Amos 4 - Angami Naga CL (Re-edited) Bible (BSI)

¹ Die hau rünyüliecie, nie Bashan nu thukrüko, Samaria kijüthou gei kebako, mhakejümia pese, ketsopfhümia bie pesuokezhako, uko nupfunuoko ki, “Krieketuo la mha huo se vorlie!” iyakezhako.

² Niepuu Jihova puo kemesa nunu rüseshüte: Puotei puo nieko ki vor touzhie, süki uko khuoshüwi pie nieko teshülietuo, nie donu thelatho-u zorei khuoshüwi pie teshülietuo.

³ Sozha kecieko nunu nieko tatuo, mia puopuokecü mhodzü tou nunu, sidi nieko kelhoupie Harmon nu shüwatuo, Jihovae siya.

⁴ Bethel nu vorlie, sidi kejokemou chülie; Gilgal nu vorlie, sidi kejokemou chü pekralie; teisoduü nie ruosuoko se vorlie, zha se metsei nie ker-zapuou se vorlie;

⁵ Khrei sakecü niekhrüda se kethezie ruosuo khashülie; sidi u keneisephra ruosuoko khashünu pushülie, süko pu pesishülie; kekreilamonyü nie sikecüko chükecü nie neiyacü la, he-i Israelmiako! Niepuu Jihovae siya.

Israel-e Puotoukecüu Melieketa

⁶ A nie nadi pete nu thehu kemesau kha nie tsü, tsiu thechü pete nu niekhrüda tsopfhükecüu khashü nie tsü, sirei nie a ki rürei vorlie mo, Jihovae siya.

⁷ Siro a lieyie tei vorketuo thekhrü se baluokecü nu nieko kinu teirüu khawa; a nadi puo nu teiperüshü, tsiu nadi kekrei puo nu teiperüshü mo; lie puo nu teirüshü, tsiu teirüshü moketa lieu rüwita.

⁸ Süla rüna keniekese-e dzü krietuo üdi rühou rüna kekrei puo nu vo; derei u kelhuo ngulie mo; sirei nieko rürei a ki vorlie mo, Jihovae siya.

⁹ Ae mha kepeka khu pie nieko va; a nieko zie mu khubelieko bu methuota; kuprie bu nie chiedeboko mu nie olivboko pekawa; sirei nie rürei a ki vorlie mo, Jihovae siya.

¹⁰ Ae Ijipt nu rhiu tuoi thepe ketsepie nieko donu shü; a zhiecha pie nie khriesako dukhriwa; a nie kierko tezeta; sidi a nie razhüchü cieürieketa reu bu nie nyhüki nu si voshü; sirei nie rürei a ki vorlie mo, Jihovae siya.

¹¹ A nieko mia huo pekawa, Kepenuopfüe Sodom mu Gomora pekakewa tuoi, tsiu niekoe miü nunu mezakelie mhie zo; sirei nieko rürei a ki vorlie mo, Jihovae siya.

¹² Süla ae hakemhie chüpie n gei shütuo, he-i Israel; kekreilamonyü a hau n gei chüshütuoü bate, n Kepenuopfü ze keseketuo la dojüliecie, he-i Israel!

¹³ Kekreilamonyü harie, kijüthouko chükeshüu, teikhrie chükeshüu, puo keleko pie themiako pesikeshüu, khise chü pezeikewau, tsiu kijü nu thechü kerükrieko gei tuotuoyakezhau, süu Jihova, krodiko Kepenuopfü sü puo zawe!