Mata 4 - An Tiomnadh Nuadh anns an Eadar-Theangachadh Ùr Gàidhlig 2017

Buaireadh Ìosa

¹ An uair sin chaidh Ìosa a threòrachadh leis an Spiorad dhan fhàsach airson a bhith air a bhuaireadh leis an diabhal.

² Agus às dèidh dha trasgadh airson ceathrad latha agus ceathrad oidhche, bha an t‑acras air.

³ Agus thàinig am buaireadair is thuirt e, “Mas tu Mac Dhè, can ris na clachan seo tionndadh nan aran.”

⁴ Ach fhreagair esan, “Tha e sgrìobhte: ‘Chan ann le aran a‑mhàin a bhios duine beò, ach leis a h‑uile facal a thig o bheul Dhè.’”

⁵ An uair sin thug an diabhal e chun a' bhaile naoimh agus chuir e air binnean an teampaill e

⁶ agus thuirt e ris, “Mas tu Mac Dhè, tilg thu fhèin sìos, oir tha e sgrìobhte: ‘Bheir e àithne dha ainglean mud thimcheall,’ agus ‘Togaidh iad suas thu nan làmhan, air eagal 's gum buail thu do chas air cloich.’”

⁷ Thuirt Ìosa ris, “A‑rithist tha e sgrìobhte, ‘Cha bhuair thu an Tighearna do Dhia.’ ”

⁸ A‑rithist thug an diabhal e gu beinn ro àrd, agus sheall e dha rìoghachdan an t‑saoghail gu lèir agus a' ghlòir aca.

⁹ Agus thuirt e ris, “Bheir mise dhut iad seo uile, ma thuiteas tu sìos agus ma nì thu adhradh dhòmhsa.”

¹⁰ An uair sin thuirt Ìosa ris, “Thalla uam, a Shàtain! Oir tha e sgrìobhte, ‘Nì thu adhradh dhan Tighearna do Dhia, agus dhàsan a‑mhàin nì thu seirbheis.’”

¹¹ An uair sin dh'fhàg an diabhal e, agus, seall, thàinig ainglean agus bha iad a' frithealadh dha.

Ìosa a' Tòiseachadh air Searmonachadh

¹² Ach nuair a chuala Ìosa gun deach Eòin a chur an grèim, tharraing e air ais do Ghalile.

¹³ Agus a' fàgail Nàsaret chaidh e agus dh'fhuirich e aig Capernàum ri taobh na mara, ann an ceàrnaidhean Shabuloin is Nephtali –

¹⁴ airson 's gun deigheadh an rud a thuirt Isaiah am fàidh a choileanadh:

¹⁵ “Talamh Shabuloin is talamh Nephtali, slighe na fairge, air taobh thall Iòrdain, Galile nan Cinneach –

¹⁶ an sluagh a bha a' fuireach ann an dorchadas, chunnaic iad solas mòr; agus na daoine a bha a' fuireach ann an tìr agus sgàil a' bhàis, orrasan tha solas air èirigh.”

¹⁷ On àm sin thòisich Ìosa air searmonachadh, ag ràdh, “Dèanaibh aithreachas, oir tha rìoghachd nèimh faisg air làimh.”

Gairm nan Ciad Dheisciobal

¹⁸ Agus fhad 's a bha e a' coiseachd ri taobh Muir Ghalile, chunnaic e dithis bhràithrean, Sìmon (ris an canar Peadar) agus Anndra a bhràthair, a' tilgeil lìon dhan mhuir, oir b' e iasgairean a bh' annta.

¹⁹ Agus thuirt e riutha, “Thigibh às mo dhèidh‑sa, agus nì mi sibh nur n‑iasgairean de dhaoine.”

²⁰ Sa bhad dh'fhàg iad an lìn agus lean iad esan.

²¹ Agus a' dol air adhart às a sin, chunnaic e dithis bhràithrean eile, Seumas mac Shebede agus Eòin a bhràthair, anns an eathar còmhla rin athair Sebede, a' càradh an lìn, agus ghairm e iad.

²² Sa bhad dh'fhàg iad an t‑eathar agus an athair agus lean iad e.

Ìosa a' Leigheas na Muinntir a Bha Tinn

²³ Agus bha e a' dol tro Ghalile uile, a' teagasg anns na sionagogan aca is a' searmonachadh soisgeul na rìoghachd agus a' slànachadh gach gnè tinneis is gach gnè bochdainn am measg an t‑sluaigh.

²⁴ Mar sin chaidh a chliù air feadh Shiria gu lèir, agus thug iad thuige iadsan uile a bha tinn, iadsan a bha a' fulang diofar bhochdainnean is phiantan, iadsan a bha fo chumhachd dheamhan, tuiteamaich agus luchd‑pairilis, agus shlànaich e iad.

²⁵ Agus lean sluagh mòr e o Ghalile is o Dhecapolis, agus o Ierusalem is o Iudèa, agus o thaobh thall Iòrdain.