Ròmanaich 16 - An Tiomnadh Nuadh anns an Eadar-Theangachadh Ùr Gàidhlig 2017

Fàiltean Phearsanta

¹ Tha mi a' moladh dhuibh ar piuthar Phoibe, searbhanta dhan eaglais ann an Cenchrèa,

² airson 's gun gabh sibh rithe san Tighearna ann an dòigh a tha airidh air na naoimh, agus gun seas sibh leatha ann an ge b' e dè a tha a dhìth oirre uaibh, oir tha i air a bhith na neach‑taice do mhòran, agus dhòmhsa fhèin.

³ Cuiribh fàilte air Prisca is Acuila, mo cho‑luchd‑obrach ann an Ìosa Crìosd,

⁴ a chuir an amhaichean fhèin ann an cunnart airson mo bheatha‑sa, dham bheil, chan e a‑mhàin mise, ach eaglaisean nan Cinneach gu lèir a' toirt taing cuideachd.

⁵ Cuiribh fàilte cuideachd air an eaglais san taigh aca. Cuiribh fàilte air Epenetas as gràdh leamsa, a bha na chiad‑thoradh do Chrìosd ann an Àisia.

⁶ Cuiribh fàilte air Màiri, a th' air obrachadh gu cruaidh air ur son.

⁷ Cuiribh fàilte air Andronichus agus air Iunias, mo luchd‑dàimh agus mo cho‑phrìosanaich. Tha iad cliùiteach am measg nan abstol, agus bha iad ann an Crìosd romhamsa.

⁸ Cuiribh fàilte air Ampliatus, as gràdh leam san Tighearna.

⁹ Cuiribh fàilte air Urbanus, ar co‑obraiche ann an Crìosd, agus air Stachis as gràdh leam.

¹⁰ Cuiribh fàilte air Apelles, a th' air a dheagh mheasadh ann an Crìosd. Cuiribh fàilte orrasan a bhuineas do theaghlach Aristobuluis.

¹¹ Cuiribh fàilte air Herodion, mo neach‑dàimh. Cuiribh fàilte orrasan san Tighearna a bhuineas do theaghlach Narcisuis.

¹² Cuiribh fàilte air Triphena is Triphòsa iadsan a tha nan luchd‑obrach san Tighearna. Cuiribh fàilte air Persis as gràdh leam, a th' air obair chruaidh a dhèanamh san Tighearna.

¹³ Cuiribh fàilte air Rùfus, taghte san Tighearna; agus a mhàthair, a tha na màthair dhòmhsa.

¹⁴ Cuiribh fàilte air Asincritus, Phlegon, Hermes, Patrobas, Hermas, is na bràithrean a tha còmhla riutha.

¹⁵ Cuiribh fàilte air Philologus, Iulia, Nereus agus a phiuthar, is Olimpas, agus còmhla riuthasan na naoimh gu lèir.

¹⁶ Cuiribh fàilte air a chèile le pòig naoimh. Tha eaglaisean Chrìosd a' cur fàilte oirbh.

¹⁷ Tha mi a' cur ìmpidh oirbh, a bhràithrean, an aire a thoirt orrasan a tha a' dèanamh sgaraidhean is ceapan‑tuislidh a tha an aghaidh an teagaisg a dh'ionnsaich sibh; seachnaibh iad.

¹⁸ Oir chan eil an leithidean sin a' dèanamh seirbheis dhar Tighearna Crìosd, ach dham miannan fhèin, agus le còmhradh mìn is miodal tha iad a' mealladh cridheachan nan neoichiontach.

¹⁹ Oir tha aithris ur n‑ùmhlachd‑se air tighinn chun na h‑uile, mar sin tha mi a' dèanamh gàirdeachais mur deidhinn, ach tha mi airson 's gum bi sibh glic a thaobh dè a tha math, agus ionraic a thaobh dè a tha olc.

²⁰ Brùthaidh Dia na sìthe a dh'aithghearr an Sàtan for casan. Gun robh gràs ar Tighearna Ìosa còmhla ribh.

²¹ Tha Timòteus, mo cho‑obraiche, a' cur fàilte oirbh; tha agus Lucius is Iàson is Sosipater, mo luchd‑dàimh.

²² Tha mise Tertius, a sgrìobh an litir seo, a' cur fàilte oirbh san Tighearna.

²³ Tha Gaius, a tha a' toirt aoigheachd dhòmhsa 's dhan eaglais gu lèir, a' cur fàilte oirbh. Tha Erastus, stiùbhard a' bhaile, agus Cuartus, am bràthair, a' cur fàilte oirbh.

²⁴ Gu robh gràs ar Tighearna Ìosa Crìosd còmhla ribh uile. Amen.

²⁵ A‑nis dhàsan a tha comasach air sibhse a stèidheachadh a rèir mo shoisgeul‑sa agus searmonachadh Ìosa Crìosd, a rèir taisbeanadh an dìomhaireachd a bh' air a chumail falaichte airson linntean fada,

²⁶ ach a chaidh fhoillseachadh a‑nis agus tro Sgriobtaran nam fàidhean, a chaidh a dhèanamh aithnichte dhan a h‑uile nàisean, a rèir àithne an Dè shìorraidh airson ùmhlachd a' chreideimh –

²⁷ do Dhia a tha a‑mhàin glic, gu robh glòir tro Ìosa Crìosd gu sìorraidh. Amen.