Capiko 20 - Angami Naga CL (Re-edited) Bible (BSI)

Israelko mu Benjaminko Terhü kechü

¹ Siro Dan nunu Beersheba ketso mu Gilid kijü nu rei sa di Israel themia pete kro puo chü parlie, sidi Mizpa nunu Niepuu mhodzünu mechükehou balie.

² Sidi Israel seyie pete nu krütako mu themia pete vor Kepenuopfü themiako mechükehouu nu thalie, süko pete zhiecha kepie mia lakh dia,

³ (Benjaminko rei Israelko Mizpa nu khoketa si bata.) Tsiu Israelkoe sie, “Mha kesuo hau kedipuo mhie di parta ga? Hie ki pushücie.”

⁴ Sitse siaketapfü nupfu Leviue sie “A Benjamin kijü Gibia nu sozhü chütatuo üdi a pelipfü ze vorlie,

⁵ ru Gibia themiako a petsouta di theva vo a keba kiu houlie mu a dukhrikewa leta. Mu ukoe a pelipfü ze vo shükhriwa.

⁶ Sidi ae a pelipfü mo-u pielie di khrie petsepie Israel seyie keba kijü pete nu shü, ukoe Israelmia donu mha kesuo mu kerütsekecü mhatho puo chüketa la.

⁷ Süla tsie, nie Israelko pete rei hau la kedipuo chütie shiü nie kele mu mhasi pushüi.”

⁸ Sitse themia hako sielie di diepuo chü di sie, “Úko mia puo bu rei puo pfheki nu morei puo kinu rei la volie lho.

⁹ Sidi úko Gibia gei hakemhiei chütuo, úko dape di themia huo bu kho Gibia bietuo.

¹⁰ Siro Israel seyie pete nu mia krie puo nu mia ker, mia nyie puo nu mia krie puo, mu mia nyie ker nu mia nyie puo zelie di rüpfhünuoko la kecüca kesetuo. Sidi rüpfhünuoko Benjamin rüna Gibia nu vorlie tse uko bu Gibia themiako Israel nu kerüzhü mhatho kechü zhakhra chüshü uko gei shütuo.”

¹¹ Sidi Israelmiako pete nadiu perhieketuo la kengulie, di keze puo chülie.

¹² Siro Israel seyieko themia ketsepie Benjamin seyieko pete ki shü di sie, “Nieko donu kerüzhü mhatho kikecüpuo chüta ga?

¹³ Tsie Gibia nu themia kerüzhü kechüko khapie hie dzie nu shüwalie, sidi hie bu uko dukhriwa di Israel nu kerüzhü pejüwalie.” Derei Benjamin themiakoe uko siezedzürie Israelko pfhe rünyü mota.

¹⁴ Sidi ukoe Israel ze kegeituoü uko nadiko nunu vor Gibia nu kengulie.

¹⁵ Mu khunhie nu Benjaminkoe zhiecha kepie mia nyie mepfüesorou kengulieta, sizomonyü Gibia nu kelhou themia kedakelie mia krie thenie salie.

¹⁶ Themiako pete donu kedakelie krie thenie sükosü pevidzie di tsiedeiro geinu ketsie kedeipie thaprü puorei vajowaya kemomia phre hu.

¹⁷ Mu Benjaminko sa kemo Israelko rei zhiecha kepie mia lakh dia, hako pete terhü themia phre.

¹⁸ Israelkoe Bethel nu kholie di Ukepenuopfü medo rüsa di sie, “Benjamin nuoko ze kegeiketuo la hieko thinuo kiu bu kho rietuo ga?” Sitse Jihovae, “Juda yieko bu kho rietuo,” sishü.

¹⁹ Süla süsieduü Israelkoe khise sielie di Gibia kepenuo kinu razhü chü balie.

²⁰ Sidi Israelkoe Gibia nu Benjaminko ze terhü chütuoü dojülie.

²¹ Sitse Benjaminkoe Gibia nunu par di sünhie rüyachü nunu Israel themia nyie mepfüekenie geiwa.

²² (23) Sitse Israelmiakoe kho di Jihova mhodzünu thekrü chü zo ba theva tso di Jihova ki, “Hieko bu hieko siezedzürie Benjaminko ze terhü chü laketuo la khotuo mo lho ga?” Ru Jihovae uko ki “Kho uko perhiecie.”

²³ (22) Süla Israelkoe thepfu lalie di kerie nhie tuoi terhü chüketuo la thechü nu vo dojü lalie.

²⁴ Sidi zha kenie nhie Israelkoe Benjaminko ze terhü chütuo üdi kho.

