Capiko 12 - Angami Naga CL (Re-edited) Bible (BSI)

Jeftha mu Efraim Dze

¹ Efraimmiakoe uko rüpfhünuo kie kengulie di Zafon nu pralie di, Jeftha ki, “Kiüdi no hie bu n ze vonu hieko kie mo di pra Ammonko ze kegei ga? Hieko mi pie n ki theshü n tsütuo.”

² Sitse Jefthae uko ki, “A mu a themiako re se di Ammonko hie pese phi kevorko perhie. Derei a nieko kiekeshü ki, niekoe uko dzie nunu hie kelashü mo,

³ mu nieko a kelashülie kelho ngushü tse, a thuo a phou khashü di Ammonko ze kegeituoü pra ru Jihovae uko khapie a dzie nu shü. Kiüdi nieko thie a ze kegeituoü parya ga?”

⁴ Sidi Jefthae Gilid nu themiako pete kie kengu phrelie di Efraim ze kegei, mu Gilidkoe Efraimko penyüwa, kekreilamonyü ukoe sie, “Nieko Gilidmia sü Efraim mu Manasseh donu kitamia zo,” iketa la.

⁵ Sidi Gilidkoe Efraim nu kepra Jordan dzü pfükecü chüko lielie. Mu Efraimmia taketuo huo vor di, “Hie bu praliecie” isi ro Gilid themiakoe puo üse, “No Efraimmia me?” ituo. Puo uko ki “Mo” ishü ro,

⁶ puo sie “Shibolet” idi putuo, mu puo süu pu kemecielie mo di “Sibolet” ita ro, uko puo telie di Jordan dzüpfücü chau nunu puo dukhriwawaya. Sidi sükinu uko Efraimmia nyie hiediaekenie geiwa.

⁷ Jefthae cie sorou Israel capi chü. Sidi Jeftha, Gilid-ue siata, di Gilid kijü nu puo nadiu nu puo khruwa.

Ibzan, Elon mu Abdon

⁸ Jeftha se sie Bethlehemmia Ibzan-e Israel capi chü.

⁹ Puo nuonuo thepfu ser nyi. Puo nuo thenu serko penyhüpie thinuo kekrei ki shü, mu kekreira nu puo nuo thepfuko la thenu ser lie se vor puo nuo chü. Siro puoe cie thenie Israel capi chü.

¹⁰ Siro Ibzan siata, di Bethlehem nu puo khruwa.

¹¹ Tsiu puo se sie Zebulunmia Elon bu Israel capi chü; mu puoe cie ker Israel capi chü.

¹² Sidi Zebulunmia Elon siata, di Zebulun kijü Aijalon nu puo khruwa.

¹³ Puo sie Pirathonmia Hilel nuou Abdon bu Israel capi chü.

¹⁴ Puo nuo thepfumia hiedia mu puo tsunuo thepfumia ser nyi, sükoe gada hiethenie seya; puo cie thetha Israel capi chü.

¹⁵ Süsie Pirathonmia Hilel nuou Abdon siata, di Efraim nu Amalek kijüthou rüna Pirathon nu puo khruwa.