Ròmanaich 8 - An Tiomnadh Nuadh anns an Eadar-Theangachadh Ùr Gàidhlig 2017

Beatha tron Spiorad

¹ Mar sin, chan eil dìteadh sam bith a‑nis ann dhaibhsan a th' ann an Crìosd Ìosa.

² Oir tha lagh Spiorad na beatha, ann an Crìosd Ìosa, air do shaoradh o lagh a' pheacaidh agus a' bhàis.

³ Oir rinn Dia an rud nach b' urrainn dhan lagh – air a lagachadh leis an fheòil – a dhèanamh, a' cur a Mhic fhèin ann an coltas feòla peacaich agus airson peacaidh, dhìt e am peacadh san fheòil,

⁴ airson 's gum biodh iarrtas fìreanta an lagha air a choileanadh annainne, a tha a' coiseachd chan ann a rèir na feòla, ach a rèir an Spioraid.

⁵ Oir tha iadsan a tha beò a rèir na feòla a' suidheachadh an inntinnean air rudan na feòla, ach iadsan a tha beò a rèir an Spioraid air rudan an Spioraid.

⁶ Tha dòigh smaoineachaidh na feòla na bàs, ach tha dòigh smaoineachaidh an Spioraid na beatha 's na sìth;

⁷ oir tha dòigh smaoineachaidh na feòla nàimhdeil do Dhia, oir chan eil i umhail do lagh Dhè, cha mhotha as urrainn dhi a bhith,

⁸ agus iadsan a tha anns an fheòil, chan urrainn dhaibh Dia a thoileachadh.

⁹ Chan eil sibhse, ge‑tà, anns an fheòil ach anns an Spiorad, ma tha Spiorad Dhè dha‑rìribh a' còmhnaidh annaibh. Ach mura h‑eil Spiorad Chrìosd aig neach sam bith, cha bhuin e dha.

¹⁰ Ach ma tha Crìosd annaibh, ged a tha a' bhodhaig marbh air sgàth peacaidh, tha an Spiorad beò air sgàth fìreantachd.

¹¹ Ma tha an Spiorad aigesan a thog Ìosa o na mairbh a' còmhnaidh annaibh, bheir esan a thog Crìosd o na mairbh cuideachd beatha dhar bodhaigean bàsmhor, tro chòmhnaidh an Spioraid annaibh.

¹² Mar sin, a bhràithrean, tha sinn fo fhiachan, chan ann dhan fheòil, airson a bhith beò a rèir na feòla.

¹³ Oir ma bhios sibh beò a rèir na feòla, feumaidh sibh bàsachadh, ach ma chuireas sibh, tron Spiorad, gu bàs gnìomhan na bodhaige, bidh sibh beò.

¹⁴ Oir iadsan uile a th' air an treòrachadh le Spiorad Dhè is iad sin mic Dhè.

¹⁵ Oir cha d' fhuair sibh spiorad na tràilleachd a‑rithist airson tilleadh gu eagal, ach fhuair sibh spiorad na h‑uchd‑mhacachd, tron a bheil sibh ag èigheach, “Abba! Athair!”

¹⁶ Tha an Spiorad fhèin a' dèanamh fianais còmhla ri ar spiorad‑ne gur sinne clann Dhè,

¹⁷ agus mas clann, mar sin oighreachan – oighreachan do Dhia agus co‑oighreachan cuide ri Crìosd, mas e 's gum fulaing sinn dha‑rìribh còmhla ris, airson 's gun tèid ar glòrachadh còmhla ris.

Fulangas an Ama seo agus a' Ghlòir ri Thighinn

¹⁸ Oir tha mi a' meas nach eil fulangais a cheart ama seo airidh air a bhith air an coimeas ris a' ghlòir a tha gu bhith air a thaisbeanadh dhuinn.

¹⁹ Oir tha an cruthachadh a' feitheamh le miann dealasach airson taisbeanadh clann Dhè.

²⁰ Oir bha an cruthachadh air a chur fo dhìomhanas, cha b' ann gu deònach, ach air sgàth esan a chuir fo cheannsa e, ann an dòchas

²¹ gum bi fiù 's an cruthachadh fhèin air a shaoradh o dhaorsa na truaillidheachd gu saorsa glòir clann Dhè.

