Mata 17 - An Tiomnadh Nuadh anns an Eadar-Theangachadh Ùr Gàidhlig 2017

An Cruth‑Atharrachaidh

¹ Agus às dèidh sia latha thug Ìosa leis Peadar is Seumas, is Eòin a bhràthair, agus threòraich e iad suas beinn àrd leotha fhèin.

² Agus chaidh a chruth‑atharrachadh mun coinneamh, agus dheàlraich aghaidh mar a' ghrian, agus dh'fhàs aodach deàlrach, ro gheal.

³ Agus, seall, chaidh Maois agus Eliah a nochdadh dhaibh, a' còmhradh ris.

⁴ Thuirt Peadar ri Ìosa, “A Thighearna, tha e math dhuinne a bhith an seo. Mas toigh leatsa, nì mi trì pàilleanan an seo – aon dhutsa agus aon do Mhaois agus aon do dh'Eliah.”

⁵ Nuair a bha e fhathast a' bruidhinn, seall, chuir sgòth dheàlrach sgàil orra, agus thuirt guth às an sgòth riutha, “Is e seo mo Mhac gràdhaichte, leis a bheil mi fìor thoilichte; èistibh ris‑san!”

⁶ Nuair a chuala na deisciobail seo, thuit iad air an aghaidhean agus ghabh iad fìor eagal.

⁷ Ach thàinig Ìosa agus bhean e dhaibh, is thuirt e, “Èiribh, agus na biodh eagal oirbh.”

⁸ Agus nuair a thog iad suas an sùilean, chan fhaca iad neach sam bith ach Ìosa a‑mhàin.

⁹ Agus fhad 's a bha iad a' tighinn a‑nuas on bheinn, thug Ìosa àithne dhaibh: “Na innsibh mun t‑sealladh do neach sam bith, gus am bi Mac an Duine air a thogail o na mairbh.”

¹⁰ Agus dh'fhaighnich a dheisciobail dha, “Carson mar sin a tha na sgrìobhaichean ag ràdh gum feum Eliah tighinn an toiseach?”

¹¹ Fhreagair e, “Tha Eliah a' tighinn, agus aisigidh e a h‑uile rud.

¹² Ach tha mise ag ràdh ribh gun tàinig Eliah mu thràth, agus cha do dh'aithnich iad e, ach rinn iad ris gach nì a thogair iad. Mar sin cuideachd fulaingidh Mac an Duine uapa.”

¹³ An uair sin thuig na deisciobail gun robh e a' bruidhinn riutha mu Eòin Baistidh.

Leigheas Balaich aig an Robh Deamhan

¹⁴ Agus nuair a thàinig iad chun an t‑sluaigh, thàinig duine suas gu Ìosa agus, a' tuiteam gu ghlùinean,

¹⁵ thuirt e, “A Thighearna, dèan tròcair air mo mhac, oir tha an tinneas tuiteamach air, agus tha e a' fulang gu mòr. Oir gu tric tha e a' tuiteam dhan teine, agus gu tric dhan uisge.

¹⁶ Thug mi gu do dheisciobail e, agus cha b' urrainn dhaibh a leigheas.”

¹⁷ Agus fhreagair Ìosa, “O, a ghinealaich eas‑creidmheich agus chlaoin, dè cho fada 's a bhios mi còmhla ribh? Dè cho fada 's a dh'fhuilingeas mi sibh? Thugaibh an seo thugamsa e.”

¹⁸ Agus chronaich Ìosa an deamhan, agus thàinig e às, agus chaidh am balach a leigheas on àm sin a‑mach.

¹⁹ An uair sin thàinig na deisciobail gu Ìosa gu dìomhair agus thuirt iad, “Carson nach robh an comas againne a thilgeil a‑mach?”

²⁰ Thuirt e riutha, “Air sgàth ur beag‑creideimh. Oir gu fìrinneach tha mi ag ràdh ribh, ma bhios creideamh mar shìol de ghràinne mustaird agaibh, canaidh sibh ris a' bheinn seo, ‘Gluais à seo gu sin,’ agus gluaisidh i, agus cha bhi rud sam bith eu‑comasach dhuibh.”

²¹ Ach cha tèid an seòrsa seo a‑mach ach tro ùrnaigh is tro thrasgadh.

Ìosa ag Innse Ro‑Làimh mu Bhàs Fhèin an Dara h‑Uair

²² Nuair a bha iad air cruinneachadh ann an Galile, thuirt Ìosa riutha, “Bidh Mac an Duine air a bhrath thairis do làmhan dhaoine;

²³ agus marbhaidh iad e, agus bidh e air a thogail suas air an treas latha.” Agus bha iadsan fìor bhrònach.

Cìs an Teampaill

²⁴ Nuair a thàinig iad gu Capernàum, thàinig luchd‑togail cìs an teampaill gu Peadar, agus thuirt iad ris, “Nach eil ur Fear‑Teagaisg a' pàigheadh cìs an teampaill?”

²⁵ Thuirt esan, “Tha.” Agus nuair a thàinig Peadar a‑steach dhan taigh, bhruidhinn Ìosa ris an toiseach, ag ràdh, “Dè do bharail‑sa, a Shìmoin? Cò uaithe a tha rìghrean na talmhainn a' togail an càin no an cìse? An ann on cloinn fhèin, no o fheadhainn eile?”

²⁶ Agus nuair a thuirt e, “O fheadhainn eile,” thuirt Ìosa ris, “Mar sin tha a' chlann saor.

²⁷ A dh'aindeoin sin, airson 's nach toir sinn oilbheum dhaibh, thalla chun na mara is tilg dubhan innte, agus gabh a' chiad iasg a thig suas; is nuair a dh'fhosglas tu a bheul gheibh thu bonn airgid. Gabh sin is thoir dhaibh e air mo shon‑sa agus air do shon fhèin.”