Amos 6 - Angami Naga CL (Re-edited) Bible (BSI)

U Theguo Chü Kevavuo Kebamia Pechüketuo

¹ Zion nu rüü kebako we, tsiu Samaria kijüthouu pele kebako we ce, chülietie, seyieko nu thekrüko, Israel seyieu bu u ki voryakezhau we!

² Kalne pfüthe vo di mehoshücie; sünunu Hamat kezhau nu vocie; süsie Filistinmia Gath nu kelie. Nieko kedi hako ki vikuo üme? morei nie kijü rüvie uko kijü rüvie ki zhakuoü ba me?

³ He-i nie teisozha kesuou pie kepetse nu shüwa, sidi mia kechükedekecü se vorkeshüko.

⁴ Tsohu pie kechü yakouko gei zhüyakezhako, tsiu u zhüko gei vazhapfükezhüko, mu tekuokro-u nunu tekuochü tsiu peri kro-u nunu thudo cüyakezhako;

⁵ Übou kekhou pfhe se di tsali keziviko chüyakezhako, tsiu David tuoi di bazha neiünei chülie;

⁶ hiepouko nunu zukrie, tsiu tier kevitho se u kenheyakezhako, derei Josef pekakewa ki thenousuolie moketako we ce, chülietie!

⁷ Süla uko bu tsie we kerietho chü di miadie chü votatuo, mu u nei di vazhapfükezhüko jütatuo.

⁸ Niepuu Jihova thuo rüseshüwate, (Jihova, krodiko Kepenuopfüe puya): A Jakob kemiakokecü rütseya, mu puo badiko ngumecüya; tsiu a puo nadi mu sünu keba pete khashüwatatuo.

⁹ Mia ker ki puo nu ba ro, uko siatatuo.

¹⁰ Mi pie kesiamoko theyakezhau ba di, puoe ki nunu themo-u se par, sidi kinutshekou kebau ki, “Tsie rei mia huo n ze baluo me?” Puo die kelashü morokesuou ro, “Molie.” Sitse puo sie, “Hou! we Jihova za pu suomu,” situo.

¹¹ Harie, Jihova diekhashüte, ki kezhau bierhuowatuo, tsiu kibenuoko durhuo phawatuo.

¹² Kier-e tsiekrie gei talie vi me? mia puoe dzükezha nu mithu ze liecielie vi me? Derei no kethoca pie therei chüwate, tsiu kemiatho siu pie tsiena chüwate.

¹³ Nie Lo-debar nu nie neiyakezhako, sidi sie, “Hie thuo hie la hiekuohiehie ü Karnaim lielie mo üme?” iyakezhako.

¹⁴ Ketho zo, a seyie puo pie n petsoutuoü sesierzhie, he-i Israel kinuko, Jihova, krodiko Kepenuopfüe puya, mu ukoe Lebo-hamat nunu Araba Rü ketso n pesüpemvü votuo.