Amos 7 - Angami Naga CL (Re-edited) Bible (BSI)

Ku, Mi mu Kemejüro

¹ Niepuu Jihova mha hau pie a pekieshü: Puoe mha lhou kepar kenuou teiki kuprie chüshü (süue kediu lie ziekewa sie lhou kepar kenuou teikite),

² uko kijü gei nha riecü tseilieta tse, a sie, “He-i Niepuu Jihova, a n ki chaya, kejo vashücie! Jakob kimhie di thalie ta! Puoe cüthor ze ru!”

³ Jihova mha hau la puo nou shükhreta; “Süu sükemhielie lho” Jihovae siya.

⁴ Niepuu Jihovae thapie a kiekeshüu sü hau; Niepuu Jihovae mi bu rütsur ketuo chashü, sitse süu mha kesou kezhako thewa mu kijüu cülie.

⁵ Sitse ae sie, “He-i Niepuu Jihova, puo thela chüwatacie, n ki a mezhiemeloya! Jakob kimhie di thalie ta? Puo cüthor zo!”

⁶ Sitse Jihova hau la puo nou shükhrelieta; “Hau rei silie lho,” Niepuu Jihovae siya.

⁷ Puoe hau thapie a kieshü: Niepuue kemejüro teshü di pfhekelie tsiepfhe puo khieki tha, mu kemejüro puo puo dzie nu se tha.

⁸ Sidi Jihova sie a ki, “Amos, no kedipuo ngu ga?” Sitse a sie, “Kemejüro puolie.” Siru Niepuue sie, “Harie, a a themia Israelko donu kemejüro puo teshüshüzhie; mu a mhakipuorei uko pfüthe vo salie lho;

⁹ Isak thechü kerükrieko chü kemethuowatatuo, tsiu Israel kemesachüko bu ruozhütatuo, sidi a zhiecha se Jeroboam kinuko petsoutuoü siertuo.”

Amazia Kediu ki Panyakeshü

¹⁰ Sitse Amazia, Bethel nu zievo-u mia ketsepie Israel kediu Jeroboam ki shü di sie, “Amos-e Israel kinuko donunu sier mharhü n petsou bate; puo dieko pete toupfü kekralie kenjü bate,

¹¹ Kekreilamonyü Amos hakemhie pute, ‘Jeroboam zhiecha geinu siatuo, tsiu Israel-e puo kijü nunu miadie chü votatuo,’ site.”

¹² Siro Amazia sie Amos ki, “He-i, siedzekenguu, tuotalie, ta Juda kijü nu votalie, süra nu n niekhrüda kra cülie, sünunu siedzedie puliecie;

¹³ derei mhakipuorei Bethel nunu siedzedie pu sa hie, kekreilamonyü süue kediu kemesachü zo, tsiu süue kedi rüsuokiu zokecü la.”

¹⁴ Sitse Amos sie Amazia die kela di, “A siedzekesimia mo, morei siedzekesimia nuonuo rei mo; derei a we kuopfhemia, mu khrabvüboko mezamezhü tuoyakezhamia zo,

¹⁵ mu Jihovae a tekuo pfheketuo nunu a zelie, sidi Jihova sie a ki, ‘Vo di a themia Israel ki siedzedie pushücie!’ si.

¹⁶ “Süla tsie Jihova die rünyüliecie. Noe sie, ‘Israel petsou di siedzedie pu hie, tsiu Isak kinuko petsoukecü die pu hie,’ iya.

¹⁷ Süla Jihovae puya: ‘Nadiu nu nie nupfünuoko thethelietatuo, tsiu nie nuonuo thepfu rei thenu rei zhiecha geinu tetsutuo, mu nie kijü rhie kezawatuo; tsiu niekoe kijü mesa kemora nu siatuo, mu Israel-e miadie chü di puo kijüu ze petse votatuo.’ ”