Capiko 15 - Angami Naga CL (Re-edited) Bible (BSI)

Samson Filistinko gei Puo Khepukecü

¹ Süsie pecha ba mo di thoulha kere teiki, Samson-e temvünuo yopuo pielie di puo kimia ze keseshütuoü vo. Puoe sie, “A a kimia kibou nu letuolie,” sishü. Derei puo puoe puo bu le mvüta.

² Hapfü puou sie, “A we no puo ngumecü kethota ücü le tou bata ze, süla a puo pie n zeu tsüwate. Puo siezepfü puo ki ngu zivikuo mo me? Puo sou nu puo siezepfü lielietacie.”

³ Sitse Samson-e uko ki, “Tsieu va we a Filistinko gei kelhie mhatho chüshü rei kejo-u a tsügei mo ho,” sita.

⁴ Samson-e pra di meseru krie se telie, di kenienie di uko mei pele phrewa, puoe sidi mitukhro puopuo pie kenie mei donu phashüshü.

⁵ Sidi mi pie mitukhroko theshü di meseruko khapie Filistinko lie nu chiebie pete, mu oliv zieko rei the phrewa.

⁶ Filistinkoe ketso di “Supuoe mhatho hakemhie chüshü ga?” ru ukoe sie, “Timna nyau Samson ücü silie, kekreilamonyü Timnae Samson kimia pie Samson zeu tsükewa la.” Süla Filistinkoe khor di Timna mu puo nuopfü unie thekhriwa.

⁷ Sitse Samson-e uko ki, “Nieko haikecü sie, a nieko gei a khepulie kemochie khawalie lho,” sishü.

⁸ Mu puo puorhie suo di uko perhie di themia kekra dukhriwa. Sidi puoe tsu Etam tsiepfü puo nu bata.

Samson Filistinko Penyükewa

⁹ Sitse Filistinkoe khor di Juda nu uko razhü chülie, sidi Lehi rünau re.

¹⁰ Ru Judamiakoe uko ki, “Nieko kidi khor hieko reya ga?” Ukoe sie, “Hiekoe Samson tepie phalietuo üdi khorlie, puo hieko gei chükeshü tuoi, puo gei chüshütuo üdi.”

¹¹ Sitse Juda nunu mia nyie se Etam tsiepfüu nu tsu di Samson ki, “Filistinko u mho kedi chü bacü no si mo me? No hieko gei kedipuo chüshüta ga?” Ru puoe sie, “Ukoe a gei chükeshü tuoi uko gei chükeshü zo.”

¹² Sitse ukoe puo ki, “Hiekoe n phalie di n khapie Filistinko tsüwatuo üdi tsurwe.” Samson-e uko ki, “Nieko thuo zowe a biewalie lho ükecü rüseshü a kiecie.”

¹³ Ukoe sie, “U zo, hie n phapie uko dzie nu keshü zotuo, hieko n dukhriwalie lho.” Sidi ukoe kero kesa kenie pie puo phalie di tsiekrieu nunu puo ze khor.

¹⁴ Puoe Lehi nu khorlie tse, Filistinkoe puo ze kesetuo üdi shie vor. Sitse Jihova Ruopfüu puo gei kuo kemerie chü vorta, mu kero puo bou gei kebako gakhro ro tuketa mhieta, mu puo dzie kephako tesisita.

¹⁵ Siro puoe gada mecoru kesa puo ngulie di süu chü pielie, di süu pie mia nyie puo dukhriwa.

¹⁶ Sidi Samson-e keli di, “Gada mecoru puo pielie ru, mia nyie puo a thuo dukhrishü, Gada mecoru puo pielie ru uko biepie pfhe kesekebashüe.”

¹⁷ Puoe pu tseiwa tse, puo dzie nunu gada mecoru kelhouwa, sidi thechü süu za pie Ramat-lehi chüta.

¹⁸ Puoe terhüthortacü la, Jihova kie di, “No kuopezhakelie khapie n kituou tsüshüte, mu tsie a bu terhü di siatatuo me? Sidi u zhürekemoko dzie nu letatuo me?”

¹⁹ Sitse Jihovae Lehi nu keba thechü kerükouu shükhoshü, di sünunu dzü rüluo par, Samson-e süu krielie tse, puo kekuo la vorlie, di rhei lalie. Süla dzüluo süu üse En-hakor chüta, süu thie ketso Lehi nu ba zo.

²⁰ Mu Samson-e Filistinko teiki cie mepfü Israel capi chü.