Capiko 5 - Angami Naga CL (Re-edited) Bible (BSI)

Debora Tsaliu

¹ Sünhie Debora mu Abinoam nuo Barak unie-e tsali hau kelishü:

² Jihova tsheliecie! Israelko thethochü di kegeikeshüko la, u thuo u nei siei di u khakeshüko la!

³ “Rünyüliecie, he-i kediko; nie nyie kedeishücie, he-i kedinuoko, a Jihova ki kelishütuo, a tsali khoupie Jihova Israel Kepenuopfü ki shütuo.

⁴ “O Jihova, no Seir nunu tuo prakeshü nhie; no Edom kijü nunu tuokeshü nhie, kijü shükenieshü, mu teiko rushüwe, kimhouko dzü perushü ketho.

⁵ Jihova mhodzünu kijüthouko rünieta, Sinai Jihovau, Jihova, Israel Kepenuopfü mhodzünu.

⁶ “Anat nuou Shamgar kelhou teiki, Jael kelhou teiki, chadiko nu rüve kroko tuo mota, rüvemiako chatseko nu tuota.

⁷ Israel nu liekecieko kruo miemieta, uko mhavakelieko nunu luolie, Debora, no siercü la, Israel krüpfü mhie di sier.

⁸ Terhuo kekrei kedata tse, nadiu kharuko nu terhü tuota, Israelmia nyie hiedia donu pezhü morei rüngou kese ngu me?

⁹ Israel terhü krütako kitsa, a meloue tuote, u mianyü chü u phou khakeshü la, Jihova tsheliecie!

¹⁰ “Pushülie: nie gada kekra gei kebako, nie phikhra kevi gei kebako, nie cha ze ketuoko.

¹¹ Dzüükecü thechüko nu, tsali kechü pfhe, Jihova kuokelie dze pu lashükecü, Israel nu puo liecieko kuokelie. “Sidi Jihova themiako nadi kharuko nu zotsu.

¹² “Colie, colie, Debora! Colie, colie, tsali puo kelishülie! Sielie, Barak, no teze ketuo diemiako zetacie, he-i, Abinoam nuou.

¹³ Sitse pehümia baluocüko tha zo tsu; kekuoko perhietuoü Jihova themiakoe tsu.

¹⁴ Efraim nunu ukoe razhau nu tsu, n siemedzi di, Benjamin, n yieko sa di; Makir nunu terhü krütako tha tsu, mu Zebulun nunu kezhamia the kepieko tha tsu.

¹⁵ Isakar nu kezhako, Debora ze vor, mu Isakar-e Barak gei diethoshü di; puo sie nu unie kedzükri razha nu tsu. Reuben yiemiako donu we, u melou nu u ketso phita.

¹⁶ Kiüdi nieko mia sie nu tekuokroko ze bata ga? Tekuoko kekie pfhe rünyütuo üdi me? Reuben yiemiako donu u melou nu u ketso phita.

¹⁷ Gilid-e Jordan khie kekreitsa bata; mu Dan, no kiüdi rouko ze bata ga? Asher-e dzükezha khie bata, sünu rülei chü nu bata.

¹⁸ Zebulunkoe kesia krenyücü themia; mu Naftali rei sa, rüyachü nu.

¹⁹ “Kediko vor, ukoe terhü chü; süsie Kanan nu kediko ze terhü chü, Tanak nu, Megido dzüthou khieki nu; derei uko rakachü puorei valie mo:

²⁰ Themvüko teigei nu terhü chü, uko chako nu Sisera perhie.

²¹ Kishon dzükru kere uko zoupfüta, dzükrue, Kishon rüu dzükru. Tuoshülie, a ruopfü, metei zo di.

²² “Sitse kierko mouko pfhe meyie phita, puo kierko phitha prou rüthe ketsu ki.

²³ “Meroz rüsewaliecie, Jihova dielieue puya, puo themiako rüse pesuowacie. Kekreilamonyü ukoe Jihova kekhruohiu nu vor kemo la, Jihova kekhruohiu nu kekuoko petsou kemo la.

²⁴ “Jael bu ruokuothopfü chücie, Kenmia Heber kimiapfü; pfheki nu kelhou ruokuothopfü.

²⁵ Puoe dzü cha ru, puoe thunudzü pie puo tsü; Therhu khou nu thunudzükhie se vor puo tsü.

²⁶ Puo dzie pie pfheki kezhieu theze, puo zatsa pie metevü pielie, puoe Sisera kepfhüshü, puoe puo tsü vütshieshü, puoe puo tsü vütshie mu puo nyieti zephawa.

²⁷ Puoe rületa, puo tetsuta, puo hapfü phi nu mele mo zhüta; puo phi nu rületa, puo tetsuta; puo tetsuketa kinu, puo siata.

²⁸ “Khirki nu puoe mehoshü, Sisera-nuo zuoe dorü mhitsiekou nu meho di, ‘Kiüdi puo kierbagei vor menuota mu? Kiüdi puo kierbagei pfheko si mo haita mu?’

²⁹ Mhakesitho puo zepfüko puo die kelashü, ketho, puo thuo puo die kela di:

³⁰ ‘Uko terhü mhavako ngulie mo di kezalie mo bate me? mia puo la rüümia puo morei kenie; Sisera la thikeliepfhe kezivi, mu u vo gei keshü la khuthu rütso vie, kenie haha pete terhü mhava khuthu rütso ütuo me?’

³¹ “Süla n ngumvümiako pete bu ka phretacie, he-i Jihova! Derei n khriethoko bu we, niaki thukesier puo ratsatho ki tuoi zoliecie!” Sidi kijüue teicie hiedia mene balie.