Taisbeanadh 19 - An Tiomnadh Nuadh anns an Eadar-Theangachadh Ùr Gàidhlig 2017

Haleluia Thrì‑Fhillte thar Tuiteam Bhàbiloin

¹ Às dèidh nan rudan seo chuala mi, mar gum biodh, guth àrd sluaigh mhòir air nèamh, ag ràdh: “Haleluia! Buinidh slàinte is glòir is cumhachd dhar Dia.

² Oir tha a bhreitheanais fìor agus fìreanta, oir thug e breith air an strìopaich mhòir a thruaill an talamh le a strìopachas. Agus rinn e dìoghaltas oirre airson fuil a sheirbheiseach fo a làimh‑se.”

³ Agus an dara turas thuirt iad: “Haleluia! agus chaidh a toit suas gu saoghal nan saoghal.”

⁴ Agus thuit na fichead 's a ceithir èildear sìos agus na ceithir creutairean beòtha is rinn iad adhradh do Dhia a tha na shuidhe air an rìgh‑chathair, ag ràdh: “Amen, haleluia!”

⁵ Agus thàinig guth a‑mach on rìgh‑chathair, ag ràdh: “Molaibh ar Dia, a sheirbheisich gu lèir agus sibhse air a bheil eagal‑san, an dà chuid, beag is mòr.”

⁶ Agus chuala mi, mar gum biodh, fuaim sluagh mòr agus, mar gum biodh, fuaim mhòran uisgeachan agus, mar gum biodh, fuaim thàirneanach cumhachdach, ag ràdh: “Haleluia! oir tha an Tighearna ar Dia, an t‑Uile‑Chumhachdach, a' riaghladh thairis oirnn.

⁷ Dèanamaid aoibhneas is dèanamaid toileachas, agus thoireamaid a' ghlòir dhàsan, oir tha banais an Uain air tighinn, agus tha a bhean‑san air i fhèin ullachadh.

⁸ Agus chaidh ceadachadh dhìse a bhith air a h‑èideadh ann an anart mìn, soilleir is fìorghlan.” (Oir 's e an t‑anart mìn obraichean fìreanta nan naomh.)

⁹ Agus thuirt e rium, “Sgrìobh! Is beannaichte iadsan a th' air an gairm gu suipear‑bainnse an Uain,” agus thuirt e rium, “Is iad seo faclan fìor ar Dia.”

¹⁰ Agus thuit mi mu choinneamh a chasan gus adhradh a dhèanamh dha, agus thuirt e rium, “Faic nach dèan thu sin, oir is e co‑sheirbheiseach dhut a th' annamsa agus dhad bhràithrean, iadsan aig a bheil teisteanas Ìosa. Dèan adhradh do Dhia, oir is e teisteanas Ìosa spiorad na fàidheadaireachd.”

Am Marcaiche air an Each Gheal a' Buadhachadh thar na Bèiste

¹¹ Agus chunnaic mi nèamh air fhosgladh, agus seall, each geal agus b' e Dìleas is Fìor an t‑ainm a bh' airsan a bha na shuidhe air, agus ann am fìreantachd tha e a' toirt breith 's a' cogadh.

¹² Agus bha a shùilean mar lasair theine agus air a cheann bha mòran chrùintean, esan aig an robh ainm sgrìobhte air, nach b' aithne do neach sam bith ach e fhèin.

¹³ Agus bha e às dèidh a bhith air èideadh le bad aodaich a chaidh a thumadh ann am fuil, agus b' e an t‑ainm a bh' air a ghabhail air, Facal Dhè.

¹⁴ Agus bha na h‑airmailtean air nèamh ga leantainn air eich gheala, 's iad air an èideadh ann an anart mìn, geal is fìorghlan.

¹⁵ Agus às a bheul chaidh claidheamh geur a‑mach, airson 's gum buaileadh e na nàiseanan, agus nì e am buachailleachd le slat iarainn, agus tha e a' stampadh amar‑fìona corraich fearg Dhè, an t‑Uile‑Chumhachdach.

¹⁶ Agus air aodach‑san agus air a shliasaid bha ainm air a sgrìobhadh: RÌGH NAN RÌGHREAN AGUS TIGHEARNA NAN TIGHEARNAN.

¹⁷ Agus chunnaic mi aon aingeal na sheasamh sa ghrèin agus dh'èigh e le guth àrd, ag ràdh ris an eunlaith uile a bha air sgèith ann am meadhan an adhair, “Thigibh, cruinnichibh sib' fhèin gu suipear mhòr Dhè,

¹⁸ gus an ith sibh feòil rìghrean is feòil àrd‑oifigearan is feòil dhaoine làidir is feòil each 's an fheòil acasan a tha nan suidhe orra agus feòl nan uile, an dà chuid saor is daor, agus beag is mòr.”

¹⁹ Agus chunnaic mi a' bhiast is rìghrean na talmhainn agus na h‑armailtean aca air an cruinneachadh gus cogadh a dhèanamh na aghaidh‑san a bha na shuidhe air an each agus leis na h‑airmailtean aigesan.

²⁰ Agus bha a' bhiast air a glacadh, agus còmhla rithe, am fàidh‑brèige a rinn comharraidhean ma coinneamh, leis an do mheall e iadsan a bh' air comharra na bèiste fhaighinn agus iadsan a rinn adhradh dha h‑ìomhaigh. Agus chaidh an dithis aca a thilgeil beò dhan loch theine a tha a' losgadh le pronnasg.

²¹ Agus chaidh an còrr a mharbhadh leis a' chlaidheamh a tha a' tighinn a‑mach à beul an fhir a tha na shuidhe air an each. Agus chaidh an eunlaith gu lèir a shàsachadh leis an fheòil aca.