Capiko 18 - Angami Naga CL (Re-edited) Bible (BSI)

Mika mu Danmiako

¹ Süteiki Israel nu kedimia tuo mo; tsiu Dan seyiekoe uko thuo lhou baketuo la kijü puo pfhü ba, Israel donu süketso rei kijü uko ya chüshü mo zoluokecü la.

² Süla Danmiakoe uko seyie pete donu Zora mu Eshtaol nunu kethepfu mia pengou kedalie di uko bu kijüu pfhü mu rieshünu di uko ketseshü. Dankoe uko ki, “Vo kijü rie menuoshülie.” Sidi uko Efraim kijüthou rünau gei vorlie tse Mika kinu le balie.

³ Ukoe sünu bacü ki Levimia khriesau diepu silieta, süla ukoe puo ki vo di, “Supuo n ze vorshü ga? No haki nu kedipuo chü ba ga? Kiüdi haki bata mu?”

⁴ Sitse puoe uko ki, “Mika mha luuhau a la keseshü, mu a zhakhrü pie a bu puo zievo chü batelie.”

⁵ Ukoe la sie puo ki, “Hieko rüve hau puotoulie tuo mo mo shiü Ukepenuopfü medo ketsoshücie.”

⁶ Sitse Zievo-ue uko ki, “Jihova mhi-e nieko rüve gei ba zo, nie nou mene di tuo volie.”

⁷ Sitse mia pengoukoe tuo lashü di Laish nu vorlie. Siro uko themia süko khrukhre phi di lhou keba ngushü, Sidonmia tuoi sei mu zei-i, tsiu kemichie keprei jü, siro kishükinyi u kelhuo chü di lhou keba ngushü. Sükoe Sidonmia kinu kepecie phita mu miapuorei ze keperokecü ba mo.

⁸ Siro mia pengoukoe Zora tsiu Eshtaol nu la vorlie tse, uko themiako sie, “Nieko kedipuo si mu ngushü ga?”

⁹ Sitse ukoe sie, “Úko sielie di Laish bie khe, hieko vo kijüu nguwate mu vi se zo, haki nu menyho thata hie di le pevielie khe.

¹⁰ Nie sünu le ro, themia jüdziecü kro puo ngutuo, mu kijüu rei zha phi zo, siro sünusü mha ketsopfhü puorei kejü kijü, vi rükrücü puo Ukepenuopfüe kha nie dzie nu shüshüta zo.”

¹¹ Süla Danmia mia krie sorou u rünyie dojüse di Zora mu Eshtaol nunu tuoshü;

¹² sidi ukoe khokezhü ki Juda nu Kiriat-jearim nu razhü chü di balie. Süla thie ketso rei Kiriat-jearim niakratsa thechü hau üse Mahane-dan razhüchü üdi kieya.

¹³ Uko sünunu Efraim kijüthou rüna nu vorlie di Mika kinu vo balie.

¹⁴ Sitse rünau (süu Laish) rücietuoü di mia pengou prakecükoe sie uko seyieko ki, “Niekoe ki hako puo nu efod puo, terafim, siro kepie kechü mu lhopie kechü terhuorhi bakecü si nhie? Mu kedipuo chütie shi leliecie.”

¹⁵ Sitse uko rüreise Leviyiemia khriesa zievo-u kebachü Mika kinu volie, sidi puo kelushü.

¹⁶ Sükisü Danmia krie sorouko terhü la rünyie kesepfü di nadiu kharu kiki tha.

¹⁷ Tsiu mha kerücie mia pengouko tuo mezhü kiu nu lelie di rakachü pie kenhekecü terhuorhi mu efod, tsiu terafim rei chü pielie. Süki zievo-u rei kharu nu rünyie kese krie sorouko ze tha.

¹⁸ Siro themia hakoe Mika kiu nu le di miarhiko, efod mu terafim siro lhopie kechü miarhiko pie vor tse, zievo-ue uko ki, “Nieko kedipuo chütieya ga?”

¹⁹ Siru uko sie puo ki, “Kemekrietalie, die puorei pu hie, sidi hieko ze volie, hie zievo chü, mu hie krü chütalie. Noe mia puo kikru la zievo kechüu vikuo mo, Israel seyie puotsanuo puo la zievo chükecüu vikuotuo shi?”

²⁰ Zievo-ue hako sishü puo neita, sidi puoe kinu efod, terafim mu terhuorhiko pielie di themiako ze vota.

²¹ Sidi ukoe nhicu kecünuoko, kiriko mu mhanyako pie uko mhodzünu shülie di tuo la vota.

²² Mu ukoe Mika ki nunu tuo petse vota tse Mikae puo zanuoko kielie di Danmiako whuo vor di uko tsolie.

²³ Sidi ukoe Danmiako kie shiekhouishü ru, ukoe rürei la vor puo ki, “Kedipuo la n noumeca di themia hade ze vorzhü ga?”

²⁴ Ru puoe sie, “Nieko a chüpie keba a rhuoko chülie, mu a zievo-u rei zeta, di kiüdi, ‘Kedipuo la n noumecaya mu? ilietuo ga?’ A cüsie kedipuo ba sa ta?”

²⁵ Sitse Danmiakoe sie puo ki, “No melieshü di mia huo nou chü kemeyielie ro, no rei mu n kinuko pete siatuo.”

²⁶ Süsie Danmiakoe tuo zo vota, mu Mikae themia hako puo la kuothorcü ngushü tse, rürei la puo kinu vota.

²⁷ Sidi Danmiakoe Mika chüpie keba vienyako mu zievo-u zelie di mekriemeza kemo nadiu Laish nu themiako sei mu zeicüko ki vorlie di zhiecha pie uko bievü, siro mi pie uko nadiu rei thewa.

²⁸ Süu Sidon ze kepecie phi, mu miapuorei shüphrakeshü jü, süla miapuorei uko ze keperokecü tuo mo, süsü Bet-rehob razhau nu ba. Ukoe nadiu chü lalie, di sünu bata.

²⁹ Ukoe süsie nadiu za tho kedipie uko puotsau Israel nuou Dan zanu chülie, hadzü we nadiu za Laish.

³⁰ Danmiakoe terhuorhiko uko thuo uko la khapie balie. Mu Mosa nuo Gershon nuou Jonathan mu puo nuo thepfuko we Dan seyieko nu zievo chü zo vor di kijüu mia bu liekelie tso.

³¹ Sidi ukoe Kepenuopfü kiu Shilo nu keba chie Mikae chükeshü terhuorhiko pie sünu ba tso.