Philemoin 1 - An Tiomnadh Nuadh anns an Eadar-Theangachadh Ùr Gàidhlig 2017

¹ Pòl, prìosanach Chrìosd Ìosa, agus Timòteus, ar bràthair, Gu Philemon gràdhach 's ar co‑obraiche,

² gu Apphia ghràdhach, agus gu Archippus ar co‑shaighdear, agus chun na h‑eaglaise a tha nad thaigh.

³ Gràs thugaibh agus sìth bho Dhia ar n‑Athair agus on Tighearna Ìosa Crìosd.

Taingealachd agus Ùrnaigh

⁴ Tha mi a' toirt taing dham Dhia, a' toirt iomradh ort an‑còmhnaidh nam ùrnaighean,

⁵ a' cluinntinn mud ghràdh 's mun chreideamh a th' agad san Tighearna Ìosa agus mu na naoimh uile,

⁶ airson 's gum bi co‑chomann do chreideimh èifeachdach ann a bhith ag aideachadh a h‑uile rud math a th' againn ann an Crìosd.

⁷ Oir tha taingealachd mhòr is misneachd againn às do ghràdh‑sa a chionn 's gu bheil cridheachan nan naomh ùraichte tromhadsa, a bhràthair.

Guidhe Phòil airson Onesimuis

⁸ Mar sin, ged a dh'fhaodainn a bhith dàn ann an Crìosd 's àithne dhut an rud a tha iomchaidh a dhèanamh,

⁹ b' fheàrr leam guidhe ort as leth a' ghràidh, on is mise Pòl a tha nam sheann duine, agus a tha a‑nis cuideachd nam phrìosanach de Chrìosd Ìosa.

¹⁰ Tha mi a' guidhe ort airson mo mhic Onesimus, a chaidh a ghineamhainn dhomh nam phrìosanachadh

¹¹ a bha uaireigin gun fheum dhut, ach a tha a‑nis feumail dhutsa agus dhòmhsa.

¹² Tha mi ga chur air ais thugad, agus gabh ris mar rim chridhe fhèin.

¹³ Bu mhiann leam a chumail còmhla rium fhèin, airson 's gum frithealadh e dhomh nad àite‑sa, ann an sèinichean an t‑soisgeil.

¹⁴ Ach cha robh mi airson sìon a dhèanamh gun do chead, airson 's nach dèanadh tu do dheagh ghnìomh gu riatanach ach gu deònach.

¹⁵ Oir ma dh'fhaodte gur ann airson seo a dhealaich e riut airson greis, gus am faigheadh tu e gu bràth.

¹⁶ Chan eil e tuilleadh na sheirbheiseach, ach nas fheàrr na seirbheiseach, na bhràthair gràdhach, gu h‑àraidh dhòmhsa, agus nach ann nas motha na sin dhutsa an dà chuid san fheòil agus san Tighearna?

¹⁷ Mar sin, ma mheasas tu mise mar chompanach, gabh ris‑san mar rium fhèin,

¹⁸ agus ma rinn e sìon ceàrr ort, no ma tha fiachan agad air, cuir sin air a' chunntas agamsa.

¹⁹ Sgrìobh mise, Pòl, seo le mo làimh fhèin; pàighidh mise e, gun a ràdh riut gu bheil thusa thu fhèin fo fhiachan dhòmhsa.

²⁰ Seadh, a bhràthair, airson 's gum biodh tairbhe agam uat anns an Tighearna, ùraich mo chridhe ann an Crìosd.

²¹ Le earbsa nad ùmhlachd, sgrìobh mi thugad agus fios agam gun dèan thu eadhon tuilleadh 's na tha mi ag ràdh.

²² Agus rud eile, dèan àite‑fuirich deiseil dhomh cuideachd; oir tha dòchas agam tro na h‑ùrnaighean agaibh gun tèid mo thoirt dhuibh.

²³ Tha Epaphras, mo cho‑phrìosanach ann an Crìosd Ìosa a' cur fàilte ort,

²⁴ agus Marcas, Aristarchus, Dèmas agus Lùcas, mo cho‑obraichean.

²⁵ Gu robh gràs an Tighearna Ìosa Crìosd còmhla ri ur spiorad.