Philipianach 3 - An Tiomnadh Nuadh anns an Eadar-Theangachadh Ùr Gàidhlig 2017

Gun Chinnt san Fheòil

¹ Mu dheireadh, mo bhràithrean, dèanaibh gàirdeachas san Tighearna. Chan eil e na thrioblaid sam bith dhòmhsa na h‑aon rudan a sgrìobhadh thugaibh, agus tha e na dhìon dhuibhse.

² Bithibh faiceallach o na coin, bithibh faiceallach o luchd‑obrach an uilc, bithibh faiceallach o dhroch ghearradh na feòla,

³ oir is sinne an timcheall‑ghearradh, a tha ag adhradh ann an Spiorad Dhè 's a' bòstadh ann an Crìosd Ìosa, agus nach eil a' cur earbsa san fheòil –

⁴ ged a dh'fhaodainn fhèin cuideachd earbsa a bhith agam san fheòil. Ma tha neach sam bith eile a' saoilsinn gum faod e earbsa a chur san fheòil, is motha a dh'fhaodas mise:

⁵ air mo thimcheall‑ghearradh air an ochdamh latha, de chinneach Israeil, de threubh Bheniàmin, nam Eabhrach dhe na h‑Eabhraich; a thaobh an lagha, nam Pharasach;

⁶ a thaobh eud, a' dèanamh geur‑leanmhainn air an eaglais; a thaobh na fìreantachd a th' anns an lagh, neo‑choireach.

⁷ Ach ge b' e na rudan a bha nam buannachd dhòmhsa, mheas mi iad sin nan call air sgàth Chrìosd.

⁸ Ach dha‑rìribh, tha mi a' meas a h‑uile sìon na chall, air sgàth sàr‑luach eòlais Chrìosd Ìosa mo Thighearna, dhan do dh'fhuiling mi a h‑uile nì a chall, 's tha mi gam meas mar sgudal airson 's gum buannaichinn Crìosd,

⁹ agus gum bithinn air m' fhaighinn annsan, gun m' fhìreantachd fhèin agam a tha on lagh, ach an nì sin a tha tro chreideamh Chrìosd, an fhìreantachd a tha o Dhia air stèidh creideimh,

¹⁰ airson 's gum bi eòlas agam airsan 's air cumhachd na h‑aiseirigh aige, 's air co‑chomann nam fulangasan aige, air mo dhèanamh nam cho‑coltas‑san na bhàs,

¹¹ airson 's gum faodainn air aon chor aiseirigh nam marbh fhaighinn.

A' Leantainn oirnn chun a' Chinn‑Uidhe

¹² Chan e gu bheil mi air fhaighinn mu thràth, no gu bheil mi foirfe mu thràth, ach tha mi a' leantainn orm airson 's gum faigh mi grèim air an nì sin a b' adhbhar gun deach grèim cuideachd a ghabhail orm le Crìosd Ìosa.

¹³ A bhràithrean, chan eil mi a' meas gun do ghreimich mi fhathast, ach aon rud a tha mi a' dèanamh: a' dìochuimhneachadh na th' air chùl 's gam shìneadh fhèin air adhart chun nan rudan a tha romham,

¹⁴ tha mi a' leantainn orm chun a' chinn‑uidhe airson duais àrd‑ghairm Dhè ann an Crìosd Ìosa.

A' Leantainn Eisimpleir Phòil

¹⁵ Mar sin, na h‑uimhir againne 's a tha coileanta, biodh an inntinn seo againn, agus ma tha diofar inntinn agaibh ann an nì sam bith, foillsichidh Dia sin dhuibh cuideachd.

¹⁶ Dìreach bitheamaid beò a rèir an aon riaghailt air an do ràinig sinn.

¹⁷ A bhràithrean, aonaichibh ann a bhith gam leantainn‑sa, agus thoiribh an aire dhaibhsan a tha a' coiseachd a rèir na h‑eisimpleir a th' agaibh annainne,

¹⁸ oir tha mòran a' coiseachd, mun do dh'innis mi dhuibh gu tric – agus mum bheil mi a‑nis eadhon a' caoineadh ag innse dhuibh – gur e nàimhdean a th' annta do chrann‑ceusaidh Chrìosd,

¹⁹ 's e an crìoch a bhith air an sgrios, 's e an dia aca am brù, 's tha a' ghlòir aca nan nàire, agus tha na h‑inntinnean aca stèidhichte air gnothaichean talmhaidh.

²⁰ Oir tha an t‑saoranas againne air nèamh, om bheil dùil againn cuideachd ri Slànaighear, an Tighearna Ìosa Crìosd;

²¹ a chruth‑atharraicheas corp ar staid iriosail gus a bhith co‑choltach ri corp a ghlòir fhèin, a rèir obrachaidh a' chumhachd a th' aige, eadhon a h‑uile sìon a chur fo cheannsal fhèin.