Capiko 13 - Angami Naga CL (Re-edited) Bible (BSI)

Samson Kepenuo Dze

¹ Tsiu Israelmiakoe Jihova mhodzünu mha kesuo chü lata; süla Jihovae cie hiedia uko khapie Filistinko dzie nu shüwa.

² Siro Dan seyiemia Manoa ücü puo Zora nu ba, puo kimia nuojüpfü puo di puo nuo tuo mo.

³ Ru Jihova dielieu vor puo pengushü di puo ki, “No sü nuojüpfü puo zo; derei no tsie we nuonipfülietuo sidi thepfunuomia puo penuolietuo.

⁴ Süla menuolie di khubezu morei zu kekuo puorei krie hie mu mha mesa kemo puorei cü hie,

⁵ noe nuonipfülie di thepfunuomia puo penuolietuokecü la. Tsiu tsüpfü pie puo tsügei shülie lho, kekreilamonyü u nuoyoe puo penuoshü tse nu Ukepenuopfü la kelakreipie Nazirmia chütatuo. Siro puoe Filistinmia dzie nunu Israelmia shüphra sedetatuokecü la.”

⁶ Sitse thenupfüe puo nupfu ki vor di puo ki, “Ukepenuopfü themia puo a ki vorlie, mu puo zie Ukepenuopfü dieliemia zie tuoi kemerie zo; puo kirapuo nu vor shi a puo ketsoshü mo, mu puoe puo za rei a ki pu mo;

⁷ derei puo a ki, ‘Harie no nuonipfülietuo, sidi thepfunuomia puo penuolietuo, süla tsie khubezu morei zu kekuo krie hiecie, mu mesa kemo puorei cü hie, kekreilamonyü unuoyoe puo penuokelie nunu puo se ketso Ukepenuopfü la Nazirmia chü zotuokecü la’ isilie.”

⁸ Sitse Manoae Jihova ki cha di, “He-i Jihova, a n ki chaya, no ketsekeshü Ukepenuopfü themiau bu hie ki la vorcie, sidi unuoyo penuolie ro kimhie di puo theketuo shiü hie pethashücie.”

⁹ Sitse Ukepenuopfüe Manoa pfhe rünyülie, sidi Ukepenuopfü dielieu thenupfü puo lie nu ketuo ki puo ki vor, mu puo nupfu Manoa satuo mo.

¹⁰ Sitse thenupfüe ta rükri puo nupfu ki vo di sie, “Legei, mia puo ndunhie ki a ki vorcüu la vor a pengu thate.”

¹¹ Siru Manoae sielie di puo kimia siemedzi vo themiau ki, “A kimia ki die pukeshüu no me?” Ru puoe “A we.”

¹² Sitse Manoa sie, “N dieko chü tsei vorlie ro, unuoyo kelhou mu puo mhatho kedipuo chütuo ga?”

¹³ Sitse Jihova dielieue puo ki, “A n kimia ki pukeshü pete puo bu chülie.

¹⁴ Khubebo geinu kepar mhapuorei puo bu cü hie, khubezu morei zu kekuo krie hie, mu mha mesa kemo puorei cü hiecie. A puo ki pukeshü pete puo bu medziliecie.”

¹⁵ Manoae Jihova dielieu ki, “N pezie rei hie pfhe zashücie, sidi hie bu n la temvünuo yopuo chashü n tsücie.”

¹⁶ Siru Jihova dielieu puo ki, “No n thuo a kenyhuopie tha zorei, a n ca cülie lho; derei no kethe ruosuo puo kesetuo üro, chüpie Jihova tsücie.” Manoae puo Jihova dieliemia puo ücü si ba mo.

¹⁷ Süla puoe Jihova dielieu ketso di, “N za supuo ga? N dieko chü ketho vorlie ro hie bu n rhulieketuo la.”

¹⁸ Sitse dielieue sie, “No kidi a za ketsoya ga? Süu le tsokeliepfü mo.”

¹⁹ Sidi Manoa temvünuo kemedzü yopuo mu lhacülhale ruosuo selie di ketsie puo geinu ruosuo chüpie u ngo chüshüyakezhau Jihova tsüshü.

²⁰ Süu miüue tei kevatsa khota zhücü ki Manoa mu puo kimia unie süu meho ketha nu Jihova dielieue ruosuoba gei miu nunu khota; sitse Manoa mu puo kimia unie-e tsu kijü zerepfü zhüta.

²¹ Süsie Jihova dielieue Manoa mu puo kimia unie pengu lashü mota. Sitse Manoae süzenu süu Jihova dielieu ücü silie.

²² Sidi Manoa puo kimia ki, “Cüsie avu sü siata meciete, avu Jihova nguwate eru,” sita.

²³ Derei puo kimiae puo ki, “Jihova avu biekhriwakecü le ro, puoe avu dzie nu kethe ruosuo mu lhacülhale ruosuo khakeshüko lielie lho, morei mha hako pie avu pekielie lho; morei avu ki mha haikecü pulie lho ze.”

²⁴ Sidi thenupfüe thepfunuomia puo penuoshü, di puo zathopie Samson chülie. Unuoyo memie sielie, mu Jihovae japie puo tsüshü.

²⁵ Siro puoe Zora nu Eshtaol unie donu keba Mahane-dan nu baluokecü nu Jihova ruopfüu puo hüvüta.