Ròmanaich 12 - An Tiomnadh Nuadh anns an Eadar-Theangachadh Ùr Gàidhlig 2017

Ìobairtean Bheò

¹ Tha mi a' guidhe oirbh mar sin, a bhràithrean, tro thròcairean Dhè, ur bodhaigean a nochdadh nam beò‑ìobairt, naomh is iomchaidh do Dhia, 's e sin ur n‑adhradh spioradail.

² Na bithibh air ur cumadh ris an t‑saoghal seo, ach bithibh air ur cruth‑atharrachadh tro ath‑nuadhachadh ur n‑inntinn, airson 's gun dearbh sibh dè toil Dhè – dè a tha math is iomchaidh is coileanta.

³ Oir leis a' ghràs a chaidh a thoirt dhomh, tha mi ag ràdh ris a h‑uile neach nur measg gun a bhith a' smaoineachadh ma dheidhinn fhèin nas àirde na bu chòir dha, ach a bhith a' smaoineachadh le breithneachadh sòbarra, gach neach a rèir an tomhas creideimh a tha Dia air a shònrachadh.

⁴ Oir mar ann an aon bhodhaig a tha mòran bhall againn, agus nach eil an aon obair aig a h‑uile ball

⁵ mar sin sinne, a tha nar mòran, tha sinn nar n‑aon bhodhaig ann an Crìosd, agus fa leth nar buill de chàch‑a‑chèile.

⁶ Tha tiodhlacan againn a tha eadar‑dhealaichte a rèir a' ghràis a chaidh a thoirt dhuinn: mas e fàidheadaireachd, a rèir tomhas ar creideimh;

⁷ mas e seirbheis, nar seirbheis; an neach a theagaisgeas, na theagasg;

⁸ an neach a nì earail, na earalachadh; an neach a bhuilicheas, ann am fialaidheachd; an neach a threòraicheas, gu dìcheallach; an neach a nì gnìomhan tròcaireach, gu sunndach.

Gràdh

⁹ Biodh gràdh gun cheilg. Biodh gràin agaibh dha na tha olc; cumaibh grèim daingeann air na tha math.

¹⁰ Ann an gràdh bràithreil gràdhaichibh a chèile. Ann an urram thoiribh àite dha chèile.

¹¹ Ann an eud na bithibh leisg, ann an spiorad bithibh dùrachdach, dhan Tighearna a' dèanamh seirbheis.

¹² Ann an dòchas, dèanaibh gàirdeachas, ann an trioblaid, buanaichibh, ann an ùrnaigh, bithibh seasmhach.

¹³ Cuidichibh le feumalachdan nan naomh agus thoiribh aoigheachd.

¹⁴ Beannaichibh iadsan a nì geur‑leanmhainn oirbh; beannaichibh is na mallaichibh iad.

¹⁵ Dèanaibh gàirdeachas leothasan a tha ri gàirdeachas, agus caoidh leothasan a tha ri caoidh.

¹⁶ Bithibh ann an co‑chòrdadh ri càch‑a‑chèile. Na bithibh àrdanach, ach biodh comann agaibh leothasan a tha ìosal. Na bithibh glic nur barail fhèin.

¹⁷ Na pàighibh air ais olc airson uilc, ach smaoinichibh mu na tha ceart mu choinneamh dhaoin' uile.

¹⁸ Ma tha e an comas, cho fada 's a tha e an crochadh oirbhse, bithibh beò ann an sìth leis a h‑uile duine.

¹⁹ A chàirdean ghràdhach, na dèanaibh dìoghaltas air ur son fhèin, ach fàgaibh aig corraich Dhè e, oir tha e sgrìobhte, “Is ann leamsa a tha dìoghaltas, pàighidh mise air ais, tha an Tighearna ag ràdh.”

²⁰ Air a chaochladh: “Ma tha do nàmhaid acrach, thoir biadh dha; ma bhios am pathadh air, thoir deoch dha; oir le bhith a' dèanamh seo càrnaidh tu èibhlean teine air a cheann.”

²¹ Na bi air do chur fo bhuaidh leis an olc, ach thoir buaidh air an olc leis a' mhath.