Capiko 10 - Angami Naga CL (Re-edited) Bible (BSI)

Tola mu Jair

¹ Abimelek siaketa sie, Isakarmia puo, Pua nuou, Dodo tsuu Tola Israel shüphrashüketuo la sier, puo Efraim kijüthou rüna Shamir nu lhou.

² Puo cie mepfüese Israel capi chü di siata, mu Shamir nu khruwa.

³ Puo sie Gilidmia Jair sier, di cie mepfüekenie Israel capi chü.

⁴ Mu puoe puo nuo thepfu ser nyi, sükoe gada ser seya. Ukoe Gilid kijü nu nadi ser kekhaya, süko thie ketso rei Havot-jair üya.

⁵ Siro Jair siata tse, puo pie Kamon nu khruwa.

Ammonmiako Israel Petsoukecü

⁶ Tsiu Israelkoe Jihova mhinguki kerüzhü chü lata. Ukoe Baalko tsiu Ashtarot, siro Siriamia, Sidonmia, Moabmia, Ammonmia mu Filistinmia rhuoko lie chü tuota. Hamhie di ukoe Jihova khawa di puo lie chü mota.

⁷ Süla Jihovae uko gei puo nou meyie sieta, sidi puoe uko zepie Filistinko tsiu Ammonko dzie nu shüwa,

⁸ sidi sücie uko Israel nuonuoko pesüpemvü mu pese phi. Ukoe cie kerethetha Gilid nu Jordan niathutsa Amorko kijü nu ketuo Israelko pese seta.

⁹ Sizomonyü Ammonkoe Juda, Benjamin mu Efraim yiemiako perhietuo üdi Jordan cie parta; sidi Israel bu kemezhiethorta.

¹⁰ Sitse Israelmiakoe Jihova ki melo di sie, “He-i hie Jihova khawa di Baal lie chü tuote, mu n mhodzü phoumawate.”

¹¹ Sitse Jihovae uko die kela di sie, “Ae Ijiptmiako, Amormiako, Ammonmiako, Filistinmiako,

¹² Sidonmiako, Amalekmiako mu Maonmiako nieko peseketa ki, nieko a ki meloshü ru, ae uko dzie nunu nieko shüphralie mo me?

¹³ Sizorei nieko a khawa di terhuo kekrei lie chü tuote, süla ae nieko shüphra la sa lhote.

¹⁴ Nie thuo kedakelie rhuoko ki vo di melolie, sidi nie kemezhiekelie ki uko bu nie shüphralie.”

¹⁵ Derei Israelko sie Jihova ki, “Hieko phoumawate, hieko pie n mhodzüki vi ücüu chüwalie; derei thie we hieko shüphrashü zoyi.”

¹⁶ Sidi ukoe uko donu solhi rhuoko khawa di Jihova lie chüta; mu puoe Israelko kemezhiekecüko ngu di puo nousuota.

¹⁷ Siro Ammonko u rünyie keselie di Gilid nu razhü chülie tse; Israelko rei vo kengulie di Mizpa nu razhü chü balie.

¹⁸ Sitse Gilidmia krütakoe huoniehuo ki, “Supuonie sie Ammonmiako perhie kerie chüshütie shiü, puo bu Gilid nu kelhouko pete mhokezha chütatuo,” silie.