Amos 3 - Angami Naga CL (Re-edited) Bible (BSI)

Israel Kephouma mu Siazha

¹ He-i Israelko, Jihovae Ijipt nunu nie kikru ze parkeshü peteu petsou di pukeshü die hau rünyüshücie:

² Kijü nu seyie pedekejüko donu ae nie rübei sikecü zo; süla nie kejokemou pete la a siazha khapie nie tsütuo.

³ Mia kenie-e keseketuo tei chieshü mo di keze tuolie vi me?

⁴ Loshae ketsa nu puo chüteu ba moro mehoshütuo me? Losha nuonuo puo bou nu mhapuorei ngulie moro ruoshütuo me?

⁵ Kijüu gei kebie puorei pethoupie zhü moro, pera ta kebieu nu letuo me? Kebieu nu mhapuorei ma mo di kijü nu rüka siertaya me?

⁶ Nadi nu ketsü khoushü ro, themiako michie bata motuo me? Jihova thuo chüshü mo di kepeka nadiu nu vorlietuo me?

⁷ Niepuu Jihova puo pekhreko pie, puo kituo siedzekesiko pesishü mo di, mhapuorei chüshü mo zo.

⁸ Loshau mehoshüte; supuonie michie mo tuo ga? Niepuu Jihova pushüte; supuonie siedzedie pu mo di balie ta?

⁹ Ashdod nu badiko ki, tsiu Ijipt kijü nu badiko ki pushücie, sidi sie, “Samaria nu Kijüthouu gei nie thuo vo kenguliecie, sidi sünu kebou pezhapie kide chüzhü shi, tsiu kidepuo mia pesekecü u donu ba shi mehoshücie.”

¹⁰ Mha kemezhüu chüketuo si kemoko, Jihovae siya, sükoe mia kemvü chükecü mu mia kede di rügukelieko pie uko badiko nu kengupie ba.

¹¹ Süla Niepuu Jihovae puya: Ngumvümiae kijüu houpfülietatuo, sidi n keyau bierhuowatuo, tsiu n badiko vawatuo.

¹² Jihovae puya: Kuopfheue loshau me nunu puo phi kenie, morei puo nyieto kelakelie tuoi, sütuoi Samaria nu kelhou Israelmiako u yakouke mu u zhü nu keba huo sa kelalietuo.

¹³ Rünyüliecie, sidi Jakob kiu petsoukecü pushücie, Niepuu Jihova, krodiko Kepenuopfüe siya.

¹⁴ Sünhiesü a Israel kejokemouko la puo siazha khashütuo, a Bethel ruosuobako pekatuo, tsiu ruosuoba kiako dathewatuo, sidi süko te kijü tsutatuo.

¹⁵ Ae teisei kiu tsiu teile kiu rei bierhuowatuo; tsiu tsohu pie kechü kiko katatuo, mu ki kezhako puo thela chütatuo, Jihovae siya.