Capiko 17 - Angami Naga CL (Re-edited) Bible (BSI)

Mika Terhuorhiko

¹ Tsiu Mika ükecü mia puo Efraim kijüthou rüna nu lhou tuoya.

² Ru puoe puo zuo ki, “N kinu rakachü krie kerepuokrü chükelie mu süu la kerüguu rüsekeshü, siro a nyie kinu rei süu dze pu kebau, harie rakako a dzie nu ba, mu a pielie zo, derei a tsie süu pie n tsü lawatuo.” Sitse puo zuoe sie, “A nuo, Jihova bu japie n tsücie,” ishü.

³ Siro puoe rakachü krie kerepuokrüko pie puo zuo tsü lashü. Siru puo zuoe sie, “Rüseu bu a nuou gei vor moketuo la a a thuo a dzie se rakachüko khapie Jihova tsüshüyawe, pie terhuorhi chüketuo la, süla tsie hako pie n tsü lashüzhie,” isi.

⁴ Puoe rakako pie puo zuo tsü lashü tse, puo zuoe raka krie kenie chüpie rakachü rükreiu tsüshü, süue pie terhuorhi chü. Sidi pie Mika kinu khapie bawa.

⁵ Siro Mika ükecüue rüsuoki puo nyi mu puoe efod puo mu terafim puo chülie di puo nuo thepfumia puo pie zievo chüpie sünu bawa.

⁶ Süteiki Israel nu kedi tuo mo; mu themia kehoupuorei u thuo u mhodzüki mezhü ükecüu chüya.

⁷ Tsiu hateiki Juda rüna Bethlehem nu Juda khriesamia, Levi nuomia puo sünu lhou tuoya.

⁸ Tsiu puoe Juda rüna Bethlehem khawa di vo thechü ngukeliera batatuoü tuo; puoe rüve Efraim kijüthou rüna nu vorcü ki Mika kinu vorlie.

⁹ Sitse Mikae puo ketso di, “No kirapuo nu vorzhü ga?” Ru puoe sie, “Ae Juda rüna Bethlehem nu kelhou Levimia puo, mu a thechü ngukeliera batatuo üdi pfhü vorzhülie.”

¹⁰ Sitse Mikae puo ki, “A ze batalie, di a krü mu a zievo chütalie, silie ro a cie puo nu raka ker tsiu n la pfhemenei, siro cava sa kha n tsütuo.”

¹¹ Sitse Levi nuoue Mika ze batatuoü pfhekholie mu puoe puo nuoko puo mhiei tuota.

¹² Siro Mikae Leviu kenyülie, sidi khriesau pie puo zievo chülie, sidi puo Mika kinu bata.

¹³ Sitse Mikae sie, “Tsie we Jihovae a chü penyipekuoshüketuo a site, ae Levimia puo bu a zievo chülieketa la,” isi.