Amos 9 - Angami Naga CL (Re-edited) Bible (BSI)

Israel Pekakewa

¹ A Jihovae ruosuobau khieki thakecü ngu, tsiu puoe pukecü: Coko rünieta kemochie, puo tsügei kepfhü ba zolie; tsiu themia pete tsü geinu süko vütshieshülie; sitse keshako a zhiecha pie dukhriwatuo; uko miapuorei talie kenjü, uko miapuorei rüzoulie lho.

² Ukoe kheho ho se Sheol nu tsu zorei, sünunu rei a dzie pie uko teshülietuo; uko thuo teigei sieta zorei, sünunu a uko se kerwatuo.

³ Uko thuo Karmel mezü geinu rüshüta zorei, sünu a uko pfhü vo di uko telietuo; siro uko a mhodzü nunu vo dzükezha thotsü nu rüshü bata zo rei, sünu a dzünyhüu ki pushü di puo bu uko medutuo.

⁴ Siro uko ngumvümia mhodzünu miadie chü vota zorei, sünu zorei a zhiecha ki pushü di puo bu uko dukhrituo; siro a mhipie uko gei keshüu kevitsanu mo di kesuotsanutuo.

⁵ Niepuu, krodiko Jihovae puya; kijüu bieshü mu süu zhata, tsiu sünu keba pete krata, mu sünu keba pete Nail dzüdi mhiei sietuo, tsiu Ijipt nu Nail dzü kemhie rükre la tsutatuo;

⁶ teiko geinu puo kibou pesoko chülieya, siro kijüu geinu puo bouko chülieya; puoe dzükezha dzüko kieshüya, tsiu süko perüpie kijü zie gei shüshüya. Süu zae Jihova.

⁷ Niekoe a mhodzüki Ethiopiamia kemhie moü me? He-i Israelmiako, Jihovae siya. A Ijipt kijü nunu Israel, tsiu Kaftor nunu Filistinko mu Kir nunu Arammiako ze parshü moü me?

⁸ Niepuu Jihova mhi-e kephouma tshukepfü kediu mhogei bate, mu a kijü zie geinu süu pekawatuo, sirei a Jakob kinuko we peka lotsowalie lho, Jihovae siya.

⁹ Kekreilamonyü harie, a diekhashütuo, sidi seyie pete donunu, thouzo nu thou rüzokeshü tuoi Israel kinuko shükenieshütuo, derei tsiesenuo puorei kijü gei tetsuta lho.

¹⁰ “Kesuou u penyülie lho, morei u ze kese lho” idi puyakezha a themia kephoumamiako pete zhiecha geinu siatatuo.

David Kedibau Kelalieketuo

¹¹ Sünhie a David pru tsozhüketau tousesieshütuo, tsiu puo kepako pekhuowatuo, mu ruoketako phoushütuo, sidi kerieki kemhie chü lashütuo;

¹² Uko bu Edom lhiepie kebako pevie lalie, siro seyie a za kiekelie pete kela lalieketuo la, Jihova mha hau chükeshüu thuo puya.

¹³ Puoteiu vor touzhie, Jihovae siya, süki liephiekeshümia liekeremia mhodzütatuo, tsiu khubezu theyakezhamia tsia kevamia mhodzütatuo; kijüthouko geinu khubezu moukezecü po tsurtuo, tsiu süu kru kijütsei pete tshutuo.

¹⁴ A a themia Israel ruo chü pevi lashütuo, ukoe pekakewa nadiko chü lalietuo sidi süko nu lhoutatuo; uko khubebo pelhoutuo tsiu süko zu krietuo, tsiu uko tezie chütuo mu puosi rie cütuo.

¹⁵ A uko pie uko kijü gei leishütuo, mu a kijü khapie uko ketsüu geinu mhakipuorei uko ciethese lata lho, Niepuu n Kepenuopfüe siya.