Amos 8 - Angami Naga CL (Re-edited) Bible (BSI)

Nhasi Rhau

¹ Niepuu Jihovae mha hau se a pekieshü: teile ki nhasi rha puo.

² Puo sie, “Amos, no kedipuo ngu ga?” Sitse a sie, “Teile ki nhasi rha puo.” Sitse Jihova a ki, “A themia Israel thelau vorte; a mhakipuorei uko pfüthe vo salie lhote.

³ Teisozha sünhie rüsuoki nu tsaliko kekra pfhe chütatuo.” Niepuu Jihovae puya; “Kesiamo kra phitatuo, süko kelhoupie thechü pete nu shütatuo. Kemekrie batalie!”

⁴ Hau rünyüshücie, ketsopfhümia kedewayakezhako, kijü nu kejüko pekawa,

⁵ hai di sie, “Kikecükipuo thekhrü kesau tseitatie shi, sidi hie bu telha ze lalie; tsiu sabat tseita di, hie bu thoulha zelietuo shi. Hie efa chü pecülie mu shekel chü pezhalietuo, siro kemeda roshükhouu se mia kedotuo,

⁶ sidi rakachü la kejümia khrülie, tsiu phikou dziese pie ketsopfhüko khrülietuo, tsiu thoulha tshokelieko zetuo.”

⁷ Jihovae Jakob kemiakokecü geinu rüseshü: Ketho zo a mhakipuorei uko mhathoko rükra motalie lho.

⁸ Mhatho hako la kijüu pe, tsiu sünu keba pete kra bata mo me? Siro süu pete Nail dzüdi tuoi siertuo, mu Ijipt nu Nail tuoi sier tsiu rüle latatuo.

⁹ Niepuu Jihovae puya, ae niakiu bu khinhieluo ki letatuo, tsiu a tei zie mecümecie baluokecü nu kijüu bu zeitatuo.

¹⁰ A nie thehethehieko pie kekra chüwatuo, tsiu nie tsali peteko pie thekrü chüwatuo; a nie chieca pete nu gakhropfhe pedzieshütuo, tsiu nie tsü pete bu pietatuo; a süu chüpie mia puo puo nuo pfuliu la krakecü tuoi shütuo, tsiu puo thelau bu pfhümezhakecü teisozha puo chüwatuo.

¹¹ Teisozhau vor zotuo, Niepuu Jihovae puya; süki a pekriekecü ketsepie kijüu gei shütuo; kecükekrie la pekriekecüu mo, morei dzü la terhükecü mo, derei Jihova dieko rünyüketuo lanu.

¹² Ukoe dzükezha nunu rühou dzükezha nu votuo, tsiu pesotsa nu niathutsa votuo; ukoe Jihova die pfhü di ta lukihaki votuo, derei ukoe süu ngulie lho.

¹³ Teisozha sünhie rüü keziviko mu khriesako terhü di phisiatatuo.

¹⁴ Samariamia Ashima za se rüse, di sie, “Nie rhuou rhei ketuo mhie, he-i Dan” siro “Beersheba chau rhei ketuo mhie” isiyakezha, süko tetsutatuo, mu mhakipuorei la sier motatuo.