Capiko 14 - Angami Naga CL (Re-edited) Bible (BSI)

Samson mu Timna nu Thenupfü

¹ Samson-e Timna nu ke, ru puoe Filistinmia rüümiapfü puo ngushü.

² Mu puoe la khor tse, puo puo mu puo zuo unie ki, “A Timna nu Filistinmia rüümiapfü puo ngushülie; süla tsie puo liepie a kimia chücie.”

³ Derei puo puo mu puo zuo unie-e puo ki, “U seyiemia morei u themia donu thenumia jüta di no ke uzhürekemo Filistinmia donunu thenu lie morosuote me?” Derei Samson puo puo ki, “Puo liepie a tsücie, a puo ngu a nei zolie,” sita.

⁴ Puo puo mu puo zuo unie-e süu Jihova kinu ücü si mo; puoe Filistinko gei philie kevi cha pfhü bacü la. Sükisü Filistinkoe Israel mho di ba.

⁵ Siro Samson-e puo puo mu puo zuo ze di Timna nu ke. Siro ukoe khubelieu tsolie tse, losha kemedzü yopuo meho di puo va phir.

⁶ Sitse Jihova Ruopfüu puo gei kuo phi vorlie, ru puoe mhapuorei se mo di puo dzie se temvünuo kecierha chü losha nuou cierhawa. Derei puo kedipuo chü shikecü pie puo puo puo zuo ki pu mo.

⁷ Sidi puoe tsu thenupfü rüchü, mu Samson-e puo nei philie.

⁸ Süsie geza ba di Samson-e puo lielietuo üdi la vo; sidi puoe losha kesiamo-u mehoshütuo üdi chatsei pra, sitse losha mo nu mepfhi mu mepfhidzüda ba di ngulie.

⁹ Ru puoe süu biepie puo dzie nu shülie di cha tuo chakhrie cü vo. Sidi puoe puo puo puo zuo unie ki la vorlie tse, puoe huo pie unie tsüshü mu unie rei süu cü. Derei puoe losha kesiamo nu mepfhidzü bielie ükecü pie unie ki pu mo.

¹⁰ Tsiu puo puoe thenupfü mehotuo üdi tsu ru Samson-e sünu thehe puo keseshü, mu süu chükecü yasau zho.

¹¹ Siro ukoe puo ngushü tse, puo peza chüketuo la mia ser ze vorshü.

¹² Sitse Samson-e sie uko ki, “A bu tsie dievi puo pie nieko ki pushüthie. Thehe zha thenieko donu niekoe süu chie toulie ro, ae linenpfhe ser mu thenyipfhe thuli ser pie nieko tsütuo.

¹³ Derei nieko süu chielie mota ro, nieko bu linenpfhe ser mu thenyipfhe thuli ser pie a tsütuo.” Ukoe puo ki, “N dieviu pushü di hieko bu rünyücie.”

¹⁴ Sitse puoe uko ki, “Tekecüu geinu kecü vie par. Kekuou geinu kemou vie par,” si. Mu ukoe zha se ketsowe dieviu chielie mo bata.

¹⁵ Zha dia nhie ukoe Samson kimia ki, “N nupfu sepie puo bu dieviu ca hieko ki pushücie, moliro hieko n puo kinumiako mu n sa thekhriwatuo. Nnie hieko secütuo üdi hieko kie ze vor me?”

¹⁶ Sitse Samson kimiae puo mhodzünu kra di puo ki, “No a ngumecüte, no a khrie ketho ba mote. No dievi puo pie a ramiako ki pushü, derei no süu ca pie a ki pushü mo,” sita. Sitse puoe puo ki, “Harie ae a puo mu a zuo unie ki rei süu ca pushü mo, siro kiüdi a pie n ki pulietuo dimu?”

¹⁷ Sirei puoe thehe zha thenieko puo mhodzünu kraba zota. Sidi zha thenie nhie, puo ki dieviu ca pushünu di cha yalie moketa la puo ki pushü.

¹⁸ Sitse puoe süu pie puo ramiako ki pushüwa. Sidi zha thenie nhie niaki leketa mhodzü nadi nu themiako puo ki, pu di, “Mepfhidzü ki kedipuo mou ga? Losha ki kedipuo kuo ga?” Sitse puoe uko ki, “Nieko a thuünuoyo ze liecie mo ücüwe, nieko a dieviu si zatuomuü,” sishü.

¹⁹ Tsiu Jihova ruopfüu puo gei kuo kemerie chü vorlie. Sidi puoe Ashkelon nu tsu mia ser dukhrilie di uko vieko pielie di thenyi pfheko pie dieviu ca chiekelieko tsüshü. Siro puo nou meyie se di puo puo ki nu la vorta.

²⁰ Sidi Samson kimiapfü pie puo nuyie nu vor keba puo dzieseu tsüwa.