²⁵ Derei hanhie rei Benjaminkoe Gibia nunu uko petsou par di Israelko mia nyie kerethetha gei lawa, süko pete zhiecha kepie themia phre.

²⁶ Sitse Israelmiako pete Bethel nu kholie di Jihova mhodzünu kra mu mevo ba thevatie tso; siro kethe ruosuo mu vitho ruosuo khapie Jihova tsü.

²⁷ Sidi Israelko Jihova medo rüsa lashü (süki Ukepenuopfü dietseidiekhobouu sünu ba,

²⁸ mu Aron nuou Eliazar nuo Finehas süki tha di lietho chüya), ukoe sie, “Hieko bu kho hie siezedzürie Benjaminko ze keperhie latuo mo lho ga?” Sitse Jihovae sie, “Nieko kholie, sodu we a uko khapie nieko dzie nu shüwatuocü la.”

²⁹ Süla Israelkoe rüshü vo di Gibia houpfü balie.

³⁰ Ukoe sidi zha se nhie Benjaminko bietuoü kho, sidi hadzü kemhie Gibia petsou di dojü balie.

³¹ Sitse Benjaminkoe uko petsou par, sidi nadiu ze kepecie vota. Uko kekrei ki tuoi chaü nu Israelko whuovü mu dukhri ivota, sidi Bethel kekho chau nu mu Gibia kekho chau nu icü Israelko mia ser dukhriwata.

³² Sidi Benjaminkoe “Thie rei kerieu va tuoi uko penyüwatie,” itha tse, Israelkoe sie, “Uko tashü di uko meshü ze chadiu nu pralie khe,” itha.

³³ Sidi Israelko pete u chü nunu sielie di Baal-tamar nu dojüpfü balie. Siro Gibia niakratsa nu rüshü keba Israelko rei ta parlie.

³⁴ Siro sidi Israelko rei kedakelie mia nyie kerko sie Gibia petsoulie. Terhü re seta, derei Benjaminkoe kepeka uko penuo baketa lelie mota.

³⁵ Jihovae Israel mhodzünu Benjaminko penyüshü, mu sünhie Israelko Benjaminko mia nyie mepfüepengou di krie puo dukhriwa mu hako pete zhiecha kepiemia phre.

³⁶ Sügeinu Benjaminkoe mialhoketa ngulie. Israelko Gibia bieketuo la uko themia keviepie kebako pele di Benjaminko cha perieshü.

³⁷ Mu themia rüshü kebako vapuochü par Gibia relie, sidi zhiecha pie nadiu nu keba pete biewa.

³⁸ Israelko mu rüshü kebakoe kedova kebau sü, nadiu nunu mikhu kezha puo bu siertuo,

³⁹ sitse Israel pete rürei la vorlie di terhü chütuo, isi pie ba. Siro Benjaminkoe Israelmiako whuovü mu dukhrivü di mia ser geiwa, sidi ukoe sie, “Rütho kerieu mhiei tsieu va rei penyüliete,” isie.

⁴⁰ Derei nadiu nunu mikhu sieta tse, Benjaminkoe rürei la vor meho ru, nadiu pete mikhu chü teigei khoketa ngu.

⁴¹ Siro Israelko rürei la vor uko petsouta tse Benjaminko kedethewata; kekreilamonyü ukoe kepekau penuo batakecü la.

⁴² Süla ukoe Israelko mhodzünu tase rayha vavü, derei uko terhü therhielie kenjüta. Mu Israelko rünako nu parlie di uko bievü.

⁴³ Ukoe Benjaminko houlie, di uko whuo zo vo Gibia niathutsa tso, mu cha nu uko dukhri vo tso.

⁴⁴ Sidi Benjamin themia nyie kerethetha geiwa, mu hako pete rei terhümiavimia phre.

⁴⁵ Siro Benjaminkoe rüreise ta rayha nu lelie di Rimon tsiekrieutsa vo, mu cha nu Israelko bu mia nyie pengou biewa. Siro Israelkoe kekreiko whuo zo Gidomtsa vo di mia nyie kenie dukhriwa.

⁴⁶ Sidi sünhie Benjaminko biekewa pete kesa zhiecha kepie mia nyie mepfüepengou, hako pete rei terhümiavimia phre.

⁴⁷ Derei mia krie sorou we rüreilie di tase rayha nu Rimon tsiekrieu nu vota, di khrü dia sünu bata.

⁴⁸ Israelmiako pesie vo Benjaminmiako petsouvü, di zhiecha pie uko pete siro khunuo rei mu kekreiko rei ngukelie pete biewa. Sizomonyü uko kevo rünako pete mi pie thewa.