nei siei di süko khashütuowe.” Sidi ukoe pfhe puo khrashülie di terhü mhava nu ngukelie u ya nu suna nyieko kelhoupie sünu shü.

²⁶ Siro puoe chakelie rütso vie, kheloloi di keliekecüko, tsiu Midian kedimia seyakecü pfhe teimeziekecüko mu uko ut vo gei kekhe nyako sa phrü kemo suna nyieko zorei puo mesi shekel nyie puo di kriethenie ngulieta.

²⁷ Gideon-e süu pie efod puo chülie sidi puo rüna Ofra nu pie balie, tsiu Israel pete-e süu geinu thethelieta, sidi süu Gideon mu puo kikruko la ciephrie puo chüta.

²⁸ Sidi Midianko Israelko mhodzünu rünuonyhi bata, mu uko rüka la sier mota. Sidi rünaue Gideon teiki cie hiedia la mene balie.

Gideon Se

²⁹ Siro Joash nuou Gideon-e puo kinu la vor lhou bata.

³⁰ Tsiu puoe puo kimia kekra bacü la puo nuo thepfumia hiethenie lhoulie.

³¹ Siro Shekem nu keba puo pelipfü rei thepfumia puo penuo puo tsü, mu puoe puo za pie Abimelek chülie.

³² Mu Joash nuou Gideon-e tsa phi ba di sia, sidi puo pie Abiezritmia rüna Ofra nu puo puou Joash mekhru nu khruwa.

³³ Gideon siata mumetha, Israelkoe hadzü mhie lata mu Baalko ze thethelieta. Ukoe Baal-berit idi pie uko rhuo chüta.

³⁴ Siro Israelkoe lutsahatsa ngumvümia dzie nunu uko kelakeshü Jihova uko Kepenuopfü rükra mota;

³⁵ mu ukoe Jerubal (süu Gideon) Israel gei mha kevi chükeshü peteko la rei uko kinumiako gei tseiüvishülie mota.