Capiko 7 - Angami Naga CL (Re-edited) Bible (BSI)

Gideon-e Midianko Penyükelie

¹ Sitse Jerubal (süu Gideon) mu puo rüpfhünuoko khiserüna sielie di vo Harod dzüluo khiekinu uko razhü chülie, siro Midianko razhüchüu uko mhotsatie Moreh kijüthou kepenuo razhau nu ba.

² Jihovae Gideon ki, “A bu Midianko khapie n themiako dzie nu shüketuo a la rüpfhünuoko krathor. Israel-e a ki kemholie di, ‘A dzie thuo a kelalie,’ italie vicü la.

³ Süla tsie rüpfhünuoko ki pheshieshü di, ‘Kehoupuorei michie mu peketako bu kinu la votalie,’ iwalie.” Gideon-e uko dojüshü tse mia nyie mepfüekenie lata, mu mia nyie ker balie.

⁴ Siro Jihovae Gideon ki, “Rüpfhünuoko tsie rei krathor; uko ze dzü nu kelie, mu a n la uko dojüshütuo. Siro a n ki, ‘Hau bu n ze votuo’ ikeshüu bu votuo, derei n ki ‘Hau bu n ze volie lho’ ikeshüu bu vo lho.”

⁵ Süla Gideon-e rüpfhünuoko ze dzü nu kelie, sitse Jihovae Gideon ki, “Kehoupuorei tefü tuoi puo meü se dzü meyokecüu kha kreipie latsa puo bawalie; süsütuoi khoutoutsu di dzü kekrieko rei,” sishü.

⁶ Ru u dzie pie dzü tapie sie u me nu shü di krie mu meyokecü mia krie se; derei kekreiko pete khoutoutsu dzü krie.

⁷ Sitse Jihovae Gideon ki, “Meyokecü mia krie seko ze di n kelashütuo. Sidi Midianko khapie n dzie nu shütuo; mu kekreiko pete bu u thuo u kinu la votalie.”

⁸ Sidi Gideon-e Israel keshako pete ketsepie u kinu shüwa, di mia krie seko ze balie, tsiu rüpfhünuokoe nouvako mu ketsüko pielie. Siro Midianko rüpfhünuo razhüchüu sü uko khrotsa razha nu ba.

⁹ Süzhü Jihovae puo ki diekhashü di, “Sielie, di tsu razhüchüu relie, a süu khapie n dzie nu shüwaketa la.

¹⁰ Derei no ke re michie ro, n kituou Pura zelie di razhüchüu nu kecie;

¹¹ siro noe uko kedipuo pu ba shiü sishü tse, razhüchüu reketuo la kethepfu ngulietuo.” Süla Gideon-e puo kituou Pura zelie di razhüchüu rükhouba gei ke.

¹² Ru Midianko, Amalekko mu niathutsa themiako rei sa di razhau nu kuprie kekra tuoi thapfü tha; mu uko utko phrü hukeliepfü mo, krakrapie dzükezha khie huocanyo mhie zo.

¹³ Gideon-e ke tsolie ru mia puoe puo zeu ki puo mho pu ba, sidi puo pukecü, “A a mho puo pema, mu harie, barli thou pie kechü niekhrüda puoe puo kekuo re se di rütou se Midianko razhüchüu nu tsur pfhekiu va di puo bie ketsükhewa, sidi süu tetsu dapfüzhüta.”

¹⁴ Puo zeue sie, “Hau mha kekrei puorei mo, Joash nuou Gideon zhiechau zo, puoe Israelmia puo, Ukepenuopfüe Midianko mu rüpfhünuo pete khapie puo dzie nu shüwate.”

¹⁵ Gideon-e themiau mho mu puoca pukeshüu sishü tse, puo Jihova rüsuota; puoe Israel razhüchü nu la vorlie di uko kie di sie, “Sielie, Jihovae Midianko rüpfhünuo pete pie nie dzie nu shüwate.”

¹⁶ Sidi puo mia krie seko kezapie kro se chülie, di uko peteko dzie nu ketsü mu lipfhü kemethuo kha phreshü, mu lipfhüko nu mitu rei khashü,

¹⁷ puoe uko ki, “A meho toulie, di a chatha medzilie, ae razhüchüu carhuo nu volietuo, a kechü tuoi chülie.

¹⁸ Sidi a mu a ze ketuoko pete ketsüko khoushü tse, razhüchüu khie peteko nu nieko rei ketsü khou di hamhiei shieshülie, ‘Jihova la mu Gideon la,’ ishülie.”

¹⁹ Sidi Gideon mu mia krie puo puo ze ketuoko khisoteiluo rükhou sedekecü ki, tsiu rükhou kevalilie therieki vor razhüchüu tsolie; sidi ukoe ketsüko khoushü, mu uko dzie nu pieketuo lipfhüko biephroshü.

²⁰ Sitse kro seko pete rei ketsüko khoushü tsiu lipfhüko biephroshü, ukoe u dzie u vitsa pie mitu pie mu u zatsa pie ketsüko pie di khouketuo la, sidi uko shie di, “Jihova la mu Gideon la zhiecha!” sishü.

²¹ Ukoe mia puopuo u thuo u tha nu razhüchü houpfü thalie tse; Midianko pete melie shiekhoui di tavüta.

²² Ukoe ketsü krie seko khou phreshü tse, Jihovae Midianko chüpie uko bu zhiecha se huohuo bieta; rüpfhünuoko pete sita, sidi rüpfhünuoko tase Zereratsatie Bet-shita ketso nunu Tabat khieki Abel-mehola rie ketso vota.

²³ Siro Naftali nu Asher mu Manasseh pete nu Israelko kieshü, di uko Midianko whuo.

²⁴ Sitse Gideon-e dieliemia ketsepie Efraim kijüthou rüna pete nu shü di uko ki, “Ker di Midianko perhiecie, di Jordan rüu mu rücüko nu khaliecie tsiu Bet-bara ketso lieliecie.” Sidi Efraim themiako pete kieshü, di ukoe Jordan rüu nunu vo Bet-bara ketso lielieta.

²⁵ Ukoe Midianko krüta kenie Oreb tsiu Zib unie telie; uko Oreb tsiekrieu kinu Oreb dukhriwa mu Zib khubedzü kethechü kinu Zib dukhriwa. Ukoe Midianko whuo sidi ukoe Oreb mu Zib unie tsü pie Jordan khie kekreitsatie Gideon ki vor.