Taisbeanadh 5 - An Tiomnadh Nuadh anns an Eadar-Theangachadh Ùr Gàidhlig 2017

An Rolla agus an t‑Uan

¹ Agus chunnaic mi ann an làimh dheis an fhir a bha na shuidhe air an rìgh‑chathair, rolla air a sgrìobhadh air an taobh a‑staigh 's air a chùlaibh, agus a bh' air a sheulachadh le seachd seulachan.

² Agus chunnaic mi aingeal làidir a' gairm ann an guth àrd: “Cò a tha airidh air an rolla fhosgladh agus air a sheulachan a bhriseadh?”

³ Agus cha robh duine comasach, air nèamh no air thalamh, no fon talamh, air an rolla fhosgladh no air sealltainn a‑steach ann.

⁴ Agus bha mi a' caoineadh gu mòr, air sgàth 's nach robh neach sam bith ri fhaighinn a bha airidh air an rolla fhosgladh no air sealltainn air.

⁵ Agus thuirt fear dhe na h‑èildearan rium: “Na caoin, seall, bhuadhaich Leòmhann treubh Iùdah, Freumh Dhaibhidh. Tha esan comasach air an rolla fhosgladh agus a sheachd seulachan fhosgladh.”

⁶ Agus chunnaic mi eadar an rìgh‑chathair agus na ceithir creutairean beòtha, agus ann am measg nan èildearan, Uan mar gum biodh e air a mharbhadh, air an robh seachd adhaircean agus seachd sùilean; is iadsan seachd spioradan Dhè, a th' air an cur dhan t‑saoghal gu lèir.

⁷ Agus thàinig e agus thug e an rolla o làimh dheis an fhir a bha na shuidhe air an rìgh‑chathair.

⁸ Agus nuair a thug e uaithe an rolla, thuit na ceithir creutairean beòtha agus na fichead 's a ceithir èildear mu choinneamh an Uain; agus bha clàrsach agus bobhlaichean òir, a bha làn tùise, aig gach fear dhiubh; is e sin ùrnaighean nan naomh.

⁹ Agus sheinn iad òran ùr, ag ràdh: “Is airidh thusa air an rolla a ghabhail agus air a sheulachan fhosgladh, oir chaidh do mharbhadh agus cheannaich thu daoine do Dhia led fhuil, às gach treubh is teanga is sluagh is nàisean.

¹⁰ Agus rinn thu iad nan rìoghachd agus nan sagartan dhar Dia, agus rìoghaichidh iad air an talamh.”

¹¹ Agus chunnaic mi agus chuala mi an guth aig mòran ainglean timcheall air an rìgh‑chathrach, agus aig na creutairean beòtha agus aig na h‑èildearan, agus b' e an àireamh aca, deich mìle uair deich mìle, agus mìltean de mhìltean,

¹² ag ràdh le guth àrd: “Is airidh an t‑Uan a chaidh a mharbhadh, air cumhachd is beairteas is gliocas is neart is urram is glòir is moladh, fhaighinn.”

¹³ Agus a h‑uile creutair a th' air nèamh 's air an talamh agus fon talamh 's air a' mhuir agus a h‑uile nì a th' annta, chuala mi iad ag ràdh: “Dhàsan a tha na shuidhe air an rìgh‑chathair agus dhan Uan gu robh am moladh 's an t‑urram agus a' ghlòir 's an tighearnas gu saoghal nan saoghal.”

¹⁴ Agus bha na ceithir creutairean beòtha ag ràdh, “Amen”, agus thuit na h‑èildearan sìos agus rinn iad adhradh.