Capiko 11 - Angami Naga CL (Re-edited) Bible (BSI)

Jeftha Ammonmia Dzie nunu Israel Kelakeshü

¹ Tsiu Gilidmia Jeftha sü terhümiavi kezha puo, puoe Gilid nuo mu puo zuoe thethenupfü puo.

² Siro Gilid kimia rei thepfumia huo penuoshü puo tsü mu süko zha sierlie tse ukoe Jeftha whuowa, di uko puo ki, “N bu hieko puo kinu kayie puorei welie lho; no sü thenu kekrei nuo zocü la,” sita.

³ Süla Jefthae puo siezedzürieko kinu tata, sidi vo Tob kijü nu lhou tuota. Siro miahoumiaruo doupuo vor puo ze mia peprietuota.

⁴ Puotei huo sie, Ammonkoe Israel ze terhü chüta.

⁵ Siro Ammonkoe Israel ze terhü chülie, sitse Gilid nu phichükoe Tob kijü nu Jeftha ze vortuo üdi vota.

⁶ Ukoe Jeftha ki, “Vor di hie krüta chücie, silie liro hieko Ammonko ze kegeilietuo.”

⁷ Derei Jefthae Gilid nu phichüko ki, “Nieko a ngumecü di a puo ki nu a whuowa mo me? Kiüdi tsie nu nieko kemezhielie tse a ki vorya ga?”

⁸ Sitse Gilid nu phichükoe Jeftha ki, “Sirei hieko n kitsa rürei vorzhiemu, n bu hieko krüta chü di Ammonko ze kegei mu Gilid nu kelhou pete mhokezha chülieketuo la,” isi.

⁹ Jefthae sie phichüko ki pu la di, “Nieko a ze la ura vo di a bu Ammonko perhieketuo nu mhanuü Jihovae uko khapie a dzie nu shüwa ro, a bu nieko mhokezha chü kethotuo nyü?”

¹⁰ Sitse Gilid phichükoe sie Jeftha ki, “U zo, n kepu tuoi chü zotuo; mu Jihova thuo u donu zhapuu chütuo.”

¹¹ Süla Jefthae Gilid phichüko ze vo, mu themiakoe puo pie uko mhokezhau mu krütau chü; mu Jeftha Mizpa nu Jihova mhodzünu puo dieko pete pu lashü.

¹² Sitse Jefthae dieliemia ketsepie Ammonko kediu ki shü, di sie, “Kedipuo avu donu ba di hie ngumvü di vor hie kijü penyülietuoüta ga?”

¹³ Ru Ammonko kediue Jeftha dielieko die kela di, “Israel-e Ijipt nunu kepar ki, a kijü Arnon nunu Jabok ketso, mu Jordan tsatie pete lieliete; süla kezekevi nu kha lashüwaliecie.”

¹⁴ Sitse Jefthae Ammonko kediu ki dieliemiako ketse lashü di,

¹⁵ puo ki, Jefthae puya: “Israel-e Moabmiako kijü morei Ammonko kijü puorei lielie mo,

¹⁶ derei ukoe Ijipt nunu parcü ki, Israel-e rayha pfüthese Kemerie Dzükezha nu vor, di vo Kadesh nu balie.

¹⁷ Sitse Israel-e dielie ketsepie Edom kediu ki shü di puo ki, ‘Hieko bu n kijü pfüthe vocie,’ si, derei Edom kediue rünyü mvüte. Mu ukoe Moab kediu ki rei dieliemia ketseshü derei puoe mvüte. Süla Israel-e Kadesh nu bata.

¹⁸ Sidi ukoe rayha nu rühou se Edom kijü mu Moab kijü whi vo süu niathutsa tsolie, di Arnon khie kekreitsa nu razhüchü chülie. Derei uko Moab rüvie nu le mo, Arnon pie Moab rie chücü la.

¹⁹ Siro Israel-e dieliemiako ketsepie Heshbon nu Ammonko kediu Sihon ki shü di puo ki, ‘Hieko bu n kijü pfüthese hieko ra vocie,’ ishü.

