Tìtus 1 - An Tiomnadh Nuadh anns an Eadar-Theangachadh Ùr Gàidhlig 2017

¹ Pòl, seirbheiseach Dhè, agus abstol Ìosa Crìosd, a rèir creideamh dhaoine taghte Dhè is eòlas na fìrinne a tha a rèir diadhachd;

² ann an dòchas na beatha shìorraidh a gheall Dia, nach dèan breug, ro linntean tìme,

³ ach a dh'fhoillsich fhacal fhèin anns na h‑amannan iomchaidh san t‑searmonachadh a chaidh earbsadh riumsa a rèir àithne Dhè ar Slànaigheir.

⁴ Gu Tìtus, m' fhìor mhac a rèir creideimh coitchinn: Gràs is sìth o Dhia an t‑Athair agus o Chrìosd Ìosa ar Slànaighear.

A' Suidheachadh Èildearan a Tha a' Gràdhachadh na Tha Math

⁵ B' e a b' adhbhar dhomh d' fhàgail ann an Crete, gun cuireadh tu an òrdugh na chaidh fhàgail gun a dhèanamh agus gun suidhicheadh tu èildearan sa h‑uile baile mar a dh'òrdaich mi dhut.

⁶ Biodh a' leithid gun choire, fear aon bhean, a chuid chloinne creidmheach, saor o chasaid ana‑measarrachd no eas‑ùmhlachd.

⁷ Oir bu chòir do dh'fhear‑coimhid a bhith gun choire, mar stiùbhard Dhè, gun a bhith fèin‑thoileil, no feargach, no na dhrungair, no droch‑nàdarrach, no sanntach air buannachd eas‑onorach,

⁸ ach aoigheil, dèidheil air a' mhath, measarra, ceart, naomh, stuama.

⁹ Cumadh e gu daingeann am facal fìor mar a chaidh a theagasg, airson 's gum bi e comasach air cofhurtachadh le teagasg fallain agus iadsan a tha a' bruidhinn na aghaidh a cheartachadh.

A' Cronachadh nam Muinntir nach Dèan Math

¹⁰ Oir tha mòran ann a tha eas‑umhail, luchd faoin‑chainnt is mealltairean, gu h‑àraidh muinntir an timcheall‑ghearraidh.

¹¹ Tha e riatanach an cur nan tost oir tha iad a' tionndadh thaighean iomlan bun‑os‑cionn, a' teagasg rudan nach bu chòir dhaibh, airson buannachd shuaraich.

¹² Thuirt fear àraidh dhiubhsan, fàidh dhiub' fhèin: “Tha na Cretich an‑còmhnaidh nam breugairean, nan droch bhèistean 's nan gèocairean leisg.”

¹³ Tha an teisteanas seo fìor. Air an adhbhar sin, cronaich gu geur iad, airson 's gum bi iad fallain sa chreideamh,

¹⁴ chan ann a' toirt aire do dh'fhaoinsgeulan Iùdhach is do dh'àithntean dhaoine, a tha a' tionndadh air falbh on fhìrinn.

¹⁵ Dhaibhsan a tha glan, tha a h‑uile sìon glan, ach dhaibhsan a th' air an truailleadh agus nach eil a' creidsinn, chan eil rud sam bith glan, ach tha an inntinn agus an cogais air an truailleadh.

¹⁶ Tha iad a' tagradh gun aithne dhaibh Dia, ach nan gnìomhan tha iad ga àicheadh, oir tha iad gràineil agus eas‑umhail agus gun fheum airson a h‑uile deagh obrach.