Amos 1 - Angami Naga CL (Re-edited) Bible (BSI)

¹ Amos, Tekoa nu kuopfheko donu mia puo dieko, puoe Juda kediu Uzia teiki mu Israelmia Joash nuou Jeroboam kediu teiki, kiükishü kevor mhodzü teicie kenie ki Israel dze ngukecüko.

Israel Zanuomiako Siazha Chüshüketuo

² Sitse puo sie: Jihova Zion geinu shiekhoui bate, tsiu Jerusalem nunu puo pfhe phrashü bate; kuopfhemia thutuo nhako rüwita, mu Karmel mezüu sote.

³ Jihovae puya: Damaska kejokemou se la, tsiu dia la, a siazhau khakeshü rhüwalie lho; kekreilamonyü ukoe metevü pie Gilid kerhewate.

⁴ Süla a mi ketsepie Hazael kiu gei shütuo, sidi süue Ben-hadad badiko thewatuo.

⁵ A Damaska kharu seiko bietshewatuo, tsiu Aven Razhau nunu themiako dawatuo, tsiu Beth-eden nu kedithe se kebau dathewatuo; mu Aram themiako miadie chü Kir nu votatuo, Jihovae siya.

⁶ Jihovae puya: Gaza kejokemou se la, tsiu dia la, a siazhako rhüwalie lho; kekreilamonyü ukoe themia seyie pete teze kedie chü vote, süko pie Edom tsüwatuo üdi.

⁷ Süla a mi ketsepie Gaza tsiepfhe gei shütuo, sidi puo kuda kemeteiko thewatuo.

⁸ A Ashdod nu kelhouko dathewatuo, tsiu Ashkelon nunu kedithe se kebau dathewatuo; a a dzie yhapie Ekron petsoutuo, tsiu Filistinmia lhiepie kebako katatuo, Niepuu Jihovae siya.

⁹ Jihovae pucü: Tur kejokemou se la, tsiu dia la, a siazhako rhüwalie lho; kekreilamonyü ukoe themia seyie pete pie Edom tsüwa, sidi siezedzürie kechü rükra mote.

¹⁰ Süla a mi ketsepie Tur sozha gei shütuo, sidi puo badiko thewatuo.

¹¹ Jihovae puya: Edom kejokemou se la, tsiu dia la, a siazhako rhüwalie lho; kekreilamonyü puo zhiecha se puo siezeu whuo mu ngukemezhie va lotsowate; puoe puo nouyieu se sei tuoketa la, tsiu kechachie puo noupfhüu bu bate;

¹² Süla a mi ketsepie Teman gei shütuo, sidi süu Bozra badiko pete thewatuo.

¹³ Jihovae puya: Ammonmia kejokemou se la, tsiu dia la, a siazhako rhüwalie lho; kekreilamonyü ukoe u rieko bie kemeyatuo üdi Gilid nu thenupfümia phoupiemo ketuoko va rhiephawa.

¹⁴ Süla a Raba sozha petsou di mi petushütuo, mi süu puo badiko thewatuo, terhü kechü ki shieshüyakecü tuoi, khriewhi rükhrie kevor nhie tuoishütuo;

¹⁵ sitse uko kediu miadie chü votatuo, puo mu puo khro kezhako rei sa di, Jihovae siya.