Capiko 4 - Angami Naga CL (Re-edited) Bible (BSI)

Debora mu Barak

¹ Ehud se sie, Israelkoe Jihova mhinguki mha kesuo chü lata.

² Süla Jihovae uko zepie Hazor nu di keba Kanan Kediu Jabin dzie nu shüwa. Puo rüpfhünuo mhokezhau Sisera, süue Haroshet-ha-goim nu ba.

³ Jabin-e thegi bagei krie thepfü ba mu puo zho suo se di cie mepfü Israelko pese vor, süla Israelkoe Jihova ki kekhruo cha mu meloshü.

⁴ Siro sükisü Debora, Lapidot kimiapfü siedzekesi chü di Israel capi chü ba.

⁵ Puoe Efraim kijüthou rüna nu Rama mu Bethel unie donu kukuobo puo khro baya, sidi Israelko bu puo capi pfhü puo ki khorya.

⁶ Puoe Naftali nu keba Kedesh rüna nu Abinoam nuou Barak kelieshü di puo ki, “Jihova, Israel Kepenuopfüe n ki puya, ‘Tuo volie di Naftali mu Zebulun unie themia nyie ker ze n salie di Tabor Kijüthou gei volie.

⁷ Sitse ae Jabin rüpfhünuo mhokezhau Sisera meshü ze parshütuo, sidi puo bu puo kierbageiko mu rüpfhünuo krodi ze par Kishon Rüu nu shü di khapie n dzie nu shütuo,’ ” sishü.

⁸ Barak-e puo ki, “No a ze votuo üro a votuo, derei no a ze vo lho üro a volie lho.”

⁹ Sitse hapfü sie, “A n ze votuo, derei noe hakemhie di votuo üketa la, kuokelie theza keviu n vie chülie lhote, Jihovae Sisera pie thenumiapfü puo dzie nu shüwatatuokecü la.” Sidi Deborae sie di Barak ze Kedesh nu kho.

¹⁰ Siro Barak-e Zebulun tsiu Naftali seyieko kiepie Kedesh nu shülie mu terhümiavimia mia nyie ker pie puo salie di kho, mu Debora rei puo ze kho.

¹¹ Tsiu Kenmia Heber-e vo Kedesh khieki Elon-bezananim nu keba phriebo-u khieki nu puo razhü chülie. Puoe Mosa meiu Hobab yie Kenmia kekreiko khawa di tuo kreita.

¹² Abinoam nuou Barak-e Tabor Kijüthou gei khota ükecü Siserae silie tse,

¹³ Siserae puo thegi bagei kriethepfüko mu puo themiako pete kieshü, di Haroshet-ha-goim nunu Kishon Rüu nu vo.

¹⁴ Sitse Deborae Barak ki, “Sielie, Jihovae n ze tuotuo, mu thie Jihovae Sisera penyüpie n dzie nu shüwatuo,” sishü. Süla Barak-e Tabor kijüthou geinu themia nyie ker ze di puo siemedzi tsu.

¹⁵ Siro Barak-e puo rüpfhünuo ze uko bievü tse, Jihovae Sisera mu puo bageiko tsiu themiako pete chüpie kebvükebie phrewa; siro Sisera puo bagei geinu kerlie di pephi tata,

¹⁶ derei Barak-e bageiko mu rüpfhünuoko whuo zo tsu Haroshet-ha-goim tso. Sidi Sisera rüpfhünuo krodi pete geiwa, miapuorei lhieshü mo.

¹⁷ Siro Siserae pephi tase Kenmia Heber kimia Jael pfheki nu lelie, kekreilamonyü Hazor nu Jabin Kediu mu Kenmia Heber kinumiako donu kezekevi bakecü la.

¹⁸ Jael-e Sisera ze kesetuoü par di, puo ki, “Lerliecie, a niepuu, michie hiecie,” ishü. Süla puoe tuo lelie, sitse Jael-e pfhe pie puo whewa.

¹⁹ Siru puo hapfü ki, “Dzü pie a bu kriecie, a terhüte,” isi. Ru puo chüzhü nu mithunudzü rupie puo bu krielie di puo whe lawa.

²⁰ Siro puoe hapfü ki, “No pfheki kikha ki thalie, di themia kehoupuo vor n ketso di, ‘Mia huo hanu ba me?’ iro, no ‘Molie,’ iwacie,” sishü.

²¹ Siserae puo kenyiepfü ze pesou phi zhüta tse Jael-e pesikhuoi di puo pfheki kezhie seithie mu seivü pielie di pie puo nyieti nu zhietsu kijü tsowa, sitse puo siata.

²² Tsiu Barak-e Sisera whuo vor tse, Jael-e par puo ze kese di puo ki, “Haki lerlie, no puo pfhü ketuou pie n pekieshütuo.” Süla puoe le ru Sisera sü kijü nu siazhü di ngulie, mu pfheki kezhie seithieu rei puo nyieti nu zhiepfüzhü.

²³ Sünhie Ukepenuopfü Israelko bu Kananmia kediu Jabin mho kuokelie khashü.

²⁴ Ukoe Kanan kediu Jabin peka tseiwa kemochie puo pesüpemvü di kuo miemieta.