Amos 2 - Angami Naga CL (Re-edited) Bible (BSI)

¹ Jihovae puya: Moab kejokemou se la, tsiu dia la, a siazha khakeshüko rhüwalie lho; kekreilamonyü puoe Edom kediu ruko thepie mige chükewa la.

² Süla a mi ketsepie Moab gei shütuo, mu süu Keriot badiko thewatuo, tsiu Moab-e ruorüi, shiekhoui mu ketsü kekhou pfhe donunu siatatuo;

³ a uko donu kezhako dathewatuo, tsiu puo sa di puo kezhako pete dukhriwatuo, Jihovae siya.

Juda gei Siazha Khashüketuo

⁴ Jihovae puya: Juda kejokemou se la, tsiu dia la, a siazhako rhüwalie lho; kekreilamonyü uko Jihova zho-u khawa, tsiu puo kepetha dieko se balie mote, derei uko puonuoko kevo chau medzi di kemedau thuo uko cha tha kekrüwate.

⁵ Süla a mi ketsepie Juda gei shütuo, mu süu Jerusalem badiko thewatuo.

Israel gei Siazha Khakeshü

⁶ Jihovae puya: Israel kejokemou se la, tsiu dia la, a siazhako rhüwalie lho; kekreilamonyü ukoe rakachü la kemiatho zewa, tsiu phikou puo la ketsopfhümia zewa.

⁷ Ukoe kejümia tsü kedepie nyophe nu shü; tsiu kemezhie ketuomia nepie cha khie shüwa; puo puo mu puo nuoe keze miapfü puo ze, sidi a za kemesau bie perhuwa;

⁸ Ukoe pie khe di priesa thepukelie pfheko pie u zhükhra di ruosuoba khieki zhüya; sidi uko Kepenuopfü ki nu mia kemvü chü di piekelie thepha ma se khrükelie zu krie.

⁹ Sishierei a uko mhodzü nunu Amormia pekawa, puocha rükriepie sedar tuoi zorei, tsiu sükoe phriebo tuoi metei ba rei a pesogei keba puosiu, mu kijü khro puo mieko pekawa.

¹⁰ Siro a Ijipt nunu n ze par, Amormia kijü welietuo üdi cie hiedia rayha nu a n cha tha.

¹¹ Siro a n nuonuo huo bu sier di siedzekesimia chü, tsiu n khriesa huo bu Nazirmia chüshü. Süu chü kethoshü mo me? He-i Israelmiako. Jihovae siya.

¹² Derei nie Nazirko bu zu krie, tsiu siedzekesiko ki pu di, “Nie siedzedie pu hie,” ita.

¹³ Süla a bagei puoe telhakhro puopie tshu di puo kradapfü ketuo tuoi, nieko chü nunu nie kradashütuo.

¹⁴ Kemephrü geinu talie kevi ba motatuo, tsiu kekuomia u kekuo ba sa motatuo, morei kekuomia u kerheiro kelalie lho;

¹⁵ theü seketuomia thalie motatuo, siro tuo kevimia u thuo u kelalie lho, morei kier seketuomia rei u thuo u kelalie lho;

¹⁶ tsiu sünhie kekuomia donu kethepfumia zorei methuo di tatatuo, Jihovae siya.