Capiko 1 - Angami Naga CL (Re-edited) Bible (BSI)

Juda mu Simeon Seyieko Adoni-bezek Tekelie

¹ Joshua siaketa sie, Israelkoe Jihova ketso di, “Hieko la supuonie rie kho di Kananko ze kegeituo ga?”

² Sitse Jihovae, “Judae themiako bu khotuo. Ae kijüu khapie uko dzie nu shüwate,” si.

³ Sitse Juda puo dzürieu Simeon ki, “A ya chükeshü kijü nu khor di a ze Kananko ze kegeicie, silie ro hie rei sütuoi nie tsükeshü rüvietsa khorshütuo,” sishü. Süla Simeon puo ze kho.

⁴ Siro Judae kho ru Jihovae Kananko tsiu Perizko khapie uko dzie nu shü; mu ukoe Bezek nunu mia nyie ker geiwa.

⁵ Siro ukoe Bezek nu Adoni-bezek ngulie di puo ze kegei, tsiu ukoe Kananko mu Perizko biewa.

⁶ Adoni-bezek-e tata; derei ukoe puo whuo vo di puo telie, di puo dziekrünie mu puo phikrünie dawa.

⁷ Siro Adoni-bezek-e sie, “U dziekrü mu u phikrü dakewa kedi hiethenie a mizhü khronu khutie pacü vor; tsie we ae chükeshü tuoi Kepenuopfüe a gei chü lashüte,” isi. Ukoe puo ze Jerusalem nu vor, mu puoe sünunu siata.

Juda Yiekoe Jerusalem nu Hebron Penyükelie

⁸ Siro Juda themiakoe Jerusalem whuo di süu lielie. Ukoe zhiecha pie süu biewa mu mi pie nadiu thewa.

⁹ Süsie Juda themiakoe kijüthou rüna nu lhou keba Kananko, Negebko mu niakratsa kijüthou phi nu kebako ze kegeituoü tsu.

¹⁰ Judae Hebron nu keba Kananmiako ze kegei (thiedzü Hebron za Kiriat-arba); sidi ukoe Sheshai, Ahiman mu Talmai penyüwa.

Othniel-e Debir Nadiu Penyükewa

¹¹ Sünunu Juda themiako vo Debir nadiu whuo, (Thiedzü Debir za Kiriat-sefer isiya),

¹² siro Kaleb-e sie, “Kehoupuorei Kiriat-sefer whuo di liekelieu a a nuopfü Aksa pie puo ki penyishütuo.”

¹³ Sitse Kaleb siezeu Kenaz nuou Othniel-e süu lielie; süla Kaleb-e puo nuopfü Aksa khapie puo ki penyishü.

¹⁴ Sitse puoe khunhie Othniel ki vor di puo puou ki lie puo chalienu di pu beilie; ru puoe puo gada geinu kerlie tse, Kaleb-e puo ketso di, “No kedipuo menguya ga?”

¹⁵ Sitse puo sie, “Mhapuo pie a tsücie, no Negeb nu kijü keso huo kha a tsüshüte, derei Gulot-mayim sa pie a tsücie.” Sitse Kaleb-e Gulot Peso-u mu Pekhro-u pie puo tsüshü.

Juda mu Benjamin Yieko Kuokelie

¹⁶ Siro Mosa meiu Ken nuosenuoyieko, Juda themiako ze di kukuobo kelhou nadiu nunu Negeb nu keba Arad khieki Juda rayha nu kholie. Süsie uko vo Amalekko ze balie.

¹⁷ Siro Judamiako uko dzürieu Simeon themiako ze vo Zefat nu keba Kananmiako dukhriwa tsiu rünau peka lotsowa. Süla nadi süu üse Horma idi kieta.

¹⁸ Siro Juda themiakoe Gaza, Ashkelon, Ekron mu uko rüvieko sa lielie.

¹⁹ Siro Jihovae Juda themiako ze tuo zo; mu ukoe kijüthou rünako lie phrelie, derei uko thezha nu keba themiako whuolie kenjüta, kekreilamonyü ukoe thegi bagei nyikecü la.

²⁰ Mosae pukeshü tuoi, Hebron pie Kaleb tsüwa, mu puoe sünunu Anak nuo thepfu seko whuowa.

²¹ Derei Benjamin themiako we Jerusalem nu keba Jebusko whuowa mo, süla Jebusko thie ketso rei Jerusalem nu Benjaminko ze lhou tuota.

Josef Kinuko Bethel Penyükelie

²² Josef kinuko rei kho Bethel whuo; mu Jihovae uko ze tuolie.

²³ Josef kinukoe mia huo ketseshü di Bethel rie (thiedzü we nadiu za Luz iya.)

²⁴ Sitse mha riekevokoe mia puo nadiu nunu parkezhü ngulie, ru ukoe puo ki, “N pezie rei nadiu nu lelieketuo chau thashü hieko kiecie, siro hieko n ngumezhieshütuo,” sishü.

²⁵ Süla puoe chau thapie uko kieshü; sitse le di nadiu nu themiako pete biewa; sirei themiau mu puo kinuko pete we kelashü di uko bu tuota.

²⁶ Sitse themiau Hitko kijü nu vo di rüna nadi puo chülie; sidi süu za pie Luz idi kielie, thie ketso rei theza süu kieya.

Manasseh mu Efraim Rüvieko

²⁷ Siro Manasseh yieko Bet-shian, Tanak, Dor, Ibliam, Megido rüna hako mu uko natseko nu lhou keba themiako whuowa mo sidi Kanankoe rüna hako nu lhou bata.

²⁸ Mu Israelkoe kuo sierlie tse, uko Kananko kemvü chü di uko bu mhachü, derei uko whuowa mo.

²⁹ Efraim yieko rei Gezer nu keba Kananko whuowa mo; sidi Kananmia Gezer nu uko donu lhou tuota.

Seyie Kekreiko Rüvie

³⁰ Zebulun yieko rei Kitron nu kelhouko morei Nahalol nu kelhou Kananko whuowa mo; derei uko kemvü chü uko bu mhachü.

³¹ Asher yiemiako rei Ako, morei Sidon, morei Ahlab, morei Akzib, morei Helba, morei Afik mu Rehob nu kelhou Kananko whuowa mo;

³² derei Asher themiako Kananmia khenu kelhouko donu balie, ukoe uko whuowa kemo la.

³³ Naftali themiako rei Bet-shemesh mu Bet-anat nu kelhou Kananko whuowa mo, derei Kananmia khenuko donu balie, di uko kemvü chü uko bu mhachü.

³⁴ Siro Amorkoe Danko whuo lapie kijüthou rüna nu shüwa, di ukoe uko bu razha nu tsur mvüta.

³⁵ Amorkoe Har-heres nu, siro Aijalon nu mu Shalbim nu rüdi mo balie, derei Josef kinuko kuo sierlie tse, uko kemvü chüpie uko bu mhachü.

³⁶ Amorko rieu ro Akrabim nu kekho chau, Sela nunu sede di sümho kho.