Taisbeanadh 13 - An Tiomnadh Nuadh anns an Eadar-Theangachadh Ùr Gàidhlig 2017

¹ Agus sheas e air gainmheach na fairge. Agus chunnaic mi biast ag èirigh às a' mhuir, air an robh deich adhaircean is seachd cinn, agus air a h‑adhaircean, deich crùintean, agus air a cinn, ainmean toibheumach.

A' Bhiast a‑mach às a' Mhuir

² Agus bha a' bhiast a chunnaic mi mar liopard agus a casan mar fheadhainn mathain, agus a beul mar bheul leòmhainn agus thug an dràgon dhi a chumhachd‑san agus a rìgh‑chathair‑san agus ùghdarras mòr.

³ Agus bha aon dhe na cinn aice mar gun robh e air a lotadh gu bàs. Agus chaidh an lot‑bàis aice a shlànachadh, agus ghabh an talamh gu lèir iongnadh, a' leantainn às dèidh na bèiste.

⁴ Agus rinn iad adhradh dhan dràgon, air sgàth 's gun tug e ùghdarras dhan bhèist. Agus rinn iad adhradh dhan bhèist, ag ràdh, “Cò a tha coltach ris a' bhèist?” agus “Cò a tha comasach air cogadh na h‑aghaidh?”

⁵ Agus chaidh beul a thoirt dhi ag ràdh rudan mòra is toibheuman. Agus chaidh ùghdarras a thoirt dhi airson obrachadh ceathrad mìos is a dhà.

⁶ Agus dh'fhosgail i a beul airson toibheum a thoirt an aghaidh Dhè, gus toibheum a thoirt dha ainm‑san agus a phàillean‑san agus iadsan a tha a' còmhnaidh air nèamh.

⁷ Agus chaidh a cheadachadh dhi cogadh a dhèanamh an aghaidh nan naomh agus buaidh fhaighinn thairis orra, agus chaidh ùghdarras a thoirt dhi thar a h‑uile treubh is sluagh is teanga is nàisean.

⁸ Agus nì a h‑uile neach a tha a' còmhnaidh air an talamh adhradh dhi, iadsan aig nach eil an ainmean sgrìobhte ann an leabhar‑beatha an Uain, a chaidh a mharbhadh o thoiseach an t‑saoghail.

⁹ Ma tha cluas aig neach sam bith, èisteadh e.

¹⁰ Ma tha neach sam bith gus a dhol am braighdeanas, thèid e am braighdeanas. Ma tha neach sam bith gu bhith air a mharbhadh leis a' chlaidheamh, thèid a mharbhadh leis a' chlaidheamh. Ann an seo tha leanaltas is creideamh nan naomh.

A' Bhiast a‑mach às an Talamh

¹¹ Agus chunnaic mi biast eile a' tighinn a‑nìos às an talamh agus bha dà adhairc oirre mar uan, agus bha i a' bruidhinn mar dhràgon.

¹² Agus tha i a' cleachdadh uile ùghdarras na ciad bèiste na làthair, agus thug i air an talamh agus orrasan a tha a' còmhnaidh ann, adhradh a dhèanamh dhan chiad bhèist, a fhuair slànachaidh airson a lot‑bàis.

¹³ Agus rinn i comharraidhean mòra, gus an robh i fiù 's a' toirt air teine tighinn a‑nuas o nèamh gu talamh, mu choinneamh dhaoine.

¹⁴ Agus bha i a' mealladh na feadhna a bha a' còmhnaidh air an talamh, tro na comharraidhean a chaidh a thoirt dhi, airson an dèanamh mu choinneamh na bèiste, ag ràdh riuthasan a tha a' còmhnaidh air an talamh ìomhaigh a dhèanamh dhen bhèist, aig an robh lot a' chlaidheimh agus a dh'fhan beò.

¹⁵ Agus chaidh ceadachadh dhi anail a thoirt do dh'ìomhaigh na bèiste, gus eadhon am bruidhneadh ìomhaigh na bèiste, agus gus an adhbhraicheadh i gum biodh na h‑uimhir 's nach toireadh adhradh do dh'ìomhaigh na bèiste, air am marbhadh.

¹⁶ Agus bha i a' toirt air beag is mòr, air beairteach is bochd, agus air saor is daor, gum biodh comharra air a thoirt dhaibh air an làimh dheis aca no air na bathaisean aca;

¹⁷ agus nach biodh duine sam bith an comas ceannach no reic, ach a‑mhàin esan aig a bheil an comharra, ainm na bèiste, no àireamh a h‑ainme.

¹⁸ An seo tha gliocas: esan aig a bheil tuigse obraicheadh e a‑mach àireamh na bèiste, oir 's e àireamh duine a th' ann, agus 's e an t‑àireamh aige sia ceud, seasgad 's a sia.