²² Oir is aithne dhuinn gu bheil an cruthachadh gu lèir air a bhith ag osnaich còmhla ann am piantan aiseid gus an àm seo.

²³ Agus chan e seo a‑mhàin, ach tha sinne cuideachd, aig a bheil ciad‑thoradh an Spioraid, ag osnaich annainn fhèin, a' feitheamh gu dealasach ri uchd‑mhacachd mar mhic – ath‑cheannach ar cuirp.

²⁴ Oir anns an dòchas seo chaidh ar sàbhaladh. Ach dòchas a chithear, chan e dòchas a th' ann. Oir a bheil dòchas aig an duine airson na chì e?

²⁵ Ach ma tha sinn an dòchas airson an rud nach eil sinn a' faicinn, tha sinn a' feitheamh gu foighidneach air a shon.

²⁶ Agus san aon dòigh cuideachd, tha an Spiorad gar cuideachadh nar laigse. Oir chan aithne dhuinn ciamar a nì sinn ùrnaigh mar bu chòir dhuinn, ach tha an Spiorad fhèin a' dèanamh eadar‑ghuidhe air ar son le osnaich thar bhriathran.

²⁷ Agus is aithne dhàsan a tha a' rannsachadh nan cridheachan dè a th' ann an inntinn an Spioraid, a chionn 's gu bheil an Spiorad a' dèanamh eadar‑ghuidhe airson nan naomh a rèir rùn Dhè.

Barrachd air Luchd‑Buaidh

²⁸ Agus is aithne dhuinn gun co‑obraich a h‑uile rud airson maith na feadhna aig a bheil gràdh do Dhia, dhaibhsan a th' air an gairm a rèir a rùin‑san.

²⁹ Oir iadsan a ro‑aithnich e, ro‑òrdaich e cuideachd gus a bhith air an co‑chumadh ri ìomhaigh a Mhic, airson 's gum biodh esan na chiad‑ghin am measg mhòran bhràithrean.

³⁰ Agus an fheadhainn a ro‑òrdaich e, iadsan ghairm e cuideachd, agus an fheadhainn a ghairm e, iadsan dh'fhìreanaich e cuideachd, agus an fheadhainn a dh'fhìreanaich e, iadsan ghlòraich e cuideachd.

³¹ Dè mar sin a chanas sinn ri na rudan sin? Ma tha Dia air ar son, cò as urrainn a bhith nar n‑aghaidh?

³² Esan nach do chaomhain a Mhac fhèin, ach a thug thairis e air ar son‑ne uile, ciamar còmhla ris‑san nach toir e cuideachd dhuinn gu gràsmhor a h‑uile rud?

³³ Cò a bheir casaid sam bith an aghaidh luchd taghte Dhè? Is e Dia a dh'fhìreanaicheas.

³⁴ Cò a dhìteas? Is e Crìosd Ìosa a fhuair bàs – seadh barrachd air a sin, a bh' air a thogail, a tha aig deas‑làimh Dhè, a tha cuideachd a' dèanamh eadar‑ghuidhe air ar son.

³⁵ Cò a sgaras sinn o ghaol Chrìosd? An dèan trioblaid, no àmhghar, no geur‑leanmhainn, no gorta, no lomnochd, no cunnart, no claidheamh?

³⁶ Mar a tha e sgrìobhte: “Air do shon‑sa tha sinn air ar marbhadh fad an latha; tha sinn air ar meas mar chaoraich airson marbhaidh.”

³⁷ Ach anns na rudan seo uile tha sinn a' toirt barrachd air buaidh troimhesan a thug gaol dhuinn.

³⁸ Oir tha mi dearbhte nach bi: bàs no beatha, no ainglean no riaghladairean, no rudan a tha an làthair no rudan a tha ri thighinn, no cumhachdan,

³⁹ no àirde, no doimhne, no dad cruthaichte sam bith eile, an comas air ar sgaradh o ghaol Dhè a th' ann an Crìosd Ìosa ar Tighearna.