Capiko 6 - Angami Naga CL (Re-edited) Bible (BSI)

Gideon

¹ Israelkoe Jihova mhingu nu mha kesuo chüta, süla Jihovae uko khapie cie thenie Midianmia dzie nu shüwa.

² Siro Midiankoe Israelko mho kuolie, Israelkoe kijüthou kouko nu, tsiepfüko nu badiko chü di lhou.

³ Sizomonyü Israelkoe lie cieshü di lhou par ro, Midianko, Amalekko mu niathutsatie seyieko vor uko retataya.

⁴ Ukoe vor lie nu razhü chülie di chiebieko bie pesuo zo vo Gaza tso, tsiu tekuo, thudo mu gada rei Israelko la mhapuorei peshashü motaya.

⁵ Ukoe khor ro krapie kuprie tuoi di uko kiriko mu uko pfhekiko sa se khortaya; uko themiako mu utko rei phrü kekralie kenjü zotaya, sidi ukoe ler ro kijüu va votaya.

⁶ Midianko la Israelko bu kepfükecha chüta ru ukoe Jihova ki kekhruo cha di u mezhiemeloshü.

⁷ Israelkoe Midianko la Jihova ki rükhruoshü tse,

⁸ puoe siedzekesimia puo ketseshü, di uko ki, “Jihova Israel Kepenuopfüe puya: A Ijipt nunu nieko ze parshü, mu kedie kechü kijü nunu nieko ze parshü;

⁹ ae Ijiptmiako mu nieko kepeseko kinu nieko ze parshü. A nieko mhodzü nunu uko whuowa, di uko kijü pie nieko tsü;

¹⁰ tsiu a nieko ki, ‘Ae Jihova nie Kepenuopfü zo, mu nie uko kijü nu keba Amormia rhuoko rüsuo lho,’ si. Derei niekoe a die rünyü mote.”

¹¹ Tsiu Jihova dielieu tsur Ofra nu phriebo-u khro balie, süu Abiezritmia Joash vie, süki puo nuou Gideon-e Midianko therhie di khubedzü kethechü nu thoulha vü ba.

¹² Sitse Jihova dielieu puo pengushü di puo ki, “Jihovae n ze tuo zo, no terhümiavi kekuou,” isi.

¹³ Siro Gideon-e puo ki, “Derei kezhau, Niepuu hieko ze tuo zo üro, kiüdi mha hako pete hie gei vorta mu? Siro hie puonuokoe puo mhatho u ngoko pie hie kie di, ‘Ijipt nunu Niepuue u ze parshü mo üme?’ isiya. Di siro tsie we Jihovae hie khakegewa di hie bu Midianmia dzie nu tuote.”

¹⁴ Sitse Jihova rürei par di puo ki, “N gei kekuo keba pete se vo Midianmia dzie nu Israelko shüphraliecie, a thuo n ketseshüzhie ho,” isi.

¹⁵ Derei Gideon la sie, “He-i Niepuu, kimhie di a Israel kelalie vituo mu? A chienuo sü Manasseh yieko donu kecüthoe, mu a rei a kikru donu kecütho-u sa.”

¹⁶ Sitse Jihovae puo ki, “A n ze tuo zotuo, mu noe Midianmia pete pie mia puo tuoi uko bie phrewatuo.”

¹⁷ Ru Gideon-e sie, “Tsie a n mhinguki n neipfü ba üro, no a rüchükecü zasi puo kha a pengushücie.

¹⁸ A ngumezhie di a bu mha se vor n mhodzünu khashü kemochie thechü hanunu rüdita hiecie.” Puoe pucü, “No la vor kemochie a ba zotuo,” si.

¹⁹ Süla Gideon-e puo kinu le di temvünuo yopuo dukhripie chalie, mu thou efa puo, khreiüshükemo niekhrüda chülie; themuoko pie merha nu shülie, mu gadzü pie li puo nu shülie, sidi puoe süko se par phriebo-u khronu puo tsüshü.

²⁰ Sitse Jihova dielieu puo ki, “Themuo mu khreiüshükemo niekhrüdako pie tsiekrie hau gei shülie, di gadzü rupie süko gei shülie.” Puoe sükemhie chüshü.

²¹ Sitse Jihova dielieue kethe puo dzie nu ketuou tie pie themuo mu khreiüshükemo niekhrüdako kethushü; siru tsiekrieu geinu mi tu par di themuo mu khreiüshükemo niekhrüdako the pejüwa; süsie Jihova dielieu puo mhinguki nu ngu sa mota.

