Amos 5 - Angami Naga CL (Re-edited) Bible (BSI)

Israel Kephouma la Thekrü Kechü

¹ A nie la thekrü chü di pukeshü die hau rünyüliecie; he-i Israel kinuko:

² Tetsute, la sielie lhote, rüüpfü Israel; puo kijü nunu puo rükra mote, miapuorei puo phousieshüketuo ba mo.

³ Kekreilamonyü Niepuu Jihovae puya: Mia nyie puo keze tuo praketa nadiu mia krie puo lhieshütuo, tsiu mia krie puo tuopraketau nu mia ker lhieshütuo.

⁴ Kekreilamonyü Israel kiu ki Jihovae puya: A pfhülie di rheilie;

⁵ derei Bethel we pfhü hie, tsiu Gilgal nu le hie, morei Beersheba pfüthe vo hie; Gilgal-e miadie chü vo toutuo, mu Bethel-e kemethuo chütatuo.

⁶ Jihova pfhülie di rheiliecie, moro puo Josef kinuko petsou di mi kemhie partuo, sidi süu Bethel thewatuo, miapuorei süu tshülie lho.

⁷ He-i, nieko kethoca pie tsiena chükewako, sidi kemiatho pie kijü shükewako!

⁸ Themvü Rhupieko, tsiu Zuthiekroko chükeshüu, tsiu zeibouikecü pie khise chükeshüu, siro teiso chüpie teizei chükewau, dzükezha la dzüko kiekeshüu, sidi süko rupie kijü zie gei keshüu, puo za sü Jihova zo,

⁹ Kekuomia petsou di kepeka ketseshüyakezhau, kepeka bu dahouko gei voryakezhau.

¹⁰ Ukoe kharu kinu mia kerhieshüyakezhau ngumecüya, tsiu ukoe dietho kepuu rütseya.

¹¹ Süla nieko mhakejümia kede mu uko kinu thoulha khruolie, niekoe ketsie phropie ki chülie, derei nieko süko nu lhoulie lho; nieko khubebo u keneiko leishü, derei nieko khubezu krielie lho.

¹² Kekreilamonyü a nie kejokemou kide ba shi, tsiu nie kephouma kide zha shi si ba, nieko kemiathomia pechü, tsiu theso lie, sidi ketsopfhümia khupie kharu khie shüwaya.

¹³ Süla kemenuomia süteiki kemekrie batatuo; puotei süki vi mokecü la.

¹⁴ Mha kesuou mo di keviu pfhüliecie, sitse nieko rheilietuo; tsiu Jihova, krodiko Kepenuopfü nieko ze balietuo, nieko pukeshü tuoi di.

¹⁵ Mha kesuou ngumecülie mu mha keviu khrielie, tsiu kharu nu kethocau chüshülie; siliro, Jihova, krodiko Kepenuopfü, Josef lhiepie kebako ngumezhieshü rei silie lhomu.

¹⁶ Süla Jihova, krodiko Kepenuopfü, Niepuue puya: Zieke pete nu kra batatuo; tsiu cha pete nu ukoe, “Ayah! Ayah!” ibatatuo. Ukoe kraketuo la lieciemia kietuo, tsiu thekrü chü kesimia bu krashünu kietuo;

¹⁷ khubelie pete nu mia kra batatuo, kekreilamonyü a nieko donu pfüthe votuo üzhie, Jihovae siya.

Jihova Teisozhau

¹⁸ Jihova teisozhau mengu kebamia we ce, chülietie! Kiüdi nieko Jihova teisozhau menguya ga? Süu zeiboui zo, kezie tuo mo;

¹⁹ Mia puoe losha mhodzünu talie, ru thega puo sekelie tuoi; morei ki puo nu le sidi puo dzie pie sozhau neshü, ru tinyhü puo medukewa tuoi zotuo.

²⁰ Jihova teisozhau zie mo di zeiboui, kezie mo, di thedzükezei puo mo me?

²¹ Ngumecülie, a nie thenyiko rütseya, tsiu nie kenanyü di kehoukengucüko a nei mote.

²² Nie thuo kethe tsiu lhacülhale ruosuoko pie a tsü zorei, a süko lielie lho; tsiu khunuo puo phou keviko pie kezekevi ruosuo chüshü zorei, a süko meholie lho.

²³ A kinu nie ütsali pfheko chüsetalie; a nie übou pfhe keziviko rünyü lho.

²⁴ Derei kethocau bu dzü tuoi rülou tsulie, tsiu kemiatho bu dzü kru seikezhü kerü mhieiliecie.

²⁵ He-i Israel kinuko, nie rayha nu teicie hiedia ketuo ki ruosuoko tsiu mha khapie a tsü me?

²⁶ Nieko Sakut pie nie kediu chü, mu Kaiwan pie nie rhuo themvüu chü, nie terhuorhiko, nie thuo nie la chükelieko setuo zotuo.

²⁷ Süla a nieko bu miadie chü di nie ze Damaska tse vowatuo, puo zae Jihova, krodiko Kepenuopfüe siya.