²⁰ Sirei Sihon-e Israel bu puo kijü pfüthe voketuo puo le pevi mota; sidi puoe puo themiako kie kengulie di Jahaz nu razhü chülie di Israel ze kegeita.

²¹ Sitse Jihova, Israel Kepenuopfüe Sihon mu puo themiako pete khapie Israel dzie nu shü di ukoe puo penyüwa; sidi Israel-e Amorko lhou keba kijü pete liepie puo vie chülie.

²² Siro ukoe Amorko rüvie pete, Arnon nunu Jabok ketso rayhau nunu Jordan ketso lielieta.

²³ Mu Jihova Israel Kepenuopfüe puo themiako mhodzü nunu Amorko whuowa di uko vie lielieta üliro, no süko lie lakecü mese me?

²⁴ N rhuou Kemosh pie n ketsüu pie n vie chülie lho me? Sütuoi Jihova hie Kepenuopfüe kha hie tsükeshüko hie-e süko pevie motuo me?

²⁵ Tsiu no Zipor nuou Balak, Moab kediu ki kuo üte me? Puo Israel ze keperhie morei terhü chü me?

²⁶ Israel-e cie krie se mese Heshbon, Aroer mu puo natseko, siro Arnon khieümhou nadiko pete peba se vorte, hateikiko kiüdi no süko lie lalie mo ga?

²⁷ A n gei kejo puorei chü mo ho mu no a ze terhü chükecü a gei puotou mothorte. Jihova bu thie Israelko mu Ammonmiako donu capiu chütuowe,” sishü.

²⁸ Derei Ammonko kediue Jeftha puo ki kepu dieu rünyü mota.

²⁹ Siro Jihova ruopfüue Jeftha gei vorlie, sidi puoe Gilid tsiu Manasseh pfüthe vo, di Gilid kijü Mizpa nu vorlie, mu Gilid kijü Mizpa nunu puo Ammonko ki vo.

³⁰ Siro Jefthae Jihova ki rüse di pukecü, “Noe Ammonko kha a dzie nu shü ro, sidi a bu Ammonko penyülie ro, a kuolie di a kinu la vorkecü ki,

³¹ kehoupuorei kikha nu a ze kesetuoü tuokepar-u pie Jihova vie chütuo, mu a süu khapie kethe ruosuo chüshütuo.”

³² Sidi Jefthae Ammonko ze kegeituo üdi tuoshü, mu Jihovae uko khapie puo dzie nu shü.

³³ Puoe Aroer nunu Minit kepenuo ketso nadi mepfü pekawa. Siro Abel-keramim ketso uko dukhri phiwa. Sidi Israelkoe Ammonko penyüwa.

Jeftha Nuopfü

³⁴ Siro Jefthae Mizpa nu puo kinu la vor tse, puo nuopfü übou pfheü ze nashü di puo setuoü par. Puo nuoe süpfü rübei, süpfü sie puo nuo thepfu rei thenu rei kekrei jü.

³⁵ Siro puoe süpfü ngushü tse, puo pfhenei cierhata, sidi sie puo ki, “Hou, a nuopfü! No a nou chüpie meyhumezhieshüte, ae Jihova ki rüseshüwate mu a süu varhuolie kenjüte.”

³⁶ Sitse puoe puo puo ki, “A puo, noe Jihova ki phrashüwate, süla n die phrashükewa tuoi a gei chüwaliecie, tsie we Jihovae n ngumvümia Ammonko gei n khepuwate eru.”

³⁷ Sidi puo sie puo puo ki, “A la mha hau chüshücie: Thekhrü kenie kha a tsü, di a bu vo a kro a zomia ze kijüthouko gei rühou di a rüü phouse krükracie.”

³⁸ Sitse puo puoe sie, “Volie” sidi khrü kenie la puo ketsewa. Sidi puoe puo zeko ze kijüthou gei vo di puo rüü phouse teiko la thekrü chü.

³⁹ Khrü kenie sie puoe puo puo ki la vor, sidi rüsekewa tuoi puo gei chüwa. Mu puo mesa tsei di siata. Sidi hau se Israel nu thezho puo chü di

⁴⁰ teiciekepra rüünuokoe zha dia Gilid Jeftha nuopfü krüketuo la prapraya.