²² Gideon-e süu Jihova zo ücü si toulie tse, puo ngo di sie, “A khruohishücie, Niepuu Jihova! A sü mhotsou Jihova dielieu nguwate.”

²³ Derei Jihovae puo ki, “No keviu chülie, michie hie, no siatalie lho.”

²⁴ Süla Gideon-e sünunu Jihova la ruosuoba puo chüshü di süu zapie, “Jihovae vitho-uwe,” sishü. Süu thie ketso rei Abiezritmia rüna Ofra nu ba.

²⁵ Süzhüsü Jihovae puo ki, “N puo thudo kenieu, cie thenieketau selie, sidi n puo vie Baal ruosuobau bierhuowalie, di puo kiki kebau Ashera co-u wiwalie;

²⁶ sidi dahou hau mezü geinu Jihova n Kepenuopfü la ketsie pfhe kemenuopie ruosuoba puo chülie. Sidi no wikewa Ashera co-u pie seidi chülie di thelie, mu sügeinu thudo pie kethe ruosuo chüshücie.”

²⁷ Süla Gideon-e puo kituomia ker ze puo salie di Jihovae puo ki pukeshü tuoi chüwa, derei puo puo kinumiako mu rüna nu themiako keprei la, khinhie gei süu chü michie di theva geinu chü.

Gideon Baal Ruosuobau Pekakewa

²⁸ Rüna nu themiakoe khiserüna sier tse, ukoe Baal ruosuobau tsekezhü, mu sükhieki Ashera co-u rei wiwaketa, siro ruosuoba kesa puo chülie di thudo kenieu pie ruosuo khakeshü ngulie.

²⁹ Sitse ukoe huoniehuo ki, “Supuonie hau chüwa ga?” Uko hau ketsokega kevo ki, mia uko ki, “Joash nuou Gideon-e hau chüwe,” sita.

³⁰ Sitse rüna nu themiako vor di Joash ki, “N nuou ze parshücie, puo bu sia molie kenjü! Puoe Baal ruosuobau bierhuowa, mu Ashera co-u rei wiwaketa la.”

³¹ Derei Joash-e puo petsouketa peteko ki, “Nieko Baal la mia perhietieya me? Morei nie puo zhawhetieya me? Kehoupuorei puo la mia perhieyakezhau khiseyaluokecü nu puo bu siata zotuo. Puoe terhuo ketho puo üliro, puo ruosuobau bierhuowaketa la puo thuo puo la mia perhieliecie.”

³² Süla sünhie yawinu Gideon üse, Jerubal idi kieta, süu Joash-e “Baal bu puo thuo puo perhieliecie” iya, puoe puo ruosuobau bierhuowaketa la.

³³ Sitse Midianko, Amalekko mu niathutsa themiako pete vor kengulie, sidi Jordan cieparlie di Jezril Razhau nunu uko razhü chü balie.

³⁴ Siro Jihova ruopfüu Gideon gei vorlie; mu puo ketsüu khoushü, sidi Abiezritko kie di puo siemedzilienushü.

³⁵ Puoe dieliemia ketsepie Manasseh kijü pete nu shü, di uko bu puo siemedzilienushü. Puoe dieliemia ketsepie Asher, Zebulun mu Naftali nu rei shü, mu uko rei puo ze kesiedzituoü kho.

³⁶ Tsiu Gideon-e Ukepenuopfü ki, “No pukeshü tuoi, a dzie geinu Israel kelashütuo üro, n kepu tuoi

³⁷ ae tekuo mie bepie sieu nu khapie zhütuo; mu tekuo mie gei thezei va mu kijü pete gei sophre bakecü sie, noe pukeshü mhiei a dzieu pie Israel kelalietuo ükecü silietuo.”

³⁸ Sitse sükemhie tou chüta. Gideon-e süsieduü rüna sie di tekuomieko theshü ru tekuo mie geinu thezei khou puo tshulie kevi thelie.

³⁹ Siro Gideon-e Ukepenuopfü ki, “A gei n nou meyieta hiecie, a bu va puo tekuo mie pie dojü lashücie; tsieu va tekuo mie rübei gei so, mu kijü pete thezei bu zhüliecie.”

⁴⁰ Siro süzhü Ukepenuopfüe sükemhie chüshü. Süsieduü tekuo mie rübei so mu kijü pete gei thezei krüta.