Capiko 21 - Angami Naga CL (Re-edited) Bible (BSI)

Benjaminko Nupfünuo Pfhükecü

¹ Israelkoe Mizpa nu vor kengulie di Jihova ki, “Úko u nuonuo thenu puorei pie Benjaminko ki penyilie lho zo,” idi rüseshü.

² Mu themiakoe Bethel nu vorlie di sünhie thevatie ketso Ukepenuopfü mhodzünu ba di kra shiekhoui bata.

³ Ukoe sie, “O Jihova, Israel Kepenuopfü kiüdi thie Israel seyie nu seyie puo pejüwaketuo hau vorta mu?” ita.

⁴ Süsienhie themiakoe rüna sielie di ruosuoba puo chülie di kethe ruosuoko mu vitho ruosuo khashü.

⁵ Siro themiakoe sie, “Israel seyie nu supuo Jihova mhodzünu vor kengu mota ga?” Kekreilamonyü ukoe kehoupuorei Mizpa nu Jihova mhodzünu vor kemo-u bu “Sia zotuo” idi rüsewaketa la.

⁶ Siro Israelkoe uko siezedzürie Benjaminko la u nousuolie di sie, “Thie Israel nu seyie puo dathewate.

⁷ Tsie rhei baluocü nupfünuoko la kedipuo chü ro vi ta? Kekreilamonyü we u nuonuoko pie uko ki penyilie lho ükecü Jihova mhodzünu rüsewate eru.”

⁸ Siro ukoe sie, “Thie Israel nu seyie kiu Mizpa nu Jihova mhodzünu vor mota ga?” Sitse Jabesh-gilid themiako miapuorei kehou nu vor mocü ngulieta.

⁹ Ukoe themiako pfhükesie nu Jabesh-gilid themiako puorei tuo kemo ngulieketa la.

¹⁰ Süla kehoue themia kethepfutho nyie kerekenie ketsepie Jabesh-gilid nu shü di uko ki die hakemhie khashü, “Vo di zhiecha pie Jabesh-gilid nu kebako thenumia rei mu nhicumia rei bie phrewalie.

¹¹ Niekoe hakemhie chütuo idi uko ki: Vo di thepfumia mu thenumia thepfu zezhüwaketa pete dukhriwalie.”

¹² Siro ukoe Jabesh-gilid nu kelhouko donu rüünuomia phouse zocü mia krie dia ngulie. Sidi ukoe süko ze Kanan kijü Shilo razhüchü nu vorta.

¹³ Süsie kehouue pete vitho die ketsepie Rimon tsiekrie nu keba Benjaminko ki shü.

¹⁴ Sitse Benjaminkoe la vorlie mu Jabesh-gilid thenuko perhei sekebako pie uko tsüshü, derei süko uko la tso mota.

¹⁵ Siro themiakoe Benjaminko la unoumezhielie, kekreilamonyü, Jihovae Israel seyieu shüphrowaketa la.

¹⁶ Sitse kehou nu phichükoe sie, “Benjamin nu thenuko dukhri phrewate eru uko kimhie di thepfu rhei baluocü nupfünuoko la kedipuo chü ro vi ta?”

¹⁷ Sidi ukoe sie, “Rhei baluocüko la kayie pejülie kenjü, süu Israel nu seyie puo pejü tseiwa molieketuo la.

¹⁸ Derei úko we u nuonuoko pie uko ki penyilie kenjü, kekreilamonyü Israelkoe Benjaminmia nupfünuo khapie ketsüu bu rüsepfücie,” idi rüsewaketa la.

¹⁹ Siro uko la sie, “Harie, Bethel mhotsa mu Bethel nunu Shekem nu kekho chadiu niathutsa mu Lebanon pekhrotsa keba Shilo rüna nu teiciekepra Jihova la thenyi puo babaya.”

²⁰ Süla ukoe Benjaminko tarho di uko ki, “Nieko vo di khubelieko nu la di pfhe balie,

²¹ sidi Shilo nu rüünuoko nashütuoü par ro, khubelieko nunu pra di Shilo rüümia nieko tse telie di nie nupfünuo chüketuo la ze Benjamin kijü nu votaliecie.

²² Siro uko puonuoko mu uko prünuoko hieko gei panya vor ro, hieko uko ki, ‘Hieko la uko ngumezhiewaliecie, kekreilamonyü hiekoe uko nupfünuo la terhü nu uko tse telie mote mu nieko rei nie thuo pie uko tsükeshü puo mo, moliro nieko rei rüseu nu jotatuomuü,’ siwatuo.”

²³ Süla Benjaminkoe sükemhie chülie; di nashüko donunu uko nupfünuo chüketuo la uko tse telie di ze vota, sidi ukoe uko kayie kijü nu la vorlie mu uko nadiko chü lalie di sünu balie.

²⁴ Siro Israelkoe thechü sünunu tuose u thuo u seyie u thinuo mu u kayie kijü nu la vo phreta.

²⁵ Süki Israel nu kedi tuo mo; mu kehoupuorei puo thuo puo mhodzüki mezhü ükecüu chü tuo zo.