Ròmanaich 4 - An Tiomnadh Nuadh anns an Eadar-Theangachadh Ùr Gàidhlig 2017

Abrahàm air Fhìreanachadh le Creideamh

¹ Dè, mar sin, a chanas sinn a fhuair Abrahàm, ar sinnsear a rèir na feòla?

² Oir nam b' ann le obraichean a bha Abrahàm air fhìreanachadh, bhiodh bòst aige, ach chan ann a thaobh Dhè.

³ Oir dè a tha na Sgriobtaran ag ràdh? “Chreid Abrahàm Dia, agus bha sin air a mheas dha mar fhìreantachd.”

⁴ A‑nis dhan fhear a nì obair, chan eil a thuarastal air a chunntadh mar thiodhlaic, ach mar dhlighe.

⁵ Ach dhan fhear nach dèan obair ach a tha ag earbsa san aon a dh'fhìreanaicheas nam mì‑dhiadhaidh, tha a' chreideamh air a chunntadh mar fhìreantachd,

⁶ dìreach mar a tha Daibhidh cuideachd a' bruidhinn mu bheannachadh an fhir dham bheil Dia a' cunntadh fìreantachd às aonais obraichean:

⁷ “Is beannaichte iadsan a fhuair mathanas airson an obraichean mì‑riaghailteach, agus aig a bheil am peacaidhean air an còmhdachadh.

⁸ Is beannaichte am fear nach cunntais an Tighearna a pheacadh na aghaidh.”

⁹ A bheil am beannachadh seo, ma‑thà, dhan timcheall‑ghearradh, no cuideachd dhan neo‑thimcheall‑ghearradh? Tha sinne ag ràdh, “Bha creideamh air a chunntadh do dh'Abrahàm mar fhìreantachd.”

¹⁰ Ciamar mar sin a bha e air a chunntadh dha? Air a thimcheall‑ghearradh no neo‑thimcheall‑gheàrrte? Chan ann ann an timcheall‑ghearradh ach ann an neo‑thimcheall‑ghearradh.

¹¹ Agus fhuair e comharra an timcheall‑ghearraidh mar sheula fìreantachd a chreideimh, fhad 's a bha e san neo‑thimcheall‑ghearradh, airson 's gum biodh e na athair dhaibhsan uile a chreid nuair a bha iad san neo‑thimcheall‑ghearradh, airson 's gum biodh fìreantachd air a chunntadh dhaibhsan cuideachd,

¹² agus airson esan a dhèanamh na athair dhaibhsan a tha dhen timcheall‑ghearradh, nach eil a‑mhàin air an timcheall‑ghearradh, ach a tha cuideachd a' coiseachd ann an ceuman a' chreideimh a bh' aig ar n‑athair Abrahàm mus robh e anns an timcheall‑ghearradh.

¹³ Oir cha b' ann tron lagh a thàinig an gealladh gu Abrahàm agus a shliochd – gum biodh e na oighre dhen t‑saoghal – ach tro fhìreantachd a' chreideimh.

¹⁴ Oir ma 's iadsan a chumas ris an lagh a tha gu bhith nan oighreachan, tha creideamh na neoni agus an gealladh gun èifeachd.

¹⁵ Oir tha an lagh a' toirt corraich gu buil, ach far nach eil lagh chan eil briseadh lagha.

¹⁶ Mar sin tha e o chreideamh, airson 's gum faod an gealladh a bhith air a dhèanamh cinnteach dhan t‑sìol aige gu lèir, a rèir gràis, chan ann a‑mhàin dhaibhsan a tha dhen lagh ach cuideachd dhaibhsan a tha de chreideamh Abrahàim, a tha na athair dhuinn uile,

¹⁷ mar a tha e sgrìobhte: “Tha mi air do dhèanamh nad athair do mhòran nàiseanan” – ann an làthaireachd an Dè san do chreid e, a tha a' toirt beatha dha na mairbh agus a' gairm gu bith, na rudan nach eil ann.

¹⁸ Ann an dòchas chreid e an aghaidh dòchais, gun tigeadh e gus a bhith na athair do mhòran nàiseanan, mar a chaidh innse dha, “Mar seo bidh do shìol.”

¹⁹ Gun a bhith a' fàs lag ann an creideamh nuair a smaoinich e air a chorp fhèin, a bha cho math ri marbh – on a bha e mu cheud bliadhna a dh'aois – no nuair a smaoinich e mu cho marbh 's a bha broinn Shàra.

²⁰ Is cha tug eas‑creideamh sam bith air a bhith fo imcheist a thaobh gealladh Dhè, ach dh'fhàs e làidir na chreideamh, a' toirt glòir do Dhia,

²¹ is làn‑chinnteach gun robh Dia comasach air an rud a gheall e a dhèanamh.

²² Is ann airson seo a bha a chreideamh “air a chunntadh dha mar fhìreantachd.”

²³ Ach cha robh na briathran “air a chunntadh dha” air an sgrìobhadh dhàsan a‑mhàin,

²⁴ ach air ar son‑ne cuideachd. Bidh e air a chunntadh dhuinne cuideachd – a tha a' creidsinn annsan a thog Ìosa ar Tighearna suas o na mairbh,

²⁵ a bh' air a thoirt thairis airson ar peacaidhean agus a bh' air a thogail airson ar fìreanachaidh.