Taisbeanadh 11 - An Tiomnadh Nuadh anns an Eadar-Theangachadh Ùr Gàidhlig 2017

An Dithis Fhianaisean

¹ Agus chaidh slat‑tomhais a thoirt dhomh coltach ri bata, ag ràdh, “Èirich agus tomhais teampall Dhè, agus an altair, agus iadsan a tha ag adhradh ann.

² Ach fàg a‑mach a' chùirt a‑muigh dhen teampall agus na tomhais i, oir bha i air a toirt dha na Cinnich; agus stampaidh iad am baile naomh fon casan fad ceathrad mìos 's a dhà.

³ Agus bheir mi ùghdarras dhan dithis fhianaisean agam, agus nì iad fàidheadaireachd airson mìle, dà cheud agus seasgad latha, 's iad air an èideadh ann an sac‑aodach.”

⁴ 'S iad seo an dà chraobh‑ola agus an dà lampair a tha nan seasamh air beulaibh Tighearna na talmhainn.

⁵ Agus ma mhiannaicheas neach sam bith cron a dhèanamh orra, thig teine às am beul agus sgriosaidh e na nàimhdean aca; agus ge b' e an neach a mhiannaicheas cron a dhèanamh orra, mar sin feumaidh e a bhith air a mharbhadh.

⁶ Tha cumhachd aig an fheadhainn seo nèamh a dhùnadh, gus nach tuit uisge ann an làithean am fàidheadaireachd, agus tha cumhachd aca thairis air na h‑uisgeachan airson an tionndadh gu fuil agus airson an talamh a bhualadh leis a h‑uile plàigh cho tric 's a thoilicheas iad.

⁷ Agus nuair a chrìochnaicheas iad an teisteanas, nì a' bhiast a thig a‑nìos à sloc na h‑Àibheis cogadh leotha, agus buadhaichidh i thairis orra agus marbhaidh i iad.

⁸ Agus bidh an cuirp air sràidean a' bhaile mhòir ris an canar gu spioradail Sodom 's an Èipheit, far an robh an Tighearna‑san cuideachd air a cheusadh.

⁹ Agus chì cuid de dhaoine is de threubhan is de theangannan is de nàiseanan an cuirp trì gu leth latha, is cha cheadaich iad gun tèid an cuirp a chur ann an tuam.

¹⁰ Agus nì iadsan a tha a' còmhnaidh air an talamh gàirdeachas thairis orra agus nì iad àbhachdas is cuiridh iad tiodhlacan gu càch‑a‑chèile, on a chràidh an dà fhàidh seo iadsan a tha a' fuireach air an talamh.

¹¹ Ach às dèidh nan trì latha gu leth, chaidh anail beatha o Dhia a‑steach annta agus sheas iad suas air an casan, agus thuit eagal mòr orrasan a chunnaic iad.

¹² Agus chuala iad guth àrd o nèamh ag ràdh riutha, “Thigibh a‑nìos.” Agus chaidh iad suas a nèamh ann an sgòth, agus chunnaic an nàimhdean iad.

¹³ Agus aig an àm sin thachair crith‑thalmhainn mhòr agus thuit an deicheamh pàirt dhen bhaile agus chaidh seachd mìle pearsa a mharbhadh anns a' chrith‑thalmhainn, agus bha eagal air a' chòrr aca agus thug iad glòir do Dhia nèimh.

¹⁴ Chaidh an dara truaighe seachad, seall, tha an treas truaighe a' tighinn gu luath.

An t‑Seachdamh Trombaid

¹⁵ Agus shèid an seachdamh aingeal an trombaid, agus bha guthan àrda ann an nèamh ag ràdh: “Tha rìoghachd an t‑saoghail air tighinn gu bhith na rìoghachd ar Tighearna agus a Chrìosd‑san, agus riaghlaidh e gu saoghal nan saoghal.”

¹⁶ Agus thuit na fichead 's a ceithir èildear a tha nan suidhe mu choinneamh Dhè – air na rìgh‑chathraichean aca – air an aghaidhean is rinn iad adhradh do Dhia,

¹⁷ ag ràdh: “Tha sinn a' toirt taing dhutsa a Thighearna Dhia, an t‑Uile‑Chumhachdach, a tha agus a bha, oir tha thusa air do chumhachd mòr a ghabhail agus air riaghladh.

¹⁸ Agus bha na Cinnich feargach, agus thàinig d' fhearg‑sa agus àm breitheanas nam mairbh agus airson duais a thoirt dhad sheirbheisich na fàidhean, agus dha na naoimh agus dhaibhsan air a bheil eagal d' ainm, an fheadhainn bheaga is mhòra; agus airson iadsan a sgrios a tha a' sgrios na talmhainn.”

¹⁹ Agus bha teampall Dhè air fhosgladh air nèamh agus bha àirc a choicheangail‑san air a faicinn na theampall, agus bha boillsgidhean dhealanach ann is fuaimean is tàirneanaich is crith‑thalmhainn is clachan‑meallain mòra.